16.12C Vancouver 16.12C VancouverAug 31, 2026 3:19 PM - Connect Newsroom - Ramandeep Kaur
ਓਨਟਾਰੀਓ ਦੀ ਪੀਲ ਰੀਜਨ ਪੁਲਿਸ ਨੇ $4 ਮਿਲੀਅਨ ਤੋਂ ਵੱਧ ਦੇ ਧੋਖਾਧੜੀ ਨਾਲ ਜੁੜੀ ਜਾਂਚ ਮਾਮਲੇ ਵਿਚ ਇੱਕ ਸਾਬਕਾ ਪੰਜਾਬੀ ਵਕੀਲ ਨੂੰ ਗ੍ਰਿਫਤਾਰ ਕੀਤਾ ਹੈ, ਜਿਸ ਦੀ ਪਛਾਣ ਪਵਨਜੀਤ ਸਿੰਘ ਮਾਨ ਵਜੋਂ ਸਾਹਮਣੇ ਆਈ ਹੈ। ਪਵਨਜੀਤ 'ਤੇ ਦੋਸ਼ ਹੈ ਕਿ ਉਹ 2019 ਤੋਂ ਮੌਰਗੇਜ ਧੋਖਾਧੜੀ ਗਤੀਵਧੀਆਂ ਚਲਾ ਰਿਹਾ ਸੀ ਅਤੇ ਜੁਲਾਈ 2025 ਵਿਚ ਓਨਟਾਰੀਓ ਦੇ ਲਾਅ ਸੋਸਾਇਟੀ ਟ੍ਰਿਬਿਊਨਲ ਨੇ ਉਸ ਦਾ ਲਾਈਸੈਂਸ ਰੱਦ ਕਰ ਦਿੱਤਾ ਸੀ।
ਇਸ ਸਾਲ ਜੂਨ ਅਤੇ ਜੁਲਾਈ ਵਿਚਕਾਰ ਪੀਲ ਪੁਲਿਸ ਨੂੰ ਵੀ ਪਵਨਜੀਤ ਖਿਲਾਫ ਕਈ ਸ਼ਿਕਾਇਤਾਂ ਮਿਲੀਆਂ ਅਤੇ ਅਗਸਤ ਵਿਚ ਜਾਂਚ ਸ਼ੁਰੂ ਹੋਈ, ਜਿਸ ਦੌਰਾਨ ਇਹ ਖੁਲਾਸਾ ਹੋਇਆ ਕਿ ਪਵਨਜੀਤ ਸਿੰਘ ਮਾਨ ਨੇ ਕਥਿਤ ਤੌਰ 'ਤੇ 4 ਵੱਖ-ਵੱਖ ਮੌਰਗੇਜ ਅਤੇ ਚੈੱਕ ਧੋਖਾਧੜੀ ਕੀਤੇ, ਜਿਸ ਵਿਚ ਪੀੜਤਾਂ ਨੂੰ ਲਗਭਗ $4.3 ਮਿਲੀਅਨ ਦਾ ਨੁਕਸਾਨ ਹੋਇਆ।
ਇਸ ਇਨਵੈਸਟੀਗੇਸ਼ਨ ਦੇ ਚੱਲਦੇ 52 ਸਾਲਾ ਪਵਨਜੀਤ ਸਿੰਘ ਮਾਨ ਨੂੰ 21 ਅਗਸਤ ਨੂੰ ਬਰੈਂਪਟਨ ਤੋਂ ਗ੍ਰਿਫਤਾਰ ਕੀਤਾ ਗਿਆ ਅਤੇ ਉਸ ਖਿਲਾਫ ਫਰੌਡ ਅਤੇ ਭਰੋਸੇ ਦੀ ਉਲੰਘਣਾ ਸਮੇਤ 13 ਚਾਰਜਿਜ਼ ਲਗਾਏ ਗਏ ਹਨ। ਜਾਂਚਕਰਤਾ ਦਾ ਮੰਨਣਾ ਹੈ ਕਿ ਇਸ ਕੇਸ ਵਿਚ ਹੋਰ ਵੀ ਪੀੜਤ ਹੋ ਸਕਦੇ ਹਨ, ਜਿਸ ਕਾਰਨ ਇਸ ਦੀ ਜਾਂਚ ਅਜੇ ਵੀ ਜਾਰੀ ਰੱਖੀ ਗਈ ਹੈ।
