ਕੈਨੇਡਾ ਦੀਆਂ ਦੋ ਸਭ ਤੋਂ ਵੱਡੀਆਂ ਰੇਲਵੇ ਕੰਪਨੀਆਂ ਦਾ ਕੰਮਕਾਜ ਹੋ ਰਿਹਾ ਹੈ ਅੱਜ ਤੋਂ ਬਹਾਲ

ਕੈਨੇਡਾ ਦੀਆਂ ਦੋ ਸਭ ਤੋਂ ਵੱਡੀਆਂ ਰੇਲਵੇ ਕੰਪਨੀਆਂ ਦਾ ਕੰਮਕਾਜ ਅੱਜ ਤੋਂ ਬਹਾਲ ਹੋ ਰਿਹਾ ਹੈ। ਫੈਡਰਲ ਲੇਬਰ ਬੋਰਡ ਨੇ ਸ਼ਨੀਵਾਰ ਨੂੰ ਦੋਵਾਂ ਕੰਪਨੀਆਂ ਅਤੇ ਉਨ੍ਹਾਂ ਦੇ ਵਰਕਰਜ਼ ਨੂੰ ਬਾਈਡਿੰਗ ਆਰਬਿਟਰੇਸ਼ਨ ਤੋਂ ਪਹਿਲਾਂ ਸੋਮਵਾਰ ਤੋਂ ਕੰਮ ਮੁੜ ਸ਼ੁਰੂ ਕਰਨ ਦੇ ਆਦੇਸ਼ ਦਿੱਤੇ ਸਨ।

ਟੀਮਸਟਰ ਯੂਨੀਅਨ ਹਾਲਾਂਕਿ, ਲੇਬਰ ਬੋਰਡ ਦੇ ਹੁਕਮ ਤੋਂ ਨਾਰਾਜ਼ ਹੈ ਅਤੇ ਇਸ ਨੂੰ ਕੋਰਟ ਵਿਚ ਚੁਣੌਤੀ ਦੇਣ ਦਾ ਫੈਸਲਾ ਕੀਤਾ ਹੈ।

ਓਧਰ, ਕੈਲਗਰੀ ਅਧਾਰਤ ਰੇਲਵੇ ਕੰਪਨੀ ਕੈਨੇਡੀਅਨ ਪੈਸੀਫਿਕ ਕੰਸਾਸ ਸਿਟੀ ਨੇ ਕਿਹਾ ਹੈ ਕਿ ਰੇਲਵੇ ਟ੍ਰੈਫਿਕ ਨੂੰ ਪੂਰੀ ਤਰ੍ਹਾਂ ਬਹਾਲ ਹੋਣ ਵਿਚ ਕਈ ਹਫ਼ਤੇ ਲੱਗ ਸਕਦੇ ਹਨ ਅਤੇ ਉਸ ਤੋਂ ਬਾਅਦ ਸਪਲਾਈ ਚੇਨ ਨੂੰ ਸਥਿਰ ਕਰਨ ਲਈ ਹੋਰ ਸਮਾਂ ਲੱਗੇਗਾ।

ਗੌਰਤਲਬ ਹੈ ਕਿ ਕੈਨੇਡੀਅਨ ਨੈਸ਼ਨਲ ਰੇਲਵੇ ਅਤੇ ਕੈਨੇਡੀਅਨ ਪੈਸੀਫਿਕ ਕੰਸਾਸ ਸਿਟੀ ਵਲੋਂ ਲੰਘੇ ਵੀਰਵਾਰ ਕੰਮਕਾਜ ਰੋਕ ਦਿੱਤਾ ਗਿਆ ਸੀ। ਇਸ ਵਜ੍ਹਾ ਨਾਲ ਨਾ ਸਿਰਫ ਰੇਲਵੇ ਜ਼ਰੀਏ ਹੋਣ ਵਾਲੀ ਮਾਲ ਆਵਾਜਾਈ ਪ੍ਰਭਾਵਿਤ ਹੋਈ ਸਗੋਂ ਟੋਰਾਂਟੋ, ਮਾਂਟਰੀਅਲ ਅਤੇ ਵੈਨਕੂਵਰ ਖੇਤਰ ਵਿਚ ਸੀ. ਪੀ. ਕੇ. ਸੀ. ਦੇ ਟ੍ਰੈਕ 'ਤੇ ਚੱਲਣ ਵਾਲੀਆਂ ਯਾਤਰੀ ਰੇਲ ਗੱਡੀਆਂ ਵੀ ਰੁਕ ਗਈਆਂ ਸਨ।

ਟਰੂਡੋ ਸਰਕਾਰ ਪਹਿਲਾਂ ਇਸ ਮਾਮਲੇ ਵਿਚ ਦਖ਼ਲ ਦੇਣ ਤੋਂ ਇਨਕਾਰ ਕਰ ਰਹੀ ਸੀ ਪਰ ਇੰਡਸਟਰੀ ਅਤੇ ਛੋਟੇ ਕਾਰੋਬਾਰੀਆਂ ਵਲੋਂ ਦਬਾਅ ਵਧਦਾ ਦੇਖ ਸਰਕਾਰ ਨੇ ਕੰਮਕਾਜ ਬਹਾਲ ਕਰਨ ਲਈ ਮਾਮਲਾ ਲੇਬਰ ਬੋਰਡ ਕੋਲ ਭੇਜਣ ਦੇ ਹੁਕਮ ਦੇ ਦਿੱਤੇ ਸਨ।