12.99C Vancouver 12.99C VancouverJun 22, 2020 7:16 PM -
ਬੈਂਕ ਔਫ਼ ਕੈਨੇਡਾ ਦੇ ਗਵਰਨਰ ਟਿੱਫ਼ ਮੈਕਲੇਮ ਦਾ ਕਹਿਣਾ ਹੈ ਕਿ ਕੋਵਿਡ-19 ਮਹਾਂਮਾਰੀ ਕਾਰਣ ਹੋਏ ਆਰਥਿਕ ਨੁਕਸਾਨ ਦਾ ਅਸਰ ਲੰਮੇ ਸਮੇਂ ਤੱਕ ਮਹਿਸੂਸ ਹੋਵੇਗਾ।
ਉਹਨਾਂ ਕਿਹਾ ਕਿ ਲੋਕਾਂ ਦੇ ਕੰਮਾਂ 'ਤੇ ਵਾਪਸ ਜਾਣ ਅਤੇ ਆਪਣੀਆਂ ਆਮ ਗਤੀਵਿਧੀਆਂ ਨੂੰ ਮੁੜ ਸ਼ੁਰੂ ਕਰਨ ਦੇ ਨਾਲ, ਇਸ ਸਾਲ ਦੀ ਤੀਸਰੀ ਤਿਮਾਹੀ ਦੌਰਾਨ ਆਰਥਿਕਤਾ ਦਾ ਵਿਕਾਸ ਹੋਣ ਦੇ ਆਸਾਰ ਹਨ।
ਪਰ ਉਨ੍ਹਾਂ ਕਿਹਾ ਕਿ ਆਉਣ ਵਾਲੇ ਮਹੀਨਿਆਂ ਦੌਰਾਨ ਅਰਥਵਿਵਸਥਾ ਵਿੱਚ ਆਉਣ ਵਾਲਾ ਇਹ ਹੁਲਾਰਾ ਥੁੜ-ਚਿਰਾ ਹੋ ਸਕਦਾ ਹੈ।
ਗਵਰਨਰ ਦੇ ਮੁਤਾਬਕ, ਸੂਬਿਆਂ ਅਤੇ ਉਦਯੋਗਾਂ ਦੇ ਅਲੱਗ-ਅਲੱਗ ਸਮੇਂ 'ਤੇ ਖੁੱਲਣ, ਅਤੇ ਉਪਭੋਗਤਾਵਾਂ ਦੇ ਯਕੀਨ ਤੇ ਬੇਰੁਜ਼ਗਾਰੀ ਦੀ ਦਰ ਦੀ ਅਨਿਸ਼ਚਿਤਤਾ ਦੇ ਕਾਰਣ ਇਸ ਮਹਾਂਮਾਰੀ ਦਾ ਮੰਗ ਅਤੇ ਪੂਰਤੀ ਉੱਪਰ ਪੈਣ ਵਾਲਾ ਪ੍ਰਭਾਵ ਲੰਮੇ ਚਿਰ ਤੱਕ ਨਜ਼ਰ ਆਵੇਗ।
ਉਹਨਾਂ ਕਿਹਾ ਕਿ ਸਰੀਰਕ ਦੂਰੀ ਦੇ ਨਿਯਮਾਂ ਕਾਰਣ ਕੰਮ ਦੀਆਂ ਥਾਵਾਂ ਦੀ ਉਤਪਾਦਕਤਾ 'ਤੇ ਵੀ ਅਸਰ ਪੈ ਸਕਦਾ ਹੈ ਅਤੇ ਕਈ ਸੇਵਾਵਾਂ ਮੁਹੱਈਆ ਕਰਵਾਉਣਾ ਮੁਸ਼ਕਿਲ ਬਣਿਆ ਰਹਿ ਸਕਦਾ ਹੈ।
