ਟੋਰਾਂਟੋ ’ਚ ਹਮਲੇ ਦੀ ਸਾਜ਼ਿਸ਼ ’ਚ ਕੈਨੇਡੀਅਨ ਪਿਓ ਪੁੱਤ ਗ੍ਰਿਫਤਾਰ, ਲੱਗੇ ਗੰਭੀਰ ਦੋਸ਼

ਕੈਨੇਡੀਅਨ ਪੁਲਿਸ ਨੇ ਆਈ.ਐੱਸ.ਆਈ.ਐੱਸ. ਲਈ ਟੋਰਾਂਟੋ ਵਿਚ ਵੱਡੇ ਪੱਧਰ ’ਤੇ ਹਿੰਸਕ ਹਮਲੇ ਦੀ ਯੋਜਨਾ ਬਣਾ ਰਹੇ ਟੋਰਾਂਟੋ ਦੇ ਇੱਕ ਪਿਓ-ਪੁੱਤ ’ਤੇ ਅੱਤਵਾਦ ਦੇ ਚਾਰਜਿਜ਼ ਲਗਾਏ ਹਨ। 62 ਸਾਲਾ ਅਹਿਮਦ ਫੁਆਦ ਮੁਸਤਫਾ ਅਲਦੀਦੀ ਅਤੇ ਉਸ ਦੇ 26 ਸਾਲਾ ਪੁੱਤ ਮੁਸਤਫਾ ਅਲਦੀਦੀ ਨੂੰ ਆਰ.ਸੀ.ਐੱਮ.ਪੀ. ਨੇ ਲੰਘੇ ਐਤਵਾਰ ਸੂਹ ਮਿਲਣ ’ਤੇ ਰਿਚਮੰਡ ਹਿੱਲ ਦੇ ਇੱਕ ਹੋਟਲ ਤੋਂ ਗ੍ਰਿਫਤਾਰ ਕੀਤਾ।

ਪਿਓ ’ਤੇ ਜੂਨ 2015 ਵਿਚ ਆਈ.ਐੱਸ.ਆਈ.ਐੱਸ. ਲਈ ਕੈਨੇਡਾ ਤੋਂ ਬਾਹਰ ਇੱਕ ਗੰਭੀਰ ਹਮਲੇ ਦਾ ਵੀ ਆਰੋਪ ਹੈ ਪਰ ਇਸ ਬਾਰੇ ਵਧੇਰੇ ਜਾਣਕਾਰੀ ਨਹੀਂ ਦਿੱਤੀ ਗਈ। ਪੁਲਿਸ ਨੇ ਦੱਸਿਆ ਕਿ ਦੋਵੇਂ ਕੈਨੇਡੀਅਨ ਸਿਟੀਜਨ ਹਨ।

ਟੋਰਾਂਟੋ ਦੀਏਕੀਕ੍ਰਿਤ ਰਾਸ਼ਟਰੀ ਸੁਰੱਖਿਆ ਇਨਫੋਰਸਮੈਂਟ ਟੀਮ ਦੇ ਅਧਿਕਾਰੀ ਇੰਚਾਰਜ ਜੇਮਸ ਪਾਰ ਨੇ ਕਿਹਾ ਕਿ ਅਸੀਂ ਅਜੇ ਇਹ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਾਂ ਕਿ ਇਸ ਹਮਲੇ ਦੇ ਟਾਰਗੈੱਟ ’ਤੇ ਕੌਣ ਕੌਣ ਸਨ।

ਕੈਨੇਡੀਅਨ ਸੁਰੱਖਿਆ ਖੁਫੀਆ ਸੇਵਾ ਅਤੇ ਲੋਕਲ ਪੁਲਿਸ ਏਜੰਸੀ ਨੇ ਹਮਲੇ ਦੀ ਸਾਜ਼ਸ਼ ਨੂੰ ਨਾਕਾਮ ਕਰਨ ਵਿਚ ਅਹਿਮ ਭੂਮਿਕਾ ਨਿਭਾਈ। ਕੈਨੇਡਾ ਵਿਚ ਸਾਲ 2014 ਤੋਂ ਹੁਣ ਤੱਕ ਆਈ.ਐੱਸ.ਆਈ.ਐੱਸ. ਨਾਲ ਸਬੰਧਤ 8 ਹਮਲੇ ਹੋ ਚੁੱਕੇ ਹਨ।

ਇਨ੍ਹਾਂ ਵਿਚ ਟੋਰਾਂਟੋ ਕੈਨੇਡੀਅਨ ਟਾਇਰ ਅਤੇ ਮਿਸੀਸਾਗਾ ਦੇ ਇੱਕ ਟੇਕਆਊਟ ਰੈਸਟੋਰੈਂਟ ’ਤੇ ਹੋਇਆ ਹਮਲਾ ਅਤੇ ਅਪ੍ਰੈਲ 2023 ਵਿਚ ਸਰੀ ਵਿਚ ਇੱਕ ਬੱਸ ਸਵਾਰ ਦੇ ਮਾਰੇ ਗਏ ਚਾਕੂ ਦੀਆਂ ਘਟਾਨਵਾਂ ਪ੍ਰਮੁੱਖ ਹਨ।