16C Vancouver 16C VancouverMar 10, 2026 5:40 PM - Connect Newsroom - Ramandeep Kaur with files from The Canadian Press
ਕੈਨੇਡਾ ਦੇ ਜਨਤਕ ਪ੍ਰਸਾਰਕ ਸੀ.ਬੀ.ਸੀ. ਦੇ ਸਾਬਕਾ ਟੈਲੀਵਿਜ਼ਨ ਰਿਪੋਰਟਰ ਅਤੇ ਐਂਕਰ ਟ੍ਰੈਵਿਸ ਧਨਰਾਜ ਨੇ ਅੱਜ ਹਾਊਸ ਔਫ ਕਾਮਨਜ਼ ਦੀ ਕਮੇਟੀ ਸਾਹਮਣੇ ਪੇਸ਼ ਹੋ ਕੇ ਸੀ.ਬੀ.ਸੀ. 'ਤੇ ਗੰਭੀਰ ਇਲਜ਼ਾਮ ਲਗਾਏ ਹਨ।
"ਕੈਨੇਡਾ ਟੂਨਾਈਟ" ਪ੍ਰੋਗਰਾਮ ਦੇ ਸਾਬਕਾ ਹੋਸਟ ਨੇ ਦੱਸਿਆ ਕਿ ਸੀ.ਬੀ.ਸੀ. ਨੇ ਉਨ੍ਹਾਂ ਨੂੰ ਕਈ ਮੌਕਿਆਂ 'ਤੇ ਚੁੱਪ ਕਰਵਾਉਣ ਅਤੇ ਡਰਾਉਣ-ਧਮਕਾਉਣ ਦੀ ਕੋਸ਼ਿਸ਼ ਕੀਤੀ। ਧਨਰਾਜ ਨੇ ਹੈਰੀਟੇਜ ਕਮੇਟੀ ਨੂੰ ਦੱਸਿਆ ਕਿ ਸੀ.ਬੀ.ਸੀ. ਦੇ ਅੰਦਰ ਇੱਕ ਟੌਕਸਿਸ ਕਲਚਰ ਹੈ, ਜਿੱਥੇ ਕਰਮਚਾਰੀਆਂ ਨੂੰ ਡਰਾਉਣਾ-ਧਮਕਾਉਣਾ ਆਮ ਗੱਲ ਹੈ ਅਤੇ ਇਸ ਨੂੰ ਰੋਕਣ ਲਈ ਕੋਈ ਕਦਮ ਨਹੀਂ ਚੁੱਕੇ ਜਾਂਦੇ।
ਉਨ੍ਹਾਂ ਕਿਹਾ ਕਿ ਭਾਵੇਂ ਉਨ੍ਹਾਂ ਨੂੰ ਜਨਤਕ ਤੌਰ 'ਤੇ ਇੱਕ ਨਿਡਰ ਅਤੇ ਵਿਭਿੰਨ ਵਾਲੇ ਹੋਸਟ ਵਜੋਂ ਪੇਸ਼ ਕੀਤਾ ਜਾਂਦਾ ਸੀ ਪਰ ਅਸਲੀਅਤ ਵਿਚ ਇਹ ਸਿਰਫ਼ ਦਿਖਾਵਾ ਸੀ। 2025 ਵਿਚ ਸੀ.ਬੀ.ਸੀ. ਛੱਡਣ ਵੇਲੇ ਵੀ ਧਨਰਾਜ ਨੇ ਸਟਾਫ਼ ਨੂੰ ਭੇਜੀ ਇੱਕ ਈਮੇਲ ਵਿਚ ਬਦਲਾਖੋਰੀ, ਬਾਹਰ ਕੱਢਣ ਅਤੇ ਮਾਨਸਿਕ ਨੁਕਸਾਨ ਦੇ ਕਲਚਰ ਦੀ ਗੱਲ ਕਹੀ ਸੀ।
ਧਨਰਾਜ ਨੇ ਆਪਣੇ ਪੌਡਕਾਸਟ "Can't Be Censored" 'ਤੇ ਇਹ ਗੱਲ ਕਹੀ ਸੀ ਕਿ ਉਹ ਸੰਸਦੀ ਕਮੇਟੀ ਸਾਹਮਣੇ ਨਾਮ ਨਸ਼ਰ ਕਰਨਗੇ ਅਤੇ ਸੀ.ਬੀ.ਸੀ. ਦੇ ਅੰਦਰੂਨੀ ਫੈਸਲਿਆਂ ਦੀ ਅਸਲੀ ਤਸਵੀਰ ਪੇਸ਼ ਕਰਨਗੇ।
