ਸਾਊਥ ਬ੍ਰਿਟਿਸ਼ ਕੋਲੰਬੀਆ 'ਚ ਤਾਪਮਾਨ ਦੇ ਟੁੱਟੇ ਸਦੀਆਂ ਪੁਰਾਣੇ ਰਿਕਾਰਡ

ਬੇਮੌਸਮੇ ਗਰਮ ਮੌਸਮ ਨੇ ਸਾਊਥ ਬ੍ਰਿਟਿਸ਼ ਕੋਲੰਬੀਆ ਵਿੱਚ ਸਦੀਆਂ ਪੁਰਾਣੇ ਤਾਪਮਾਨ ਦੇ ਰਿਕਾਰਡ ਤੋੜ ਦਿੱਤੇ ਹਨ। ਗ੍ਰੇਟਰ ਵਿਕਟੋਰੀਆ ਦੇ ਵੈਦਰ ਸਟੇਸ਼ਨਾਂ 'ਤੇ ਬੁੱਧਵਾਰ ਨੂੰ ਕਈ ਰਿਕਾਰਡ ਡਿੱਗੇ , ਜਿਸ ਵਿੱਚ 1922 ਦੇ ਰਿਕਾਰਡ ਨੂੰ ਪਾਰ ਕਰਦੇ ਹੋਏ 12.9 ਡਿਗਰੀ ਦਾ ਉੱਚ ਤਾਪਮਾਨ ਰਿਕਾਰਡ ਕੀਤਾ ਗਿਆ ।

ਐਨਵਾਇਰਮੈਂਟ ਕੈਨੇਡਾ ਦਾ ਕਹਿਣਾ ਹੈ ਕਿ ਵੈਸਟ ਵੈਨਕੂਵਰ ਵਿੱਚ ਵੀ ਉੱਚ ਤਾਪਮਾਨ ਦਰਜ ਕੀਤਾ ਗਿਆ ਜਿੱਥੇ ਪਾਰਾ 14 ਡਿਗਰੀ ਤੱਕ ਪਹੁੰਚ ਗਿਆ ਸੀ ਅਤੇ ਵ੍ਹਾਈਟ ਰੌਕ ਵਿੱਚ 13.5 ਡਿਗਰੀ ਦੇ ਉੱਚੇ ਤਾਪਮਾਨ ਨਾਲ 88 ਸਾਲਾਂ ਦਾ ਰਿਕਾਰਡ ਟੁੱਟਾ ਹੈ।

ਸਨਸ਼ਾਈਨ ਕੋਸਟ 'ਤੇ ਸੀਚੇਲਟ ਵਿੱਚ 13.7 ਡਿਗਰੀ ਅਤੇ ਅੰਦਰੂਨੀ ਹਿੱਸੇ ਵਿੱਚ ਓਸੋਈਓਸ ਤੱਕ 6.9 ਡਿਗਰੀ ਦੇ ਤਾਪਮਾਨ ਰਿਹਾ। ਐਨਵਾਇਰਮੈਂਟ ਕੈਨੇਡਾ ਨੇ ਚੇਤਾਵਨੀ ਦਿੱਤੀ ਸੀ ਕਿ ਪੈਸਿਫਿਕ ਫਰੰਟਲ ਸਿਸਟਮ ਜੋ ਗਰਮੀ ਲਿਆਉਂਦਾ ਹੈ ਉਸ ਨਾਲ ਦੱਖਣੀ ਤੱਟ 'ਤੇ ਤੇਜ਼ ਹਵਾਵਾਂ ਵੀ ਆਉਣਗੀਆਂ। ਜਿਸ ਨਾਲ ਸੰਭਾਵੀ ਤੌਰ 'ਤੇ 120 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫਤਾਰ ਨਾਲ ਤੂਫਾਨ ਆ ਸਕਦਾ ਹੈ ।

ਬੀਸੀ ਹਾਈਡਰੋ ਦਾ ਕਹਿਣਾ ਹੈ ਕਿ ਕੋਰਟੇਸ ਆਈਲੈਂਡ ਵਿੱਚ ਤਾਰਾਂ 'ਤੇ ਇੱਕ ਦਰੱਖਤ ਡਿੱਗਣ ਤੋਂ ਬਾਅਦ 1,000 ਤੋਂ ਵੱਧ ਗ੍ਰਾਹਕਾਂ ਦੀ ਬਿਜਲੀ ਗੁੱਲ ਹੋ ਗਈ।