ਗੰਨ ਕੰਟਰੋਲ ਗਰੁੱਪ ਵਲੋਂ ਐਸ.ਕੇ.ਐਸ. ਰਾਈਫਲ 'ਤੇ ਪਾਬੰਦੀ ਲਗਾਉਣ ਦੀ ਕੀਤੀ ਮੰਗ

ਕੈਨੇਡਾ ਦੇ ਇੱਕ ਪ੍ਰਮੁੱਖ ਗੰਨ ਕੰਟਰੋਲ ਗਰੁੱਪ ਨੇ ਫੈਡਰਲ ਸਰਕਾਰ ਨੂੰ ਅਸਾਲਟ-ਸਟਾਈਲ ਹਥਿਆਰਾਂ ਦੇ ਬਾਇਬੈਕ ਪ੍ਰੋਗਰਾਮ ਵਿਚ ਸੈਮੀ-ਆਟੋਮੈਟਿਕ ਐਸ.ਕੇ.ਐਸ. ਰਾਈਫਲ ਸ਼ਾਮਲ ਕੀਤੇ ਜਾਣ ਦੀ ਮੰਗ ਕੀਤੀ ਹੈ। ਪੌਲੀਸੇਸਾਵੀਐਂਟ ਦਾ ਕਹਿਣਾ ਹੈ ਕਿ ਜੇਕਰ ਸਰਕਾਰ ਇਹ ਕਦਮ ਨਹੀਂ ਉਠਾਉਂਦੀ ਤਾਂ ਇਸ ਤੋਂ ਬਿਨਾਂ ਗੰਨ ਬਾਇਬੈਕ ਪੈਸੇ ਦੀ ਬਰਬਾਦੀ ਹੀ ਸਾਬਤ ਹੋਵੇਗਾ। ਮਈ 2020 ਤੋਂ ਕੈਨੇਡਾ ਸਰਕਾਰ ਨੇ ਲਗਭਗ 2,500 ਕਿਸਮਾਂ ਦੀਆਂ ਬੰਦੂਕਾਂ ਨੂੰ ਇਸ ਆਧਾਰ 'ਤੇ ਗੈਰ-ਕਾਨੂੰਨੀ ਕਰਾਰ ਦਿੱਤਾ ਹੈ ਕਿ ਇਹ ਜੰਗ ਦੇ ਮੈਦਾਨ ਵਿਚ ਇਸਤੇਮਾਲ ਹੁੰਦੀਆਂ ਹਨ,ਨਾ ਕਿ ਇਹ ਹੰਟਰ ਅਤੇ ਸਪੋਰਟ ਸ਼ੂਟਰ ਲਈ ਹਨ।

ਸਰਕਾਰ ਦਾ ਕਹਿਣਾ ਹੈ ਕਿ ਪਾਬੰਦੀਸ਼ੁਦਾ ਐਲਾਨੇ ਗਏ ਹਥਿਆਰਾਂ ਦੇ ਸਬੰਧਤ ਮਾਲਕਾਂ ਨੂੰ ਫੈਡਰਲ ਗੰਨ ਬਾਇਬੈਕ ਪ੍ਰੋਗਰਾਮ ਤਹਿਤ ਉਚਿਤ ਮੁਆਵਜ਼ਾ ਦਿੱਤਾ ਜਾਵੇਗਾ।

ਹਾਲਾਂਕਿ, ਸਰਕਾਰ ਨੇ ਐਸ.ਕੇ.ਐਸ.ਰਾਈਫਲ ਨੂੰ ਗੈਰ-ਕਾਨੂੰਨੀ ਨਹੀਂ ਠਹਿਰਾਇਆ ਹੈ,ਜਿਸ ਦੀ ਵਰਤੋਂ ਆਮ ਤੌਰ 'ਤੇ ਇੰਡੀਜਨਸ ਕਮਿਊਨਿਟੀ ਵਿਚ ਸ਼ਿਕਾਰ ਲਈ ਕੀਤੀ ਜਾਂਦੀ ਹੈ। ਐਸ.ਕੇ.ਐਸ.ਦਾ ਇਸਤੇਮਾਲ ਹਾਈ-ਪ੍ਰੋਫਾਈਲ ਗੋਲੀਬਾਰੀ ਵਿਚ ਵੀ ਹੋਇਆ ਹੈ। 1989 ਵਿਚ ਮਾਂਟਰੀਅਲ ਦੇ École Polytechnique ਵਿਖੇ ਹੋਈ ਸਮੂਹਿਕ ਗੋਲੀਬਾਰੀ ਤੋਂ ਬਾਅਦ ਬਣੇ ਸੰਗਠਨ ਪੌਲੀਸੇਸਾਵੀਐਂਟ ਨੇ ਕਿਹਾ ਕਿ ਐਸ.ਕੇ.ਐਸ.ਰਾਈਫਲ ਨੂੰ ਸਰਕੂਲੇਸ਼ਨ ਵਿਚ ਛੱਡਣਾ ਪਬਲਿਕ ਸੇਫਟੀ ਫੇਲੀਅਰ ਹੋਵੇਗਾ।