18.71C Vancouver 18.71C VancouverMay 19, 2021 9:38 PM -
ਸਰੀ ਆਰ.ਸੀ.ਐਮ.ਪੀ. ਦਾ ਕਹਿਣਾ ਹੈ ਕਿ ਗੈਂਗ ਸੰਬੰਧੀ ਜੀਵਨ ਵੱਲ ਆਕਰਸ਼ਿਤ ਹੋਣ ਵਾਲੇ ਲੋਕਾਂ ਦੀਆਂ ਅੱਖਾਂ ਖੋਲ੍ਹਣ ਵਾਲੀ ਘਟਨਾ ਦਾ ਖੁਲਾਸਾ ਹੋਇਆ ਹੈ।
ਪੁਲਿਸ ਦਾ ਕਹਿਣਾ ਹੈ ਕਿ 14 ਮਈ ਨੂੰ ਸ਼ਾਮ ਕਰੀਬ 7.30 ਵਜੇ ਸਰੀ ਆਰ.ਸੀ.ਐਮ.ਪੀ. ਕਮਿਊਨਿਟੀ ਰਿਸਪੈਂਡ ਯੂਨਿਟ ਨੇ ਇੱਕ ਰੈਂਟਲ ਵਾਹਨ ਨੂੰ 16 ਐਵੀਨਿਊ ਦੇ 15200 ਬਲੌਕ ਦੇ ਕੋਲ ਰੋਕਿਆ ਸੀ।
ਇਸ ਵਾਹਨ ਨੂੰ ਬੀ.ਸੀ. ਮੋਟਰ ਵਹੀਕਲ ਐਕਟ ਦੇ ਉਲੰਘਣ ਤਹਿਤ ਰੋਕਿਆ ਗਿਆ ਸੀ।
ਜਦ ਵਾਹਨ ਚਾਲਕ ਤੋਂ ਪੁੱਛਗਿੱਛ ਹੋਈ ਤਾਂ ਡਰੱਗਸ ਸੰਬੰਧੀ ਸ਼ੱਕ ਹੋਇਆ।
ਵਾਹਨ ਚਾਲਕ ਅਤੇ ਸਵਾਰੀ ਨੂੰ ਹਿਰਾਸਤ 'ਚ ਲਿਆ ਗਿਆ।
ਵਧੇਰੇ ਜਾਂਚ ਦੌਰਾਨ ਪਹਿਲਾਂ ਕਈ ਸੈਲ ਫੋਨ ਮਿਲੇ ਅਤੇ ਫਿਰ ਵਿਅਕਤੀਆਂ ਦੀ ਤਲਾਸ਼ੀ ਲਈ ਤਾਂ ਗੱਡੀ ਦੀ ਸਵਾਰੀ ਦੇ ਰੈਕਟਮ ਤੋਂ ਵੱਡੀ ਮਾਤਰਾ 'ਚ ਡਰੱਗਸ ਵਾਲਾ ਇੱਕ ਪੈਕਿਟ ਮਿਲਿਆ।
ਇਸ 'ਚ ਸ਼ੱਕੀ ਕਰੈਕ ਕੋਕੇਨ ਅਤੇ ਕੋਕੇਨ ਪਾਊਡਰ ਸੀ।
ਇਸ ਸ਼ੱਕੀ ਕਰੈਕ ਕੋਕੇਨ ਦਾ ਕੁੱਲ ਭਰ 9.05 ਗ੍ਰਾਮ ਸੀ।
ਸ਼ੱਕੀ ਪਾਊਡਰ ਕੋਕੇਨ ਦਾ ਭਾਰ 14.05 ਗ੍ਰਾਮ ਸੀ।
ਦੋਵਾਂ ਸ਼ੱਕੀਆਂ ਨੂੰ ਵਧੇਰੇ ਜਾਂਚ ਦੇ ਚਲਦਿਆਂ ਰਿਹਾਅ ਕਰ ਦਿੱਤਾ ਗਿਆ ਸੀ।
ਕਾਂਸਟੇਬਲ ਸਰਬਜੀਤ ਸੰਘਾ ਨੇ ਕਿਹਾ ਕਿ ਸੋਸ਼ਲ ਮੀਡੀਆ 'ਤੇ ਗੈਂਗ ਮੈਂਬਰ ਖੁਦ ਨੂੰ ਬੜੇ ਐਸ਼ ਭਰੇ ਜੀਵਨ ਬਤੀਤ ਕਰਦੇ ਦਰਸ਼ਾਉਂਦੇ ਹਨ ਪਰ ਉਨ੍ਹਾਂ ਕਿਹਾ ਕਿ ਕਿਸੇ ਵਿਅਕਤੀ ਦੇ ਰੈਕਟਮ 'ਚ ਡਰੱਗਸ ਦੇ ਪੈਕਟ ਮਿਲਣ ਤੋਂ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ ਕਿ ਇਹ ਜੀਵਨ ਕਿਸ ਪ੍ਰਕਾਰ ਦਾ ਹੈ।
ਉਨ੍ਹਾਂ ਕਿਹਾ ਕਿ ਅਜਿਹੇ ਲੋਕ ਹਰ ਵੇਲੇ ਕਿਸੇ ਵਿਰੋਧੀ ਗੈਂਗ ਜਾਂ ਪੁਲਿਸ ਦੇ ਅੜਿੱਕੇ ਚੜ੍ਹਨ ਦੇ ਡਰ 'ਚ ਜਿਉਂਦੇ ਹਨ।
