ਕਾਰਨੀ ਨੇ ਟਰੰਪ ਨਾਲ ਟੈਰਿਫ ਵਿਵਾਦ 'ਤੇ ਕੀਤੀ ਗੱਲਬਾਤ, ਕਿਹਾ- ਜੇ ਨਵੇਂ ਟੈਰਿਫ ਲਾਗੂ ਹੋਏ ਤਾਂ ਸਾਰੇ ਵਿਕਲਪ ਖੁੱਲ੍ਹੇ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਲੇਟਸਟ ਟੈਰਿਫ ਮੁੱਦੇ 'ਤੇ ਅੱਜ ਸਵੇਰ ਰਾਸ਼ਟਰਪਤੀ ਡੌਨਲਡ ਟਰੰਪ ਨਾਲ ਫੋਨ 'ਤੇ ਗੱਲਬਾਤ ਕਰਨ ਦੀ ਪੁਸ਼ਟੀ ਕੀਤੀ ਹੈ। ਉਨ੍ਹਾਂ ਔਟਵਾ ਵਿਚ ਪੱਤਰਕਾਰਾਂ ਨਾਲ ਗੱਲ ਕਰਦਿਆਂ ਕਿਹਾ ਕਿ ਨਵੇਂ ਟੈਰਿਫ ਸਾਡੇ ਤਿੰਨ ਪੱਖੀ ਵਪਾਰ ਸਮਝੌਤੇ ਦੀ ਉਲੰਘਣਾ ਹਨ ਪਰ ਟਰੰਪ ਆਉਣ ਵਾਲੇ ਹਫ਼ਤਿਆਂ ਵਿਚ ਗੱਲਬਾਤ ਨੂੰ ਤੇਜ਼ ਕਰਨ ਲਈ ਸਹਿਮਤ ਹੋਏ ਹਨ।

ਪੱਤਰਕਾਰਾਂ ਵਲੋਂ ਪ੍ਰਧਾਨ ਮੰਤਰੀ ਨੂੰ ਜਦੋਂ ਇਹ ਪੁੱਛਿਆ ਗਿਆ ਕਿ ਕੀ ਉਹ ਜਵਾਬੀ ਟੈਰਿਫ ਲਗਾਉਣ 'ਤੇ ਵਿਚਾਰ ਕਰ ਰਹੇ ਹਨ ਤਾਂ ਕਾਰਨੀ ਨੇ ਕਿਹਾ ਕਿ ਜੇਕਰ ਟਰੰਪ ਦੇ ਨਵੇਂ ਟੈਰਿਫ 30 ਦਿਨਾਂ ਵਿਚ ਲਾਗੂ ਹੁੰਦੇ ਹਨ ਤਾਂ ਸਾਰੇ ਵਿਕਲਪ ਖੁੱਲ੍ਹੇ ਹਨ। ਉਨ੍ਹਾਂ ਕਿਹਾ ਕਿ ਉਹ ਇਸ ਮੁੱਦੇ 'ਤੇ ਸੂਬਿਆਂ ਦੇ ਪ੍ਰੀਮੀਅਰਜ਼ ਨਾਲ ਚਰਚਾ ਕਰਨਗੇ। ਗੌਰਤਲਬ ਹੈ ਕਿ ਟਰੰਪ ਪ੍ਰਸ਼ਸਾਨ ਦਾ ਤਰਕ ਹੈ ਕਿ 50 ਫੀਸਦੀ ਨਵੇਂ ਟੈਰਿਫ ਦਾ ਕਦਮ ਕੈਨੇਡੀਅਨ ਸੂਬਿਆਂ ਵੱਲੋਂ ਅਮਰੀਕੀ ਸ਼ਰਾਬ 'ਤੇ ਲਗਾਈਆਂ ਰੋਕਾਂ, ਕੈਨੇਡਾ ਦੇ ਡੇਅਰੀ ਸਿਸਟਮ ਅਤੇ ਅਮਰੀਕੀ ਵਾਹਨਾਂ 'ਤੇ ਕੋਟੇ ਦੇ ਜਵਾਬ ਵਿਚ ਚੁੱਕਿਆ ਗਿਆ ਹੈ।

ਇਸ ਵਿਚਕਾਰ ਅਮਰੀਕੀ ਸ਼ਰਾਬ ਉਦਯੋਗ ਇੱਕ ਪਾਸੇ ਇਸ ਗੱਲ ਤੋਂ ਖੁਸ਼ ਹੈ ਕਿ ਟਰੰਪ ਨੇ ਕੈਨੇਡੀਅਨ ਸੂਬਿਆਂ ਵੱਲੋਂ ਅਮਰੀਕੀ ਸ਼ਰਾਬ 'ਤੇ ਲਗਾਏ ਬਾਈਕਾਟ ਦੇ ਨੁਕਸਾਨ ਨੂੰ ਗੰਭੀਰਤਾ ਨਾਲ ਲਿਆ ਹੈ ਪਰ ਦੂਜੇ ਪਾਸੇ ਉਹ ਡਰੇ ਹੋਏ ਹਨ ਕਿ ਨਵਾਂ ਟੈਰਿਫ ਦੋਵਾਂ ਦੇਸ਼ਾਂ ਦੇ ਵਪਾਰ ਨੂੰ ਤਬਾਹ ਕਰ ਸਕਦਾ ਹੈ।