ਫੈਡਰਲ ਸਰਕਾਰ ਵਲੋਂ ਫੋਰਡ ਦੇ ਓਕਵਿੱਲ ਪਲਾਂਟ ਵਿਖੇ ਇਲੈਕਟ੍ਰਿਕ ਵਾਹਨਾਂ ਦੇ ਨਿਰਮਾਣ ਲਈ ਕਈ ਮਿਲੀਅਨ ਦੇ ਨਿਵੇਸ਼ ਦਾ ਐਲਾਨ

ਫੈਡਰਲ ਅਤੇ ਔਂਟੈਰਿਓ ਸਰਕਾਰ ਓਕਵਿੱਲ ਦੇ ਫੋਰਡ ਕੰਪਨੀ ਦੇ ਪਲਾਂਟ ਵਿਖੇ ਇਲੈਕਟ੍ਰਿਕ ਵਾਹਨਾਂ ਦੇ ਵੱਡੀ ਗਿਣਤੀ ਵਿੱਚ ਨਿਰਮਾਣ ਲਈ $295 ਮਿਲੀਅਨ ਦਾ ਨਿਵੇਸ਼ ਕਰਨ ਜਾ ਰਹੀ ਹੈ।

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵੱਲੋਂ ਅੱਜ ਇਸ ਸਬੰਧ ਵਿੱਚ ਐਲਾਨ ਕੀਤਾ ਜਾਵੇਗਾ।

ਇਹ ਘੋਸ਼ਣਾ ਪਿਛਲੇ ਮਹੀਨੇ ਆਟੋਮੇਕਰ ਕੰਪਨੀ ਅਤੇ ਉੱਥੇ ਕੰਮ ਕਰਨ ਵਾਲੇ ਮੁਲਾਜ਼ਮਾਂ ਦੀ ਨੁਮਾਇੰਦਗੀ ਕਰਦੀ ਯੂਨੀਅਨ, ਯੂਨੀਫੋਰ ਵਿਚਕਾਰ ਐਲਾਨੇ ਗਏ ਉਸ 3 ਸਾਲਾ ਸਮਝੌਤੇ ਅਧੀਨ ਆਉਂਦੀ ਹੈ ਜਿਸ ਵਿੱਚ $2 ਬਿਲੀਅਨ ਦਾ ਨਿਵੇਸ਼ ਕਰਨ ਦੀ ਗੱਲ ਸਾਂਝੀ ਕੀਤੀ ਗਈ ਸੀ।

ਓਕਵਿੱਲ ਦੇ ਫੋਰਡ ਪਲਾਂਟ ਵਿੱਚ 3,400 ਮੁਲਾਜ਼ਮ ਕੰਮ ਕਰਦੇ ਹਨ ਅਤੇ ਯੂਨੀਫੋਰ ਦੇ ਪ੍ਰੈਸੀਡੈਂਟ, ਜੈਰੀ ਡਿਆਜ਼ ਮੁਤਾਬਕ ਇੱਥੇ ਇਲੈਕਟ੍ਰਿਕ ਵਾਹਨਾਂ ਦੇ ਨਿਰਮਾਣ ਨਾਲ ਇਨ੍ਹਾਂ ਵਿੱਚੋਂ 3,000 ਨੌਕਰੀਆਂ ਬਚਾਈਆਂ ਜਾ ਸਕਣਗੀਆਂ।

ਜੇ ਲਿਬਰਲ ਸਰਕਾਰ ਦੇ ਨਜ਼ਰੀਏ ਤੋਂ ਦੇਖਿਆ ਜਾਵੇ ਤਾਂ ਇਸ ਕਦਮ ਨਾਲ ਨਾ ਸਿਰਫ ਵਧੀਆ ਆਮਦਨੀ ਵਾਲੀਆਂ ਨੌਕਰੀਆਂ ਬਚਾਈਆਂ ਜਾ ਸਕਣਗੀਆਂ ਬਲਕਿ ਆਟੋ ਸੈਕਟਰ ਨੂੰ ਵੀ ਹੁੰਗਾਰਾ ਮਿਲੇਗਾ।

ਇਹ ਐਲਾਨ ਲਿਬਰਲ ਸਰਕਾਰ ਵਲੋਂ ਸਾਫ ਰੀਨਿਊਏਬਲ ਐਨਰਜੀ ਵਿੱਚ ਨਿਵੇਸ਼ ਅਤੇ 2050 ਤੱਕ ਜ਼ੀਰੋ ਕਾਰਬਨ ਐਮਿਸ਼ਨ ਦੇ ਟੀਚੇ ਹੇਠ ਵੀ ਆਉਂਦਾ ਹੈ।

ਸਰਕਾਰ ਵੱਲੋਂ ਪਹਿਲਾਂ ਹੀ ਦੇਸ਼ ਭਰ ਦੇ ਵਿੱਚ ਇਲੈਕਟ੍ਰਿਕ ਵਾਹਨਾਂ ਲਈ ਫਾਸਟ ਚਾਰਜਿੰਗ ਸਟੇਸ਼ਨਾਂ ਉੱਤੇ $300 ਮਿਲੀਅਨ ਖ਼ਰਚਣ ਦਾ ਵਾਅਦਾ ਕੀਤਾ ਜਾ ਚੁੱਕਾ ਹੈ।

ਇਲੈਕਟ੍ਰਿਕ ਜਾਂ ਹਾਈਬ੍ਰਿਡ ਵਾਹਨ ਖਰੀਦਣ ਲਈ ਲੋਕਾਂ ਨੂੰ ਉਤਸ਼ਾਹਤ ਕਰਨ ਵਾਸਤੇ $5,000 ਤੱਕ ਦੀ ਛੋਟ ਵੀ ਸਰਕਾਰ ਵਲੋਂ ਦਿੱਤੀ ਜਾ ਰਹੀ ਹੈ।