ਓਡੀਸ਼ਾ ਦੇ ਤਟਾਂ ਨਾਲ ਟਕਰਾਇਆ ਚੱਕਰਵਾਤ ਯਾਸ, ਕੱਲ ਤੱਕ ਪਵੇਗਾ ਮੀਂਹ: ਆਈਐੱਮਡੀ

ਭਾਰਤ ਦੇ ਮੌਸਮ ਵਿਭਾਗ ਵੱਲੋਂ ਬੁੱਧਵਾਰ ਨੂੰ ਚੱਕਰਵਾਤ ਯਾਸ ਦੇ ਆ ਜਾਣ ਬਾਰੇ ਜਾਣਕਾਰੀ ਦਿੰਦਿਆਂ, ਮਛੇਰਿਆਂ ਨੂੰ ਸਮੁੰਦਰ ਵਿੱਚ ਨਾ ਜਾਣ ਦੀ ਸਲਾਹ ਦਿੱਤੀ ਗਈ ਹੈ।

ਭੁਵਨੇਸ਼ਵਰ ਵਿੱਚ ਮੌਸਮ ਵਿਭਾਗ ਦੇ ਵੱਡੇ ਵਿਗਿਆਨੀ ਉਮਾਸ਼ੰਕਰ ਦਾਸ ਨੇ ਆਖਿਆ,"ਚੱਕਰਵਾਤ ਯਾਸ ਤਟ ਨਾਲ ਟਕਰਾਅ ਚੁੱਕਾ ਹੈ। ਕੱਲ ਤੱਕ ਮੀਂਹ ਜਾਰੀ ਰਹੇਗਾ। ਮਛੇਰਿਆਂ ਨੂੰ ਕੱਲ ਸਵੇਰ ਤੱਕ ਕੰਮ 'ਤੇ ਨਾ ਜਾਣ ਦੀ ਸਲਾਹ ਦਿੱਤੀ ਜਾਂਦੀ ਹੈ ਕਿਉਂਕਿ ਸਮੁੰਦਰੀ ਹਾਲਾਤ ਬਹੁਤ ਖ਼ਤਰਨਾਕ ਹੋਣ ਵਾਲੇ ਹਨ।"

ਅੱਜ ਸਵੇਰੇ 9 ਵਜੇ ਇਹ ਧਾਮਰਾ ਅਤੇ ਬਲਾਸੋਰ ਤੱਟਾਂ ਨਾਲ ਟਕਰਾਇਆ। ਤੇਜ਼ ਰਫਤਾਰ ਹਵਾਵਾਂ ਨੇ ਕਈ ਦਰਖ਼ਤਾਂ ਨੂੰ ਜੜੋਂ ਪੁੱਟ ਦਿੱਤਾ ਅਤੇ ਸੂਬੇ ਦੇ ਕਈ ਹਿੱਸਿਆਂ ਵਿੱਚ ਪਾਣੀ ਆ ਗਿਆ।

ਆਈਐੱਮਡੀ ਦੇ ਜਨਰਲ ਨਿਰਦੇਸ਼ਕ ਮਰੁਤਯੂੰਜਯ ਮੋਹਾਪਾਤਰਾ ਨੇ ਵੀ ਪਹਿਲਾਂ ਆਖਿਆ ਹੈ ਕਿ ਇਹ ਚੱਕਰਵਾਤ ਕੱਲ ਸਵੇਰ ਤੱਕ ਝਾਰਖੰਡ ਪੁੱਜ ਸਕਦਾ ਹੈ।

ਸਪੈਸ਼ਲ ਰਿਲੀਫ਼ ਕਮਿਸ਼ਨਰ ਪੀਕੇ ਜੇਨਾ ਨੇ ਆਖਿਆ ਕਿ ਬੁੱਧਵਾਰ ਨੂੰ ਸਵੇਰੇ 9 ਵਜੇ, ਜਿਸ ਵੇਲੇ ਇਹ ਚੱਕਰਵਾਤ ਓਡੀਸ਼ਾ ਦੇ ਧਾਮਰਾ ਅਤੇ ਬਲਾਸੋਰ ਵਿਖੇ ਟਕਰਾਇਆ, ਤਾਂ ਲੈਂਡਫਾਲ ਵੇਲੇ ਹਵਾਵਾਂ ਅੰਦਾਜ਼ਨ 120-140 ਕਿਮੀ. ਪ੍ਰਤੀ ਘੰਟੇ ਡੀ ਰਫ਼ਤਾਰ ਨਾਲ ਚੱਲ ਰਹੀਆਂ ਸਨ।

ਤਕਰੀਬਨ ਦੁਪਹਿਰੇ 12:30 ਵਜੇ, ਆਈਐੱਮਡੀ ਨੇ ਜਾਣਕਾਰੀ ਦਿੰਦਿਆਂ ਆਖਿਆ ਕਿ ਚੱਕਰਵਾਤ ਉੱਤਰ-ਉੱਤਰਪੱਛਮ ਵੱਲ ਜਾਵੇਗਾ ਅਤੇ ਅਗਲੇ ਤਿੰਨ ਘੰਟਿਆਂ ਵਿੱਚ ਹੋਰ ਕਈ ਚੱਕਰਵਾਤਾਂ ਵਿੱਚ ਟੁੱਟ ਕੇ ਕਮਜ਼ੋਰ ਹੋ ਜਾਵੇਗਾ, ਅਤੇ 6 ਘੰਟਿਆਂ ਵਿੱਚ ਇੱਕ ਚੱਕਰਵਾਤੀ ਤੂਫ਼ਾਨ ਵਿੱਚ ਤਬਦੀਲ ਹੋ ਜਾਵੇਗਾ।