ਮੈਟਰੋ ਵੈਨਕੂਵਰ ਵਿੱਚ ਗੈਸ ਦੀਆਂ ਕੀਮਤਾਂ ਵਿੱਚ ਗਿਰਾਵਟ

ਮੈਟਰੋ ਵੈਨਕੂਵਰ ਦੇ ਗੈਸ ਪੰਪਾਂ 'ਤੇ ਕੀਮਤਾਂ ਵਿਚ ਗਿਰਾਵਟ ਦੇਖਣ ਨੂੰ ਮਿਲੀ ਹੈ। ਇਹ $1.61 ਪ੍ਰਤੀ ਲਿਟਰ ਤੋਂ $1.70 ਪ੍ਰਤੀ ਲਿਟਰ ਤੱਕ ਦਰਜ ਕੀਤੀਆਂ ਗਈਆਂ ਹਨ। ਵਿਸ਼ਲੇਸ਼ਕਾਂ ਦਾ ਕਹਿਣਾ ਹੈ ਕਿ ਪੰਪਾਂ 'ਤੇ ਗੈਸ ਕੀਮਤਾਂ ਵਿਚ ਗਿਰਾਵਟ ਜਾਰੀ ਰਹਿਣ ਦੀ ਉਮੀਦ ਹੈ। ਗੈਸਬੱਡੀ ਵਿਚ ਪੈਟਰੋਲੀਅਮ ਵਿਸ਼ਲੇਸ਼ਣ ਦੇ ਹੈੱਡ ਪੈਟ੍ਰਿਕ ਡੀ ਹਾਨ ਨੇ ਕਿਹਾ ਕਿ ਕਾਰਬਨ ਟੈਕਸ ਖਤਮ ਹੋਣ ਦੇ ਨਾਲ ਗੈਸੋਲੀਨ ਕੀਮਤਾਂ ਵਿਚ ਗਿਰਾਵਟ ਆਈ ਹੈ।

ਗੈਸਬੱਡੀ ਮੁਤਾਬਕ, ਪਿਛਲੇ ਇੱਕ ਹਫ਼ਤੇ ਵਿਚ ਵੈਨਕੂਵਰ ਵਿਚ ਗੈਸੋਲੀਨ ਕੀਮਤਾਂ ਕਰੀਬ 25 ਸੈਂਟ ਪ੍ਰਤੀ ਲਿਟਰ ਘਟੀਆਂ ਹਨ। ਸੂਬੇ ਵਿਚ ਐਤਵਾਰ ਨੂੰ ਔਸਤਨ ਕੀਮਤਾਂ ਪਿਛਲੇ ਸਾਲ ਦੇ ਇਸੇ ਦਿਨ ਦੇ ਮੁਕਾਬਲੇ 19.1 ਸੈਂਟ ਘੱਟ ਸਨ। ਉਥੇ ਹੀ ਵੈਨਕੂਵਰ ਵਿਚ ਗੈਸੋਲੀਨ ਕੀਮਤਾਂ ਵਿਚ ਪਿਛਲੇ ਸਾਲ ਦੀ ਤੁਲਨਾ ਵਿਚ 43.9 ਸੈਂਟ ਦੀ ਕਮੀ ਦਰਜ ਕੀਤੀ ਗਈ।

ਡੀ ਹਾਨ ਨੇ ਕਿਹਾ ਕਿ ਵੱਖ-ਵੱਖ ਦੇਸ਼ਾਂ 'ਤੇ ਅਮਰੀਕਾ ਦੇ ਟੈਰਿਫ ਕਾਰਨ ਆਰਥਿਕ ਅਨਿਸ਼ਚਿਤਤਾ ਵੱਧ ਰਹੀ ਹੈ, ਜਿਸ ਕਾਰਨ ਤੇਲ ਦੀਆਂ ਕੀਮਤਾਂ ਮਹਾਮਾਰੀ ਦੇ ਸ਼ੁਰੂਆਤੀ ਦਿਨਾਂ ਦੇ ਪੱਧਰ ਤੱਕ ਡਿੱਗ ਗਈਆਂ ਹਨ।