13.09C Vancouver 13.09C VancouverApr 10, 2024 2:17 PM - The Canadian Press
ਬੈਂਕ ਆਫ਼ ਕੈਨੇਡਾ ਵਲੋਂ ਲਗਾਤਾਰ 6ਵੀਂ ਵਾਰ ਵਿਆਜ ਦਰਾਂ ਨੂੰ 5 ਫੀਸਦੀ ’ਤੇ ਸਥਿਰ ਰੱਖਿਆ ਗਿਆ ਹੈ। ਸੈਂਟਰਲ ਬੈਂਕ ਨੇ ਕਿਹਾ ਕਿ ਹਾਲ ਹੀ ਦੇ ਮਹੀਨਿਆਂ ਵਿਚ ਮਹਿੰਗਾਈ ਵਿਚ ਹੋਰ ਕਮੀ ਆਈ ਹੈ ਜਿਸ ਨੂੰ ਲੈ ਕੇ ਉਹ ਉਤਸ਼ਾਹਤ ਹਨ ਪਰ ਦਰਾਂ ਵਿਚ ਕਟੌਤੀ ਲਈ ਹੋਰ ਸਬੂਤਾਂ ਦੀ ਲੋੜ ਹੋਵੇਗੀ।
ਗਵਰਵਰ ਟਿਫ ਮੈਕਲੇਮ ਨੇ ਵਿਆਜ ਦਰਾਂ ਨੂੰ ਘਟਾਉਣ ਬਾਰੇ ਕੋਈ ਸਮਾਂ-ਸੀਮਾ ਨਹੀਂ ਦਿੱਤੀ। ਮੈਕਲੇਮ ਨੇ ਕਿਹਾ ਕਿ ਹਾਲ ਹੀ ਦੇ ਮਹਿੰਗਾਈ ਅੰਕੜਿਆਂ ਤੋਂ ਆਤਮਵਿਸ਼ਵਾਸ ਵਧਿਆ ਹੈ ਕਿ ਮਹਿੰਗਾਈ ਆਪਣੇ ਟੀਚੇ ’ਤੇ ਵਾਪਸ ਜਾ ਰਹੀ ਹੈ ਪਰ ਬੈਂਕ ਅਗਲਾ ਕਦਮ ਚੁੱਕਣ ਤੋਂ ਪਹਿਲਾਂ ਇਸ ਗੱਲ ਨੂੰ ਯਕੀਨੀ ਕਰਨਾ ਚਾਹੁੰਦਾ ਹੈ ਕਿ ਮਹਿੰਗਾਈ ਦਾ ਰੁਖ਼ ਹੇਠਾਂ ਵੱਲ ਬਰਕਰਾਰ ਹੈ।
ਬੈਂਕ ਨੇ ਬੁੱਧਵਾਰ ਨੂੰ ਜਾਰੀ ਮੁਦਰਾ ਨੀਤੀ ਰਿਪੋਰਟ ਵਿਚ ਕਿਹਾ ਕਿ ਉਸ ਨੂੰ 2025 ਵਿਚ ਮਹਿੰਗਾਈ ਦਰ ਆਪਣੇ ਦੋ ਫੀਸਦੀ ਦੇ ਟੀਚੇ ’ਤੇ ਵਾਪਸ ਆਉਣ ਦੀ ਉਮੀਦ ਹੈ। ਫਰਵਰੀ ਵਿਚ ਇਹ 2.8 ਫੀਸਦੀ ਤੱਕ ਆ ਚੁੱਕੀ ਹੈ। ਮੈਕਲੇਮ ਨੇ ਕਿਹਾ ਕਿ ਬੈਂਕ ਇਹ ਡਾਊਨਵਾਰਡ ਟਰੈਂਡ ਸਥਿਰ ਹੋਣ ਦੀ ਉਡੀਕ ਕਰ ਰਿਹਾ ਹੈ।
ਗੌਰਤਲਬ ਹੈ ਕਿ ਇਹ ਪਹਿਲਾਂ ਹੀ ਉਮੀਦ ਕੀਤੀ ਜਾ ਰਹੀ ਸੀ ਕਿ ਬੈਂਕ ਇਸ ਵਾਰ ਵੀ ਵਿਆਜ ਦਰਾਂ ਵਿਚ ਕੋਈ ਤਬਦੀਲੀ ਨਹੀਂ ਕਰਨਾ ਵਾਲਾ, ਉਥੇ ਹੀ ਬੈਂਕ ਵਲੋਂ ਮਹਿੰਗਾਈ ਲਈ ਅੱਗੇ ਜਾ ਕੇ ਜਤਾਏ ਗਏ ਰਿਸਕ ਨੂੰ ਦੇਖਦੇ ਹੋਏ ਅਰਥਸ਼ਾਸਤਰੀ ਨੇ ਜੂਨ ਵਿਚ ਦਰਾਂ ’ਚ ਕਟੌਤੀ ਦੀ ਉਮੀਦ ਨੂੰ ਘਟਾ ਦਿੱਤਾ ਹੈ।ਹਾਲਾਂਕਿ, ਮੈਕਲੇਮ ਨੇ ਕਿਹਾ ਕਿ ਜੂਨ ਵਿਚ ਦਰਾਂ ਵਿਚ ਕਟੌਤੀ ਸੰਭਾਵਨਾਵਾਂ ਦੇ ਦਾਇਰੇ ਵਿਚ ਹੈ।
