14.36C Vancouver 14.36C VancouverSep 2, 2021 9:36 AM -
ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ (ਪੀਪੀਸੀਸੀ) ਦੇ ਕਾਰਜਕਾਰੀ ਪ੍ਰਧਾਨਾਂ ਦੀ "ਪੰਜ ਪਿਆਰਿਆਂ" ਨਾਲ ਤੁਲਨਾ ਕਰਨ ਤੋਂ ਇੱਕ ਦਿਨ ਬਾਅਦ, ਕਾਂਗਰਸ ਦੇ ਪੰਜਾਬ ਦੇ ਇੰਚਾਰਜ ਹਰੀਸ਼ ਰਾਵਤ ਨੇ ਬੁੱਧਵਾਰ ਨੂੰ ਇੱਕ ਮੁਆਫ਼ੀਨਾਮਾ ਜਾਰੀ ਕਰਦਿਆਂ ਆਖਿਆ ਕਿ ਉਹ ਆਪਣੇ ਸ਼ਬਦ ਵਾਪਸ ਲੈਂਦੇ ਹਨ।
ਮੀਡੀਆ ਨੂੰ ਸੰਬੋਧਿਤ ਹੁੰਦਿਆਂ ਰਾਵਤ ਨੇ ਆਖਿਆ ਕਿ ਉਨ੍ਹਾਂ ਦੀਆਂ ਗ਼ਲਤੀਆਂ ਦੇ ਪਛਤਾਵੇ ਲਈ, ਉਹ ਉੱਤਰਾਖੰਡ ਦੇ ਗੁਰਦਵਾਰੇ ਵਿੱਚ ਝਾੜੂ ਲਾਉਣਗੇ।
"ਮੈਂ ਉਹ ਸ਼ਬਦ (ਪੰਜ ਪਿਆਰੇ) ਸਨਮਾਨਿਤ ਸ਼ਖ਼ਸੀਅਤ ਲਈ ਵਰਤਿਆ ਸੀ। ਫਿਰ ਵੀ, ਜੇਕਰ ਮੇਰੇ ਸ਼ਬਦਾਂ ਨਾਲ ਕਿਸੇ ਦੀਆਂ ਭਾਵਨਾਵਾਂ ਦੁਖੀ ਹੋਈਆਂ ਹਨ, ਤਾਂ ਮੈਂ ਮੁਆਫ਼ੀ ਮੰਗਦਾ ਹਾਂ ਅਤੇ ਆਪਣੇ ਅਲਫਾਜ਼ ਵਾਪਸ ਲੈਂਦਾ ਹਾਂ। ਪਛਤਾਵੇ ਲਈ, ਮੈਂ ਆਪਣੇ ਸੂਬੇ (ਉੱਤਰਾਖੰਡ) ਦੇ ਗੁਰਦਵਾਰੇ ਵਿੱਚ ਝਾੜੂ ਲਾਵਾਂਗਾ,"ਪੰਜਾਬ ਕਾਂਗਰਸ ਇੰਚਾਰਜ ਹਰੀਸ਼ ਰਾਵਤ ਨੇ ਆਖਿਆ।
ਦੱਸਣਯੋਗ ਹੈ ਕਿ ਸਿੱਖਾਂ ਲਈ "ਪੰਜ ਪਿਆਰੇ" ਲਫ਼ਜ਼ ਸਤਿਕਾਰਯੋਗ ਹੈ।
ਗ਼ੌਰਤਲਬ ਹੈ ਕਿ ਮੰਗਲਵਾਰ ਨੂੰ, ਰਾਵਤ ਨੇ ਇਹ ਲਫ਼ਜ਼ ਨਵਜੋਤ ਸਿੰਘ ਸਿੱਧੂ ਅਤੇ ਪੀਪੀਸੀਸੀ ਦੇ ਚਾਰ ਹੋਰ ਕਾਰਜਕਾਰੀ ਪ੍ਰਧਾਨਾਂ ਲਈ ਇਸਤੇਮਾਲ ਕੀਤਾ ਸੀ।
ਲੰਘੇ ਕੱਲ, ਚੰਡੀਗੜ੍ਹ ਵਿੱਚ, ਕਾਂਗਰਸ ਨੂੰ ਸੂਬੇ ਵਿੱਚ ਦਰਪੇਸ਼ ਮੁਸ਼ਕਲਾਂ ਦਾ ਜ਼ਿਕਰ ਕਰਦਿਆਂ, ਰਾਵਤ ਨੇ ਆਖਿਆ,"ਜਿੰਨਾ ਕੁ ਮੈਂ ਜਾਣਦਾ ਹਾਂ, ਨਵਜੋਤ ਸਿੰਘ ਸਿੱਧੂ ਪੀਸੀਸੀ ਦੇ ਪਹਿਲੇ ਪ੍ਰਧਾਨ ਹਨ, ਜਿਨ੍ਹਾਂ ਨੇ ਸਾਰੀਆਂ ਅਗਲੀਆਂ ਜਥੇਬੰਦੀਆਂ ਅਤੇ ਹੋਰਾਂ ਨਾਲ ਇਹ ਜਾਨਣ ਲਈ ਬੈਠਕ ਕੀਤੀ ਹੈ ਕਿ ਉਨ੍ਹਾਂ ਨੂੰ ਕੰਮ ਕਰਨ ਵਿੱਚ ਕਿੱਥੇ ਮੁਸ਼ਕਿਲਾਂ ਆ ਰਹੀਆਂ ਹਨ ਅਤੇ ਉਨ੍ਹਾਂ ਦਾ ਹੱਲ ਕਿਵੇਂ ਕੱਢਿਆ ਜਾ ਸਕਦਾ ਹੈ।"
ਉਨ੍ਹਾਂ ਅੱਗੇ ਆਖਿਆ,"ਇਸ ਸਭ ਬਾਰੇ ਪੀਸੀਸੀ ਪ੍ਰਧਾਨ ਅਤੇ ਉਸਦੀ ਟੀਮ ਅਤੇ ਸਾਡੇ 'ਪੰਜ ਪਿਆਰਿਆਂ' (ਨਵਜੋਤ ਸਿੰਘ ਸਿੱਧੂ ਅਤੇ ਚਾਰ ਹੋਰ ਕਾਰਜਕਾਰੀ ਪ੍ਰਧਾਨ) ਨਾਲ ਚਰਚਾ ਕਰਨੀ ਮੇਰੀ ਜ਼ਿੰਮੇਵਾਰੀ ਸੀ।"
