ਆਰਗੇਨਾਈਜ਼ਡ ਕ੍ਰਾਈਮ ਨਾਲ ਜੁੜੇ ਬੱਚਿਆਂ ਦੇ ਜਿਨਸੀ ਸ਼ੋਸ਼ਣ ਦੇ ਮਾਮਲੇ ਵਧ ਰਹੇ ਹਨ: ਫਿਨਟ੍ਰੈਕ

ਕੈਨੇਡਾ ਦੀ ਵਿੱਤੀ ਖੁਫੀਆ ਏਜੰਸੀ ਨੇ ਚਿਤਾਵਨੀ ਦਿੱਤੀ ਹੈ ਕਿ ਪੈਸੇ ਲਈ ਬੱਚਿਆਂ ਨਾਲ ਸੰਬੰਧਿਤ ਜਿਨਸੀ ਸ਼ੋਸ਼ਣ ਦੇ ਮਾਮਲਿਆਂ ਵਿਚ ਵਾਧਾ ਹੋ ਰਿਹਾ ਹੈ ਅਤੇ ਇਨ੍ਹਾਂ ਦੀਆਂ ਤਾਰਾਂ ਅਕਸਰ ਸੰਗਠਿਤ ਅਪਰਾਧ ਨਾਲ ਜੁੜੀਆਂ ਹੁੰਦੀਆਂ ਹਨ। ਏਜੰਸੀ ਨੇ ਕਿਹਾ ਕਿ ਇਸ ਕਿਸਮ ਦੀ ਫਿਰੌਤੀ ਵਿਚ ਔਨਲਾਈਨ ਜ਼ਰੀਏ ਪੀੜਤਾਂ ਨੂੰ ਉਨ੍ਹਾਂ ਦੀਆਂ ਜਿਨਸੀ ਤਸਵੀਰਾਂ ਜਾਂ ਵੀਡੀਓਜ਼ ਵਾਇਰਲ ਕਰਨ ਲਈ ਬਲੈਕਮੇਲ ਕੀਤਾ ਜਾਂਦਾ ਹੈ।

FINTRAC ਯਾਨੀ ਫਾਇਨੈਂਸ਼ਲ ਟ੍ਰਾਂਜ਼ੈਕਸ਼ਨਜ਼ ਐਂਡ ਰਿਪੋਰਟਸ ਐਨਾਲਿਸਿਸ ਸੈਂਟਰ ਆਫ ਕੈਨੇਡਾ ਨੇ ਨਵੀਂ ਪਬਲਿਸ਼ ਚਿਤਾਵਨੀ ਵਿਚ ਬੈਂਕਾਂ ਅਤੇ ਹੋਰ ਕਾਰੋਬਾਰਾਂ ਨੂੰ ਸਲਾਹ ਦਿੱਤੀ ਹੈ ਕਿ ਉਹ ਉਨ੍ਹਾਂ ਖਾਸ ਲੈਣ-ਦੇਣ ਅਤੇ ਪੈਟਰਨ 'ਤੇ ਨਜ਼ਰ ਰੱਖਣ ਜੋ ਫਿਰੌਤੀ ਜਾਂ ਬਾਲ ਜਿਨਸੀ ਸ਼ੋਸ਼ਣ ਵੱਲ ਇਸ਼ਾਰਾ ਕਰਦੇ ਹਨ।

FINTRAC ਹਰ ਸਾਲ ਬੈਂਕਾਂ,ਇੰਸ਼ੋਰੈਂਸ ਕੰਪਨੀਆਂ,ਸਕਿਓਰਿਟੀ ਡੀਲਰਜ਼ ਤੇ ਮਨੀ ਸਰਵਿਸਸ ਬਿਜ਼ਨਸ,ਰੀਅਲ ਅਸਟੇਟ ਬ੍ਰੋਕਰਜ਼,ਕੈਸੀਨੋ ਅਤੇ ਹੋਰ ਕੰਪਨੀਆਂ ਤੋਂ ਮਿਲੀ ਲੱਖਾਂ ਦੇ ਲੈਣ-ਦੇਣ ਦੀ ਜਾਣਕਾਰੀ ਦਾ ਵਿਸ਼ਲੇਸ਼ਣ ਕਰਕੇ ਮਨੀ ਲਾਂਡਰਿੰਗ ਨਾਲ ਜੁੜੇ ਕੈਸ਼ ਦੀ ਪਛਾਣ ਕਰਦੀ ਹੈ। ਇਹ ਔਨਲਾਈਨ ਬਾਲ ਸ਼ੋਸ਼ਣ ਖਿਲਾਫ ਸ਼ਿਕੰਜਾ ਕੱਸਣ ਵਾਲੇ ਪ੍ਰੋਜੈਕਟ ਸ਼ੈਡੋ ਨੂੰ ਵੀ ਸਪੋਰਟ ਕਰਦੀ ਹੈ। 2024-25 ਵਿਚ ਫਿਨਟ੍ਰੈਕ ਨੇ ਪੁਲਿਸ ਨੂੰ 57 ਸ਼ੱਕੀ ਵਿੱਤੀ ਮਾਮਲਿਆਂ ਦੀ ਜਾਣਕਾਰੀ ਦਿੱਤੀ,ਜਿਸ ਨਾਲ 157 ਸਬਜੈਕਟਸ ਔਫ ਇੰਟਰਸਟ ਦੀ ਪਛਾਣ ਹੋਈ ਹੈ।