ਹਾਊਸਿੰਗ ਸੰਕਟ ਨਾਲ ਨਜਿੱਠਣ ਲਈ ਫੈਡਰਲ ਸਰਕਾਰ ਖਰਚ ਕਰਨ ਜਾ ਰਹੀ ਹੈ ਬਿਲੀਅਨ ਡਾਲਰ

ਕੈਨੇਡਾ ਵਿਚ ਹਾਊਸਿੰਗ ਸੰਕਟ ਨਾਲ ਨਜਿੱਠਣ ਲਈ ਫੈਡਰਲ ਸਰਕਾਰ 30,000 ਨਵੇਂ ਅਪਾਰਟਮੈਂਟ ਅਤੇ ਵਧੇਰੇ ਕਿਰਾਏ ਯੂਨਿਟਸ ਲਈ ਬਿਲੀਅਨ ਡਾਲਰ ਖ਼ਰਚ ਕਰਨ ਜਾ ਰਹੀ ਹੈ।

ਪ੍ਰਧਾਨ ਮੰਤਰੀ ਜਸਟਿਨ ਨੇ ਅੱਜ ਘੋਸ਼ਣਾ ਕੀਤੀ ਹੈ ਕਿ ਅਪਾਰਟਮੈਂਟ ਨਿਰਮਾਣ ਲੋਨ ਪ੍ਰੋਗਰਾਮ ਲਈ ਬਜਟ ਵਿਚ $15 ਬਿਲੀਅਨ ਦੀ ਹੋਰ ਫੰਡਿੰਗ ਸ਼ਾਮਲ ਕੀਤੀ ਜਾ ਰਹੀ ਹੈ, ਜਿਸ ਤਹਿਤ ਅਗਲੇ 10 ਸਾਲਾਂ ਵਿਚ 30,000 ਵਧੇਰੇ ਅਪਾਰਟਮੈਂਟ ਬਣਾਉਣ ਵਿਚ ਮਦਦ ਮਿਲੇਗੀ। ਇਹ ਫੰਡਿੰਗ ਘਰ ਬਣਾਉਣ ਵਾਲਿਆਂ ਨੂੰ ਘੱਟ ਲਾਗਤ ਵਾਲੇ ਵਿੱਤ ਦੇਣ ਲਈ ਵਰਤੀ ਜਾਵੇਗੀ। ਉਨ੍ਹਾਂ ਲਈ ਕਰਜ਼ੇ ਦੀਆਂ ਸ਼ਰਤਾਂ ਨੂੰ ਵਧਾਇਆ ਜਾ ਰਿਹਾ ਹੈ, ਨਾਲ ਹੀ ਵਿਦਿਆਰਥੀਆਂ ਅਤੇ ਸੀਨੀਅਰਾਂ ਲਈ ਘਰਾਂ ਵਾਸਤੇ ਵਿੱਤੀ ਸੁਵਿਧਾ ਦਿੱਤੀ ਜਾਵੇਗੀ।

ਇਸ ਦੇ ਨਾਲ ਹੀ ਫੈਡਰਲ ਸਰਕਾਰ ਕੈਨੇਡਾ ਭਰ ਵਿਚ ਕਿਰਾਏ ਦੇ ਵਧੇਰੇ ਮਕਾਨ ਬਣਾਉਣ ਵਿਚ ਮਦਦ ਕਰਨ ਲਈ ਇੱਕ ਨਵਾਂ ਪ੍ਰੋਗਰਾਮ ਕੈਨੇਡਾ ਬਿਲਡ ਸ਼ੁਰੂ ਕਰ ਰਹੀ ਹੈ, ਇਸ ਪ੍ਰੋਗਰਾਮ ਤਹਿਤ ਫੈਡਰਲ ਸਰਕਾਰ ਕੁਝ ਸ਼ਰਤਾਂ ਤਹਿਤ ਸੂਬਿਆਂ ਨਾਲ ਸਾਂਝੇਦਾਰੀ ਕਰੇਗੀ ਅਤੇ ਉਨ੍ਹਾਂ ਨੂੰ ਸਸਤਾ ਲੋਨ ਦੇਵੇਗੀ।

ਇਸ ਫੰਡਿੰਗ ਤੱਕ ਪਹੁੰਚ ਲਈ ਸੂਬਿਆਂ ਨੂੰ ਸਰਕਾਰੀ ਅਤੇ ਖਾਲੀ ਜ਼ਮੀਨਾਂ ’ਤੇ ਘਰਾਂ ਦੇ ਨਿਰਮਾਣ ਦੀ ਯੋਜਨਾ ਬਣਾਉਣੀ ਹੋਵੇਗੀ ਅਤੇ ਵਿਕਾਸ ਦੀ ਪ੍ਰਵਾਨਗੀ ਦੀ ਸਮਾਂ-ਸੀਮਾ ਨੂੰ 12 ਤੋਂ 18 ਮਹੀਨਿਆਂ ਤੋਂ ਘੱਟ ਕਰਨਾ ਹੋਵੇਗਾ।