14.37C Vancouver 14.37C VancouverMar 2, 2026 5:32 PM - Connect Newsroom - Jasmine Singh
ਕੈਨੇਡਾ ਬਾਰਡਰ ਸਰਵਿਸ ਏਜੰਸੀ ਨੇ ਓਨਟਾਰੀਓ ਵਿਚ ਬਲੂ ਵਾਟਰ ਬ੍ਰਿਜ ਦੇ ਐਂਟਰੀ ਪੁਆਇੰਟ 'ਤੇ ਇੱਕ ਵਪਾਰਕ ਟਰੱਕ ਵਿੱਚੋਂ 111.4 ਕਿੱਲੋ ਕੋਕੀਨ ਬਰਾਮਦ ਕੀਤਾ ਹੈ। ਇਹ ਕਾਰਵਾਈ 19 ਫਰਵਰੀ ਨੂੰ ਕੀਤੀ ਗਈ ਜਦੋਂ ਅਮਰੀਕਾ ਤੋਂ ਆ ਰਹੇ ਇੱਕ ਟਰੱਕ ਦੀ ਸ਼ੱਕ ਦੇ ਆਧਾਰ 'ਤੇ ਦੂਜੀ ਵਾਰ ਤਲਾਸ਼ੀ ਲਈ ਗਈ।
ਬਾਰਡਰ ਅਧਿਕਾਰੀਆਂ ਨੇ ਇਸ ਮਾਮਲੇ ਵਿਚ ਦੋ ਪੰਜਾਬੀ ਨੌਜਵਾਨ ਨੋਵਾ ਸਕੋਸ਼ੀਆ ਦੇ ਡਾਰਟਮਾਊਥ ਦੇ ਰਹਿਣ ਵਾਲੇ 29 ਸਾਲਾ ਸਰਕਰਨ ਵੀਰ ਸਿੰਘ ਅਤੇ ਓਨਟਾਰੀਓ ਦੇ ਬੇਲੇਵਿਲ ਦੇ 25 ਸਾਲਾ ਚਮਕੌਰ ਸਿੰਘ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਸੀ.ਬੀ.ਐਸ.ਏ. ਮੁਤਾਬਕ, ਜ਼ਬਤ ਕੀਤਾ ਗਿਆ ਨਸ਼ਾ ਅਤੇ ਦੋਵਾਂ ਮੁਲਜ਼ਮਾਂ ਨੂੰ ਆਰ.ਸੀ.ਐਮ.ਪੀ. ਹਵਾਲੇ ਕੀਤਾ ਗਿਆ ਹੈ।
ਦੋਵਾਂ 'ਤੇ ਕੰਟਰੋਲਡ ਡਰੱਗ ਐਂਡ ਸਬਟੈਂਸ ਐਕਟ ਤਹਿਤ ਕੋਕੀਨ ਦੀ ਤਸਕਰੀ ਅਤੇ ਤਸਕਰੀ ਦੇ ਮਕਸਦ ਲਈ ਕੋਕੀਨ ਰੱਖਣ ਦੇ ਦੋਸ਼ ਲਗਾਏ ਗਏ ਹਨ। ਇਹ ਮਾਮਲਾ ਇਸ ਵੇਲੇ ਸਾਰਨੀਆ ਦੀ ਓਨਟਾਰੀਓ ਕੋਰਟ ਔਫ ਜਸਟਿਸ ਵਿਚ ਵਿਚਾਰ ਅਧੀਨ ਹੈ। ਸੀ.ਬੀ.ਐਸ.ਏ. ਦੇ ਅੰਕੜਿਆਂ ਅਨੁਸਾਰ, 1 ਜਨਵਰੀ 2025 ਤੋਂ ਲੈ ਕੇ ਹੁਣ ਤੱਕ ਦੱਖਣੀ ਓਨਟਾਰੀਓ ਖੇਤਰ ਵਿਚ ਅਮਰੀਕਾ ਤੋਂ ਆ ਰਹੀ ਲਗਭਗ 1,743 ਕਿੱਲੋ ਕੋਕੇਨ ਜ਼ਬਤ ਕੀਤੀ ਜਾ ਚੁੱਕੀ ਹੈ।
