ਕੈਨੇਡੀਅਨ ਫੌਜ ਲਈ 190 ਨਵੇਂ ਬਖਤਰਬੰਦ ਵਾਹਨ ਖਰੀਦੇਗੀ ਫੈਡਰਲ ਸਰਕਾਰ, $2 ਬਿਲੀਅਨ ਦੇ ਸਮਝੌਤੇ ਦਾ ਐਲਾਨ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਕੈਨੇਡੀਅਨ ਆਰਮੀ ਦੀ ਜੰਗੀ ਸਮਰੱਥਾ ਨੂੰ ਮਜ਼ਬੂਤ ਕਰਨ ਅਤੇ ਘਰੇਲੂ ਡਿਫੈਂਸ ਉਦਯੋਗ ਨੂੰ ਹੁਲਾਰਾ ਦੇਣ ਲਈ ਓਨਟਾਰੀਓ-ਆਧਾਰਿਤ ਨਿਰਮਾਤਾ ਕੰਪਨੀ ਤੋਂ 190 armoured vehicles ਖਰੀਦੇ ਜਾਣ ਦਾ ਐਲਾਨ ਕੀਤਾ ਹੈ। ਇਸ 4 ਸਾਲਾ ਡੀਲ ਤਹਿਤ ਫੈਡਰਲ ਸਰਕਾਰ ਵਲੋਂ $2 ਬਿਲੀਅਨ ਖ਼ਰਚ ਕਰਨ ਜਾ ਰਹੀ ਹੈ। ਇਸ ਨਵੇਂ ਫਲੀਟ ਨਾਲ ਫੌਜ ਦੇ ਬਖਤਰਬੰਦ ਵਾਹਨਾਂ ਦੀ ਕੁੱਲ ਗਿਣਤੀ ਵਧ ਕੇ 550 ਹੋ ਜਾਵੇਗੀ।

ਪ੍ਰਧਾਨ ਮੰਤਰੀ ਕਾਰਨੀ ਨੇ ਵੀਰਵਾਰ ਨੂੰ ਓਨਟਾਰੀਓ ਦੇ ਲੰਡਨ ਸਥਿਤ ਗਲੋਬਲ ਡਿਫੈਂਸ ਕੰਟਰੈਕਟਰ ਜਨਰਲ ਡਾਇਨਾਮਿਕਸ ਦੇ ਕੈਨੇਡੀਅਨ ਕੈਂਪਸ ਦਾ ਦੌਰਾ ਕਰਕੇ ਇਸ ਸਮਝੌਤੇ 'ਤੇ ਅਧਿਕਾਰਤ ਮੋਹਰ ਲਗਾਈ। ਪ੍ਰਧਾਨ ਮੰਤਰੀ ਨੇ ਵਿਸ਼ੇਸ਼ ਤੌਰ 'ਤੇ ਸਪੱਸ਼ਟ ਕੀਤਾ ਕਿ ਇਸ ਡੀਲ ਤਹਿਤ ਹਰ ਇੱਕ ਵਾਹਨ ਕੰਪਨੀ ਦੀ ਓਨਟਾਰੀਓ ਸਥਿਤ ਫੈਕਟਰੀ ਵਿਚ ਹੀ ਬਣਾਇਆ ਜਾਵੇਗਾ।

ਇਸ ਦੇ ਨਾਲ ਹੀ ਇਨ੍ਹਾਂ ਵਾਹਨਾਂ ਨੂੰ ਤਿਆਰ ਕਰਨ ਲਈ ਵਰਤੇ ਜਾਣ ਵਾਲੇ parts ਦੇਸ਼ ਭਰ ਦੇ ਵੱਖ-ਵੱਖ ਕੈਨੇਡੀਅਨ ਸਪਲਾਇਰ ਤੋਂ ਹੀ ਸੋਰਸ ਕੀਤੇ ਜਾਣਗੇ, ਜਿਸ ਨਾਲ ਦੇਸ਼ ਦੇ ਅੰਦਰ ਰੁਜ਼ਗਾਰ ਦੇ ਵੱਡੇ ਮੌਕੇ ਪੈਦਾ ਹੋਣਗੇ। ਪ੍ਰਧਾਨ ਮੰਤਰੀ ਮੁਤਾਬਕ, ਇਸ ਰਣਨੀਤੀ ਦਾ ਮਕਸਦ ਵਿਦੇਸ਼ੀ ਨਿਰਭਰਤਾ ਨੂੰ ਘਟਾਉਣਾ ਅਤੇ ਜਿੱਥੋਂ ਤੱਕ ਸੰਭਵ ਹੋ ਸਕੇ ਘਰੇਲੂ ਸਪਲਾਇਰ ਦੀ ਵਰਤੋਂ ਕਰਕੇ ਕੈਨੇਡਾ ਦੀਆਂ ਰਾਸ਼ਟਰੀ ਸੁਰੱਖਿਆ ਸਮਰੱਥਾਵਾਂ ਨੂੰ ਮਜ਼ਬੂਤ ਕਰਨਾ ਹੈ।