13.58C Vancouver 13.58C VancouverJul 18, 2024 3:53 PM - The Canadian Press
ਕੈਨੇਡਾ ਦੀ ਵਿਦੇਸ਼ੀ ਮੰਤਰੀ ਮੇਲਾਨੀ ਜੋਲੀ ਅੱਜ ਅਚਾਨਕ ਚੀਨ ਦੌਰੇ ’ਤੇ ਪਹੁੰਚੇ ਹਨ। ਉਨ੍ਹਾਂ ਦਾ ਇਹ ਦੌਰਾ ਉਸ ਵੇਲੇ ਹੈ ਜਦੋਂ ਕੈਨੇਡੀਅਨ ਇਲੈਕਸ਼ਨਸ ਵਿਚ ਵਿਦੇਸ਼ੀ ਦਖ਼ਲ ਲਈ ਕੈਨੇਡਾ ਸਿੱਧੇ ਤੌਰ ’ਤੇ ਚੀਨ ਨੂੰ ਬਲੇਮ ਕਰ ਚੁੱਕਾ ਹੈ ਅਤੇ ਦੋਹਾਂ ਮੁਲਕਾਂ ਦੇ ਰਿਸ਼ਤੇ ਕੁਝ ਸਾਲਾਂ ਤੋਂ ਨਾਜ਼ੁਕ ਦੌਰ ਵਿਚ ਸਨ।
ਚੀਨੀ ਵਿਦੇਸ਼ੀ ਮੰਤਰਾਲੇ ਨੇ ਇੱਕ ਬਿਆਨ ਵਿਚ ਕਿਹਾ ਕਿ ਮੇਲਾਨੀ ਜੋਲੀ- ਚੀਨੀ ਵਿਦੇਸ਼ ਮੰਤਰੀ ਵਾਂਗ ਯੀ ਦੇ ਸੱਦੇ ’ਤੇ ਵੀਰਵਾਰ ਤੋਂ ਸ਼ਨੀਵਾਰ ਤੱਕ ਤਿੰਨ ਦਿਨਾਂ ਦੌਰੇ ਲਈ ਚੀਨ ਵਿਚ ਹਨ। ਇਸ ਦੌਰਾਨ ਦੋਵੇਂ ਨੇਤਾ ਦੁਵੱਲੇ ਸੰਬਧਾਂ ਵਿਚ ਸੁਧਾਰ ਅਤੇ ਦੋਹਾਂ ਮੁਲਕਾਂ ਦੀਆਂ ਸਾਂਝੀਆਂ ਚਿੰਤਾਵਾਂ ਵਰਗੇ ਮੁੱਦਿਆਂ ’ਤੇ ਡੂੰਘਾਈ ਨਾਲ ਗੱਲਬਾਤ ਕਰਨਗੇ।
ਕੈਨੇਡੀਅਨ ਵਿਦੇਸ਼ ਮੰਤਰੀ ਨੇ ਇੱਕ ਬਿਆਨ ਵਿਚ ਕਿਹਾ ਕਿ ਮੌਜੂਦਾ ਸਮੇਂ ਵਿਸ਼ਵ ਸਾਹਮਣੇ ਕਈ ਚੁਣੋਤੀਆਂ ਹਨ ਅਤੇ ਕੈਨੇਡਾ ਆਪਣੇ ਰਾਸ਼ਟਰੀ ਹਿੱਤ ਨੂੰ ਅੱਗੇ ਵਧਾਉਣ ਲਈ ਕਈ ਸਾਰੇ ਮੁਲਕਾਂ ਨਾਲ ਜੁੜ ਰਿਹਾ ਹੈ। ਕੈਨੇਡਾ-ਚੀਨ ਦੇ ਸਬੰਧ 2018 ਦੇ ਅਖੀਰ ਤੋਂ ਖਰਾਬ ਹੋਏ ਸਨ, ਜਦੋਂ ਚੀਨ ਨੇ ਜਾਸੂਸੀ ਦੇ ਆਰੋਪ ਵਿਚ ਦੋ ਕੈਨੇਡੀਅਨ ਮਾਈਕਲ ਕੋਵਰਿਗ ਅਤੇ ਮਾਈਕਲ ਸਪੇਵਰ ਨੂੰ ਗ੍ਰਿਫਤਾਰ ਕੀਤਾ ਸੀ।
ਚੀਨ ਨੇ ਇਹ ਕਾਰਵਾਈ ਕੈਨੇਡਾ ਵਲੋਂ ਅਮਰੀਕਾ ਦੇ ਕਹਿਣ ’ਤੇ ਹੁਆਵੇਈ ਦੀ ਮੁੱਖ ਵਿੱਤੀ ਅਧਿਕਾਰੀ ਮੇਂਗ ਵਾਨਜ਼ੌ ਨੂੰ ਨਜ਼ਰਬੰਦ ਕਰਨ ਦੇ ਬਦਲੇ ਵਿਚ ਕੀਤੀ ਸੀ। ਗੌਰਤਲਬ ਹੈ ਕਿ ਚੀਨ ਨਾਲ ਸਬੰਧਾਂ ਵਿਚ ਸੁਧਾਰ ਦੀ ਕੋਸ਼ਿਸ਼ ਤਹਿਤ ਇਸ ਦੌਰੇ ਦੀ ਤਿਆਰੀ ਲਈ ਜੋਲੀ ਨੇ ਅਪ੍ਰੈਲ ਵਿਚ ਆਪਣੇ ਉਪ ਮੰਤਰੀ ਡੇਵਿਡ ਮੌਰੀਸਨ ਨੂੰ ਬੀਜਿੰਗ ਭੇਜਿਆ ਸੀ।
