ਕਾਰਨੀ ਨੇ ਨੈਟੋ ਸੰਮੇਲਨ ਦੌਰਾਨ ਈਰਾਨ 'ਤੇ ਅਮਰੀਕੀ ਕਾਰਵਾਈ ਦਾ ਕੀਤਾ ਸਮਰਥਨ: ਰਿਪੋਰਟ

ਪੀ.ਐਮ.ਮਾਰਕ ਕਾਰਨੀ ਨੇ ਤੁਰਕੀ ਦੀ ਰਾਜਧਾਨੀ ਅੰਕਾਰਾ ਵਿਚ ਹੋਏ ਨੈਟੋ ਸੰਮੇਲਨ ਦੌਰਾਨ ਈਰਾਨ 'ਤੇ ਤਾਜ਼ਾ ਅਮਰੀਕੀ ਹਮਲਿਆਂ ਦਾ ਸਮਰਥਨ ਕੀਤਾ ਹੈ ਅਤੇ ਇਸ ਫੌਜੀ ਕਾਰਵਾਈ ਨੂੰ ਸੀਜ਼ਫਾਇਰ ਦੀਆਂ ਉਲੰਘਣਾਵਾਂ ਦਾ ਬਿਲਕੁਲ ਢੁਕਵਾਂ ਜਵਾਬ ਦੱਸਿਆ ਹੈ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਈਰਾਨ ਲਗਾਤਾਰ ਗੈਰ-ਜ਼ਿੰਮੇਵਾਰਾਨਾ ਤਰੀਕੇ ਨਾਲ ਸਾਊਦੀ ਅਰਬ ਅਤੇ ਕਤਰ ਦੇ ਟਿਕਾਣਿਆਂ ਨੂੰ ਨਿਸ਼ਾਨਾ ਬਣਾ ਰਿਹਾ ਸੀ, ਜਿਸ ਕਾਰਨ ਇਹ ਜਵਾਬੀ ਕਾਰਵਾਈ ਜ਼ਰੂਰੀ ਹੋ ਗਈ ਸੀ।

ਦੂਜੇ ਪਾਸੇ, ਰਾਸ਼ਟਰਪਤੀ ਡੌਨਲਡ ਟਰੰਪ ਨੇ ਈਰਾਨ ਨਾਲ ਜੰਗਬੰਦੀ ਖ਼ਤਮ ਕਰਨ ਦਾ ਐਲਾਨ ਕਰਦਿਆਂ ਨੈਟੋ ਸਹਿਯੋਗੀਆਂ ਦੀ ਸਖ਼ਤ ਆਲੋਚਨਾ ਕੀਤੀ। ਟਰੰਪ ਨੇ ਪੱਛਮੀ ਦੇਸ਼ਾਂ 'ਤੇ ਅਮਰੀਕਾ ਅਤੇ ਇਜ਼ਰਾਈਲ ਦਾ ਸਾਥ ਨਾ ਦੇਣ ਦਾ ਦੋਸ਼ ਲਗਾਇਆ। ਹਾਲਾਂਕਿ, ਕਾਰਨੀ ਸਮੇਤ ਬਹੁਤੇ ਲੀਡਰਸ ਨੇ ਅਮਰੀਕੀ ਕਦਮਾਂ ਦੀ ਹਮਾਇਤ ਕੀਤੀ ਹੈ ਪਰ ਪ੍ਰਧਾਨ ਮੰਤਰੀ ਨੇ ਟਰੰਪ ਨੂੰ ਇਹ ਵੀ ਯਾਦ ਦਿਵਾਇਆ ਕਿ ਨੈਟੋ ਮੂਲ ਰੂਪ ਵਿਚ ਇੱਕ ਰੱਖਿਆਤਮਕ ਗੱਠਜੋੜ ਹੈ।

ਇਸ ਦੌਰਾਨ ਨੈਟੋ ਦੇ ਸਕੱਤਰ ਜਨਰਲ ਮਾਰਕ ਰੁਟੇ ਨੇ ਇਸ ਮਤਭੇਦ ਨੂੰ ਬਹੁਤਾ ਤੂਲ ਨਾ ਦਿੰਦੇ ਹੋਏ ਯੂਰਪੀ ਦੇਸ਼ਾਂ ਦਾ ਬਚਾਅ ਕੀਤਾ ਅਤੇ ਕਿਹਾ ਕਿ ਯੂਰਪੀ ਬੇਸ ਤੋਂ ਲਗਭਗ 5,000 ਉਡਾਣਾਂ ਰਾਹੀਂ ਅਮਰੀਕਾ ਦੀ ਮਦਦ ਵਿਚ ਯੋਗਦਾਨ ਪਾਇਆ ਗਿਆ ਹੈ। ਇਸ ਸੰਮੇਲਨ ਵਿਚ ਨੈਟੋ ਆਗੂਆਂ ਨੇ ਈਰਾਨ ਨੂੰ ਵਪਾਰਕ ਜਹਾਜ਼ਾਂ ਲਈ ਸਮੁੰਦਰੀ ਰਸਤਾ ਬਿਨਾਂ ਕਿਸੇ ਹਮਲੇ ਦੇ ਖੁੱਲ੍ਹਾ ਰੱਖਣ ਦੀਆਂ commitments 'ਤੇ ਪੂਰਾ ਉਤਰਨ ਦੀ ਹਦਾਇਤ ਕੀਤੀ ਹੈ।