ਕੈਨੇਡਾ ਦੇ ਕੁਝ ਹਿੱਸਿਆਂ ਵਿਚ ਅੱਜ ਤੂਫਾਨ ਡੈਬੀ ਕਾਰਨ ਹੋਵੇਗੀ ਭਾਰੀ ਬਾਰਿਸ਼

ਪੂਰਬੀ ਕੈਨੇਡਾ ਦੇ ਕੁਝ ਹਿੱਸਿਆਂ ਵਿਚ ਅੱਜ ਤੂਫਾਨ ਡੈਬੀ ਕਾਰਨ 100 ਮਿਲੀਮੀਟਰ ਤੱਕ ਭਾਰੀ ਬਾਰਸ਼ ਹੋਵੇਗੀ, ਵਾਤਾਵਰਣ ਕੈਨੇਡਾ ਮੁਤਾਬਕ, ਗ੍ਰੇਟ ਲੇਕਸ ਦੇ ਉੱਪਰ ਇੱਕ ਹੋਰ ਘੱਟ ਦਬਾਅ ਵਾਲਾ ਸਿਸਟਮ ਬਣਿਆ ਹੈ, ਜੋ ਦੱਖਣੀ ਓਨਟਾਰੀਓ ਤੇ ਕਿਊਬੈਕ ਤੋਂ ਹੋ ਕੇ ਲੰਘ ਰਿਹਾ ਹੈ, ਇਸ ਕਾਰਨ ਓਨਟਾਰੀਓ ਦੇ ਸ਼ਹਿਰ ਕੋਰਨਰ ਤੇ ਕਿਊਬੈਕ ਸਿਟੀ ਵਿਚਕਾਰ ਪੈਂਦੇ ਇਲਾਕਿਆਂ ਲਈ ਅਚਾਨਕ ਹੜ੍ਹ ਦੇ ਖ਼ਤਰੇ ਬਾਰੇ ਅਲਰਟ ਅਤੇ ਚਿਤਾਵਨੀ ਜਾਰੀ ਕੀਤੀ ਗਈ ਹੈ।

ਮੌਸਮ ਏਜੰਸੀ ਨੇ ਇਹ ਵੀ ਚਿਤਾਵਨੀ ਦਿੱਤੀ ਹੈ ਕਿ ਕੁਝ ਜਗ੍ਹਾ ਮਾਮੂਲੀ ਜ਼ਮੀਨ ਖਿਸਕਣ ਦੀ ਸੰਭਾਵਨਾ ਵੀ ਹੈ। ਓਟਵਾ ਵਿਚ ਇਸ ਤੂਫਾਨ ਦਾ ਵਿਸ਼ੇਸ਼ ਤੌਰ ’ਤੇ ਜ਼ਿਆਦਾ ਪ੍ਰਭਾਵ ਪੈਣ ਦਾ ਅਨੁਮਾਨ ਹੈ, ਜਿੱਥੇ ਸ਼ੁੱਕਰਵਾਰ ਨੂੰ 50 ਤੋਂ ਮਿਲੀਮੀਟਰ ਬਾਰਸ਼ ਹੋਣ ਦੀ ਸੰਭਾਵਨਾ ਜਤਾਈ ਗਈ ਹੈ।

ਉੱਥੇ ਹੀ, ਟੋਰਾਂਟੋ ਵਿਚ ਸਵੇਰ ਤੋਂ ਦੁਪਹਿਰ ਤੱਕ ਕਰੀਬ 30-ਮਿਲੀਮੀਟਰ ਬਾਰਸ਼ ਦੀ ਭਵਿੱਖਬਾਣੀ ਕੀਤੀ ਗਈ ਸੀ। ਮੌਸਮ ਏਜੰਸੀ ਮੁਤਾਬਕ, ਤੂਫਾਨ ਡੈਬੀ ਜਾਂਦਾ-ਜਾਂਦਾ ਰਾਤ ਨੂੰ ਨਿਊ ਬਰੰਜ਼ਵਿਕ ਵਿਚ ਦਸਤਕ ਦੇ ਸਕਦਾ ਹੈ, ਜਿਸ ਦੇ ਚਲਦੇ ਸੂਬੇ ਵਿਚ ਸ਼ਨੀਵਾਰ ਸਵੇਰ ਤੱਕ 40 ਮਿਲੀਮੀਟਰ ਬਾਰਸ਼ ਹੋ ਸਕਦੀ ਹੈ।