13.88C Vancouver 13.88C VancouverSep 4, 2025 12:12 PM - The Canadian Press
ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਅਤੇ ਉਨ੍ਹਾਂ ਦੇ ਮੰਤਰੀ ਮੰਡਲ ਦੀ ਟੋਰੌਂਟੋ ਵਿਚ ਬੈਠਕ ਦਾ ਅੱਜ ਦੂਜਾ ਦਿਨ ਹੈ। ਕੈਬਨਿਟ ਸੰਸਦ ਦੀ ਵਾਪਸੀ ਦੀ ਤਿਆਰੀ ਦੇ ਰੂਪ ਵਿਚ ਸਨਅਤੀ ਨਿਵੇਸ਼ ਨੂੰ ਵਧਾਉਣ ਦੇ ਤਰੀਕਿਆਂ,ਆਉਣ ਵਾਲੇ ਬਜਟ ਲਈ ਖ਼ਰਚ ਤਰਜੀਹਾਂ ਅਤੇ ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਦੇ ਟੈਰਿਫ ਦਾ ਮੁਕਾਬਲਾ ਕਰਨ ਦੇ ਯਤਨਾਂ 'ਤੇ ਚਰਚਾ ਕਰ ਰਹੀ ਹੈ।
ਕਾਰਨੀ ਸਰਕਾਰ ਵਲੋਂ ਅਕਤੂਬਰ ਵਿਚ ਆਪਣਾ ਪਹਿਲਾ ਬਜਟ ਪੇਸ਼ ਕਰਨ ਦੀ ਉਮੀਦ ਹੈ। ਹਾਲਾਂਕਿ,ਪ੍ਰਧਾਨ ਮੰਤਰੀ ਦਾ ਕਹਿਣਾ ਹੈ ਕਿ ਬਜਟ ਵਾਧੂ ਖ਼ਰਚ ਵਿਚ ਕਟੌਤੀ ਅਤੇ ਨਿਵੇਸ਼ ਦੋਵਾਂ 'ਤੇ ਫੋਕਸ ਹੋਵੇਗਾ। ਇਸ ਦੌਰਾਨ ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਦਾਅਵਾ ਕਰ ਰਹੇ ਹਨ ਕਿ ਕਾਰਨੀ ਕਾਰਨ ਘਾਟਾ ਵੱਧ ਜਾਵੇਗਾ ਅਤੇ ਉਹ ਜਸਟਿਨ ਟਰੂਡੋ ਨਾਲੋਂ ਵੀ ਕੈਨੇਡੀਅਨ ਲਈ ਵਧੇਰੇ ਮਹਿੰਗੇ ਸਾਬਤ ਹੋਣਗੇ।
ਇਸ ਵਿਚਕਾਰ ਪੋਲਸਟਰ ਜੀਨ-ਮਾਰਕ ਲੇਗਰ ਵਲੋਂ ਮੰਤਰੀ ਮੰਡਲ ਨੂੰ ਦਿੱਤੀ ਗਈ ਪੇਸ਼ਕਾਰੀ ਮੁਤਾਬਕ,ਅਮਰੀਕੀ ਟੈਰਿਫ ਹੁਣ ਕੈਨੇਡੀਅਨ ਲਈ ਸਭ ਤੋਂ ਵੱਡਾ ਮੁੱਦਾ ਨਹੀਂ ਹੈ,ਇਹ ਉਨ੍ਹਾਂ ਦੀਆਂ ਚਿੰਤਾਵਾਂ ਵਿਚ ਚੌਥੇ ਸਥਾਨ 'ਤੇ ਆ ਗਿਆ ਹੈ ਅਤੇ ਸਾਰੀਆਂ ਚਿੰਤਾਵਾਂ ਹੁਣ ਆਰਥਿਕਤਾ ਨਾਲ ਜੁੜੀਆਂ ਹੋਈਆਂ ਹਨ,ਰਹਿਣ ਦੀ ਲਾਗਤ ਦਾ ਮੁੱਦਾ ਇਸ ਵਿਚ ਟੌਪ 'ਤੇ ਹੈ।
