9.64C Vancouver 9.64C VancouverAug 28, 2020 1:21 AM -
ਕਾਂਗਰਸ ਦੇ ਕੱਦਾਵਰ ਨੇਤਾ ਗੁਲਾਮ ਨਬੀ ਆਜ਼ਾਦ, ਜਿਨ੍ਹਾਂ ਨੇ ਸੋਨਿਆ ਗਾਂਧੀ ਨੂੰ ਲਿਖੇ ਗਏ ਅਸਹਮਤੀ ਪੱਤਰ ਉੱਤੇ ਵੀ ਹਸਤਾਖਰ ਕੀਤੇ ਸਨ, ਉਨ੍ਹਾਂ ਨੇ ਪਾਰਟੀ ਤੋਂ ਅਲੱਗ ਥਲੱਗ ਕਰਨ ਜਿਹੀ ਸਥਿਤੀ ਬਣਨ ਤੋਂ ਬਾਅਦ, ਪਾਰਟੀ ਦੇ ਆਗੂਆਂ ਨੂੰ ਇੱਕ ਸਖਤ ਸੁਨੇਹਾ ਦਿੱਤਾ ਹੈ।
71 ਸਾਲਾ ਗੁਲਾਮ ਨਬੀ ਆਜ਼ਾਦ ਨੇ ਅੱਜ ਕਿਹਾ, ਜੋ ਅਧਿਕਾਰੀ ਜਾਂ ਸੂਬਾ ਇਕਾਈ ਦੇ ਪ੍ਰਧਾਨ ਜਾਂ ਜ਼ਿਲ੍ਹਾ ਪ੍ਰਧਾਨ ਸਾਡੇ ਪ੍ਰਸਤਾਵ ਦਾ ਵਿਰੋਧ ਕਰ ਰਹੇ ਹਨ, ਉਨ੍ਹਾਂ ਨੂੰ ਪਤਾ ਹੈ ਕਿ, ਚੋਣ ਹੋਣ 'ਤੇ ਉਨ੍ਹਾਂ ਨੂੰ ਕੋਈ ਨਹੀਂ ਪੁੱਛੇਗਾ।"
ਰਾਜ ਸਭਾ ਮੈਂਬਰ ਆਜ਼ਾਦ ਨੇ ਕਿਹਾ, ਜੋ ਕੋਈ ਵੀ ਅਸਲ 'ਚ ਕਾਂਗਰਸ ਦਾ ਹਿੱਤ ਚਾਹੁੰਦਾ ਹੈ, ਉਹ ਪੱਤਰ ਦਾ ਵਿਰੋਧ ਨਹੀਂ ਬਲਕਿ ਸਵਾਗਤ ਕਰੇਗਾ।" ਆਜ਼ਾਦ ਨੇ ਸੁਝਾਅ ਦਿੱਤਾ ਹੈ ਕਿ ਸੂਬਾ ਪੱਧਰੀ ਕਾਂਗਰਸ ਪ੍ਰਧਾਨਾਂ, ਜ਼ਿਲ੍ਹਾ ਪ੍ਰਧਾਨਾਂ, ਬਲਾਕ ਪ੍ਰਧਾਨਾਂ ਅਤੇ ਕਾਂਗਰਸ ਕਾਰਜ ਕਮੇਟੀ ਦੀ ਚੋਣ ਕੀਤੀ ਜਾਣੀ ਚਾਹੀਦੀ ਹੈ।
ਉਨ੍ਹਾਂ ਕਿਹਾ ਕਿ ਚੋਣ ਦਾ ਇਹ ਲਾਭ ਹੁੰਦਾ ਹੈ ਕਿ ਜਦੋਂ ਤੁਸੀ ਚੋਣ ਲੜਦੇ ਹੋ, ਤਾਂ ਘੱਟ ਤੋਂ ਘੱਟ ਤੁਹਾਡੀ ਪਾਰਟੀ ਤੁਹਾਡੇ ਨਾਲ ਖੜੀ ਹੁੰਦੀ ਹੈ।
ਆਜ਼ਾਦ ਅਨੁਸਾਰ ਮੌਜੂਦਾ ਹਾਲਾਤ 'ਚ ਪ੍ਰਧਾਨ ਬਣਨ ਵਾਲੇ ਵਿਅਕਤੀ ਨੂੰ ਇੱਕ ਫ਼ੀਸਦੀ ਸਮਰਥਨ ਵੀ ਨਹੀਂ ਮਿਲ ਸਕਦਾ।
ਗੌਰਤਲਬ ਹੈ ਕਿ ਆਜ਼ਾਦ ਸਮੇਤ ਜਿਹੜੇ ਕਾਂਗਰਸੀ ਲੀਡਰਾਂ ਨੇ ਪਾਰਟੀ ਅੰਦਰ ਚੋਣਾਂ ਦੀ ਮੰਗ ਕੀਤੀ ਹੈ, ਉਨ੍ਹਾਂ ਨੂੰ ਪਾਰਟੀ ਅੰਦਰ ਹੀ ਕਿਸੇ ਵਿਰੋਧੀ ਦੀ ਤਰ੍ਹਾਂ ਵੇਖੇ ਜਾਣ ਦੀਆਂ ਖਬਰਾਂ ਸਾਹਮਣੇ ਆ ਰਹੀਆਂ ਹਨ।
ਗੁਲਾਮ ਨਬੀ ਆਜ਼ਾਦ ਦੇ ਇਨ੍ਹਾਂ ਬਿਆਨਾਂ ਤੋਂ ਬਾਅਦ, ਅੱਜ ਕਾਂਗਰਸ ਪਾਰਟੀ ਨੇ ਪਾਰਲੀਅਮੈਂਟ 'ਚ ਆਪਣੇ ਲੀਡਰਾਂ ਦਾ ਐਲਾਨ ਕੀਤਾ, ਜਿਸ 'ਚ ਗੁਲਾਮ ਨਬੀ ਆਜ਼ਾਦ ਨੂੰ ਇੱਕ ਵਾਰ ਫਿਰ ਤੋਂ ਰਾਜ ਸਭਾ 'ਚ 'ਲੀਡਰ ਆਫ ਔਪੋਜ਼ੀਸ਼ਨ' ਦਾ ਦਰਜਾ ਹਾਸਿਲ ਹੋਇਆ ਹੈ।
