12.95C Vancouver 12.95C VancouverJun 16, 2020 7:20 PM -
ਸੂਤਰਾਂ ਮੁਤਾਬਕ ਚੀਨ ਦੇ ਉਪ ਵਿਦੇਸ਼ ਮੰਤਰੀ ਲੁਓ ਜਾਓਹੁਈ ਅਤੇ ਚੀਨ ਵਿੱਚ ਭਾਰਤੀ ਰਾਜਦੂਤ ਵਿਕਰਮ ਮਿਸਰੀ ਦੀ ਅੱਜ ਬੀਜਿੰਗ ਵਿਖੇ ਮੁਲਾਕਾਤ ਹੋਈ ਹੈ।
ਇਹ ਮੁਲਾਕਾਤ ਦੋਨੋਂ ਮੁਲਕਾਂ ਵਿਚਕਾਰ ਲੱਦਾਖ ਦੀ ਗਲਵਾਨ ਘਾਟੀ ਵਿੱਚ ਵਧੀ ਹੋਈ ਹਿੰਸਕ ਤਨਾਤਨੀ ਦੌਰਾਨ ਹੋਈ ਹੈ। ਇਸ ਤਣਾਅ ਦੇ ਚਲਦੇ, ਦੋਨੋਂ ਧਿਰਾਂ ਕਈ ਜਾਨਾਂ ਗਵਾ ਚੁੱਕੀਆਂ ਹਨ।
ਭਾਰਤ ਵੱਲੋਂ ਪਹਿਲਾਂ ਕਿਹਾ ਗਿਆ ਸੀ ਕਿ 15 ਜੂਨ ਦੀ ਸ਼ਾਮ ਅਤੇ ਰਾਤ ਨੂੰ ਚੀਨ ਵੱਲੋਂ ਇੱਕਪਾਸੜ ਕਾਰਵਾਈ ਕਰਕੇ ਮੌਜੂਦਾ ਸਥਿਤੀ ਨੂੰ ਬਦਲਣ ਦੀ ਕੋਸ਼ਿਸ਼ ਦੌਰਾਨ ਦੋਨੋਂ ਧਿਰਾਂ ਵਿੱਚਕਾਰ ਹਿੰਸਕ ਕਾਰਵਾਈ ਹੋਈ ਅਤੇ ਜੇਕਰ ਚੀਨ ਮੌਜੂਦਾ ਸਮਝੌਤੇ ਦੀ ਪਾਲਣਾ ਕਰਦਾ ਤਾਂ ਇਸਨੂੰ ਟਾਲਿਆ ਜਾ ਸਕਦਾ ਸੀ।
ਭਾਰਤੀ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਅਨੁਰਾਗ ਸ਼੍ਰੀਵਾਸਤਵ ਨੇ ਕਿਹਾ ਕਿ ਦੋਨੋਂ ਪਾਸੇ ਜਾਨੀ ਨੁਕਸਾਨ ਹੋਇਆ ਹੈ ਅਤੇ ਗਲਵਾਨ ਘਾਟੀ ਵਿੱਚ ਚੀਨ ਵੱਲੋਂ ਲਾਈਨ ਔਫ਼ ਐਕਚੂਅਲ ਕੰਟਰੋਲ ਦਾ ਸਨਮਾਨ ਕਰਨ ਦੇ ਸਮਝੌਤੇ ਦੀ ਉਲੰਘਣਾ ਕੀਤੀ ਗਈ ਹੈ।
ਸ਼੍ਰੀਵਾਸਤਵ ਦਾ ਕਹਿਣਾ ਸੀ ਕਿ ਜ਼ਿੰਮੇਦਾਰ ਬੌਰਡਰ ਪ੍ਰਬੰਧਨ ਦੇ ਤਹਿਤ, ਭਾਰਤ ਦੀ ਹਰ ਕਾਰਵਾਈ ਐਲ.ਏ.ਸੀ. ਦੇ ਭਾਰਤੀ ਪਾਸੇ 'ਤੇ ਹੀ ਹੁੰਦੀ ਹੈ, ਅਤੇ ਭਾਰਤ ਚੀਨ ਤੋਂ ਵੀ ਇਹੋ ਉਮੀਦ ਰੱਖਦਾ ਹੈ।
ਉਹਨਾਂ ਕਿਹਾ ਕਿ ਭਾਰਤ ਨੂੰ ਬੌਰਡਰ ਦੇ ਇਲਾਕਿਆਂ ਵਿੱਚ ਸ਼ਾਂਤੀ ਬਰਕਰਾਰ ਰੱਖਣ ਅਤੇ ਕਿਸੇ ਵੀ ਵਿਵਾਦ ਨੂੰ ਗੱਲਬਾਤ ਰਾਹੀਂ ਸੁਲਝਾਉਣ ਦੀ ਮਹੱਤਤਾ 'ਤੇ ਪੂਰਾ ਵਿਸ਼ਵਾਸ ਹੈ।
ਸ਼੍ਰੀਵਾਸਤਵ ਨੇ ਕਿਹਾ ਕਿ ਨਾਲ ਹੀ, ਭਾਰਤ ਆਪਣੀ ਪ੍ਰਭੂਸੱਤਾ ਅਤੇ ਖੇਤਰੀ ਏਕਤਾ ਨੂੰ ਬਰਕਰਾਰ ਰੱਖਣ ਲਈ ਵੀ ਵਚਨਬੱਧ ਹੈ।
