11.47C Vancouver 11.47C VancouverNov 3, 2023 5:29 PM - The Canadian Press
ਕੈਨੇਡਾ ਪੈਨਸ਼ਨ ਯੋਜਨਾ ਨੂੰ ਛੱਡਣ ਦੇ ਅਲਬਰਟਾ ਦੇ ਪ੍ਰਸਤਾਵ 'ਤੇ ਚਰਚਾ ਲਈ ਅੱਜ ਦੇਸ਼ ਭਰ ਦੇ ਵਿੱਤ ਮੰਤਰੀਆਂ ਦੀ ਫੈਡਰਲ ਵਿੱਤ ਮੰਤਰੀ ਕ੍ਰਿਸਟੀਆ ਫ੍ਰੀਲੈਂਡ ਨਾਲ ਵਰਚੁਅਲ ਮੀਟਿੰਗ ਹੋ ਰਹੀ ਹੈ।
ਸੂਬੇ ਦਾ ਕਹਿਣਾ ਸੀ ਅਲਬਰਟਾ ਦੇ ਸੀਪੀਪੀ ਵਿੱਚੋਂ ਬਾਹਰ ਹੋਣ ਨਾਲ ਕੈਨੇਡਾ ਭਰ ਦੇ ਪੈਨਸ਼ਨਰ ਨੂੰ ਨੁਕਸਾਨ ਹੋ ਸਕਦਾ ਹੈ।
ਇਸ ਤਰ੍ਹਾਂ ਦੀ ਚਿੰਤਾ ਖੁਦ ਫ੍ਰੀਲੈਂਡ ਅਤੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵੀ ਜਤਾ ਚੁੱਕੇ ਹਨ ਪਰ ਅਲਬਰਟਾ ਆਪਣੇ ਪਲੈਨ 'ਤੇ ਕਾਇਮ ਹੈ ਅਤੇ ਸ਼ੁੱਕਰਵਾਰ ਦੀ ਮੀਟਿੰਗ ਵਿੱਚ ਆਪਣਾ ਪੱਖ ਰੱਖੇਗਾ।
ਹਾਲ ਹੀ ਵਿੱਚ ਫੈਡਰਲ ਵਿੱਤ ਮੰਤਰੀ ਨੇ ਪ੍ਰੀਮੀਅਰ ਡੈਨੀਅਲ ਸਮਿਥ ਨੂੰ ਲਿਖੇ ਪੱਤਰ ਵਿੱਚ ਸੂਬੇ ਵਲੋਂ ਸੀ.ਪੀ.ਪੀ. ਵਿੱਚੋਂ ਨਿਕਲਣ ਲਈ ਲਗਾਏ ਗਏ ਹਿਸਾਬ-ਕਿਤਾਬ ਨੂੰ ਲੈ ਕੇ ਸਵਾਲ ਖੜ੍ਹੇ ਕੀਤੇ ਹਨ।
ਉਨ੍ਹਾਂ ਦਾ ਕਹਿਣਾ ਸੀ ਕਿ ਸੂਬੇ ਦਾ ਐਗਜ਼ਿਟ ਫਾਰਮੂਲਾ ਸਹੀ ਨਹੀਂ ਕਿਉਂਕਿ ਜੇ ਇਹ ਫਾਰਮੂਲਾ ਅਲਬਰਟਾ ਦੇ ਨਾਲ-ਨਾਲ ਓਨਟੇਰਿਓ ਅਤੇ ਬ੍ਰਿਟਿਸ਼ ਕੋਲੰਬੀਆ ਵੀ ਲਾਗੂ ਕਰਦੇ ਹਨ ਤਾਂ ਸੀ. ਪੀ. ਪੀ. ਵਿੱਚ 128 ਫੀਸਦੀ ਹਿੱਸੇਦਾਰੀ ਤਾਂ ਇਨ੍ਹਾਂ ਤਿੰਨ ਸੂਬਿਆਂ ਦੀ ਹੀ ਹੋਵੇਗੀ।
ਹੁਣ ਦੇਖਣਾ ਇਹ ਹੋਵੇਗਾ ਕਿ ਹੋਰ ਸੂਬਿਆਂ ਤੋਂ ਅਲਬਰਟਾ ਨੂੰ ਕਿੰਨਾ ਸਾਥ ਮਿਲਦਾ ਹੈ।
ਅਲਬਰਟਾ ਦੇ ਵਿੱਤ ਮੰਤਰੀ ਨੇਟ ਹਾਰਨਰ ਦਾ ਕਹਿਣਾ ਸੀ ਕਿ ਉਹ ਇਸ ਮੀਟਿੰਗ ਵਿੱਚ ਪੈਨਸ਼ਨ ਮੁੱਦੇ ਦੇ ਨਾਲ-ਨਾਲ ਅੰਤਰ-ਸਰਕਾਰੀ ਵਿਵਾਦ ਅਤੇ ਫੈਡਰਲ ਕਾਰਬਨ ਟੈਕਸ 'ਤੇ ਵੀ ਚਰਚਾ ਹੋਣ ਦੀ ਉਮੀਦ ਕਰਦੇ ਹਨ।
ਗੌਰਤਲਬ ਹੈ ਕਿ ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ 2025 ਵਿੱਚ ਸੀ. ਪੀ. ਪੀ. ਛੱਡਣ ਬਾਰੇ ਜਨਮਤ ਕਰਵਾਉਣ ਦੀ ਯੋਜਨਾ ਬਣਾਈ ਸੀ ਪਰ ਹੁਣ ਉਹ ਕਹਿੰਦੇ ਹਨ ਕਿ ਉਹ ਇਸ ਨੂੰ ਉਦੋਂ ਤੱਕ ਨਹੀਂ ਕਰਵਾਉਣਗੇ ਜਦੋਂ ਤੱਕ ਫੈਡਰਲ ਸਰਕਾਰ ਜਾਂ ਅਦਾਲਤਾਂ ਇਸ ਗੱਲ 'ਤੇ ਸਪੱਸ਼ਟ ਨੰਬਰ ਨਹੀਂ ਦਿੰਦੀਆਂ ਕਿ ਜੇ ਸੂਬਾ ਸੀ. ਪੀ. ਪੀ. ਛੱਡਦਾ ਹੈ ਤਾਂ ਐਲਬਰਟਾ ਨੂੰ ਕਿੰਨਾ ਹਿੱਸਾ ਮਿਲੇਗਾ।
