21.92C Vancouver 21.92C VancouverApr 8, 2026 1:49 PM - Connect Newsroom - Jasmine Singh with files from The Canadian Press
ਪੀ.ਐਮ.ਮਾਰਕ ਕਾਰਨੀ ਅੱਜ ਸ਼ਾਮ ਆਰਟੇਮਿਸ II ਮਿਸ਼ਨ ਦੇ ਕੈਨੇਡੀਅਨ ਪੁਲਾੜ ਯਾਤਰੀ ਜੇਰੇਮੀ ਹੈਨਸਨ ਅਤੇ ਉਨ੍ਹਾਂ ਦੇ ਸਾਥੀ ਕਰੂ ਨਾਲ ਗੱਲਬਾਤ ਕਰਨਗੇ। ਕੈਨੇਡੀਅਨ ਸਪੇਸ ਏਜੰਸੀ ਅਨੁਸਾਰ, ਇਸ ਵਾਰਤਾ ਵਿਚ ਇੰਡਸਟਰੀ ਮਿਨਿਸਟਰ ਮੇਲਾਨੀ ਜੋਲੀ ਵੀ ਸ਼ਾਮਲ ਹੋਣਗੇ।
ਇਸ ਮਿਸ਼ਨ ਦੇ ਚਾਰ ਪੁਲਾੜ ਯਾਤਰੀ ਚੰਦਰਮਾ ਦਾ ਇਤਿਹਾਸਕ ਚੱਕਰ ਲਗਾਉਣ ਤੋਂ ਬਾਅਦ ਧਰਤੀ 'ਤੇ ਵਾਪਸ ਪਰਤ ਰਹੇ ਹਨ।ਹੈਨਸਨ ਅਤੇ ਉਨ੍ਹਾਂ ਦੇ ਤਿੰਨ ਅਮਰੀਕੀ ਸਾਥੀਆਂ ਨੇ ਸੋਮਵਾਰ ਨੂੰ ਚੰਦਰਮਾ ਦੇ ਉਸ ਹਨੇਰੇ ਵਾਲੇ ਪਾਸੇ ਤੋਂ ਲੰਘਦਿਆਂ ਇੱਕ ਨਵਾਂ ਰਿਕਾਰਡ ਬਣਾਇਆ ਹੈ, ਜਿਸ ਦੀ ਧਰਤੀ ਤੋਂ ਸਿਰਫ ਕਲਪਨਾ ਹੀ ਕੀਤੀ ਜਾ ਸਕਦੀ ਹੈ। ਇਸ ਮਿਸ਼ਨ ਨੇ 1970 ਦੇ ਅਪੋਲੋ 13 ਮਿਸ਼ਨ ਵੱਲੋਂ ਸਥਾਪਤ ਕੀਤੇ ਗਏ ਧਰਤੀ ਤੋਂ ਦੂਰੀ ਦੇ ਰਿਕਾਰਡ ਨੂੰ ਮਾਤ ਪਾਈ ਹੈ।
ਪ੍ਰਧਾਨ ਮੰਤਰੀ ਕਾਰਨੀ ਨੇ ਇਸ ਪ੍ਰਾਪਤੀ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਕੈਨੇਡਾ ਚੰਦਰਮਾ ਦੇ ਮਿਸ਼ਨ 'ਤੇ ਪੁਲਾੜ ਯਾਤਰੀ ਭੇਜਣ ਵਾਲਾ ਹੁਣ ਦੁਨੀਆ ਦਾ ਦੂਜਾ ਦੇਸ਼ ਬਣ ਗਿਆ ਹੈ। ਇਹ ਕਰੂ ਚੰਦਰਮਾ ਦੀਆਂ ਅਹਿਮ ਤਸਵੀਰਾਂ ਅਤੇ ਨਿਰੀਖਣ ਕਰਨ ਤੋਂ ਬਾਅਦ ਸ਼ੁੱਕਰਵਾਰ ਨੂੰ ਕੈਲੀਫੋਰਨੀਆ ਕੋਲ ਪ੍ਰਸ਼ਾਂਤ ਮਹਾਸਾਗਰ ਵਿਚ ਉਤਰੇਗਾ। ਗੌਰਤਲਬ ਹੈ ਕਿ ਆਰਟੇਮਿਸ II ਦਾ ਮੁੱਖ ਮਕਸਦ ਆਉਣ ਵਾਲੇ ਸਾਲਾਂ ਵਿਚ ਇਨਸਾਨ ਨੂੰ ਮੁੜ ਚੰਦਰਮਾ ਦੀ ਸਤ੍ਹਾ 'ਤੇ ਉਤਾਰਨ ਦੀ ਨੀਂਹ ਰੱਖਣਾ ਹੈ।
