ਪ੍ਰਿੰਸ ਜਾਰਜ ਵਿਚ ਪੁਲਿਸ ਨੇ ਦੋ ਰਿਹਾਇਸ਼ਾਂ 'ਤੇ ਕੀਤੀ ਛਾਪੇਮਾਰੀ, ਹਥਿਆਰ, ਨਸ਼ਾ ਅਤੇ ਹੋਰ ਕਈ ਸਮਾਨ ਕੀਤਾ ਜ਼ਬਤ

ਪ੍ਰਿੰਸ ਜਾਰਜ ਵਿਚ ਪੁਲਿਸ ਨੇ ਦੋ ਰਿਹਾਇਸ਼ਾਂ 'ਤੇ ਛਾਪੇਮਾਰੀ ਵਿਚ ਹਥਿਆਰ, ਨਸ਼ਾ ਅਤੇ ਇੱਕ ਚੋਰੀ ਦੀ ਮੋਟਰਬਾਈਕ ਜ਼ਬਤ ਕੀਤੇ ਹਨ। ਸ਼ਹਿਰ ਦੀ ਆਰ.ਸੀ.ਐਮ.ਪੀ.ਨੇ ਕਿਹਾ ਕਿ 27 ਅਤੇ 28 ਅਗਸਤ ਨੂੰ ਸਰਚ ਵਾਰੰਟ 'ਤੇ ਕੁਇੰਸ ਸਟ੍ਰੀਟ ਦੇ 2600-ਬਲਾਕ ਅਤੇ ਅੱਠਵੇਂ ਐਵੇਨਿਊ ਦੇ 1600-ਬਲਾਕ ਵਿਚ ਦੋ ਘਰਾਂ ਵਿਚ ਛਾਪੇਮਾਰੀ ਕੀਤੀ ਗਈ।

ਕਾਰਪੋਰਲ ਜੈਨੀਫਰ ਕੂਪਰ ਨੇ ਕਿਹਾ ਕਿ ਕੁਇੰਸ ਸਟ੍ਰੀਟ ਸਥਿਤ ਰਿਹਾਇਸ਼ 'ਤੇ ਇਹ ਇੱਕ ਸਾਲ ਤੋਂ ਵੀ ਘੱਟ ਸਮੇਂ ਵਿਚ ਦੂਜੀ ਛਾਪੇਮਾਰੀ ਹੈ, ਉਨ੍ਹਾਂ ਕਿਹਾ ਕਿ ਪਿਛਲੀ ਵਾਰ ਵੀ ਇਸੇ ਤਰ੍ਹਾਂ ਦੀ ਜਾਂਚ ਲਈ ਪੁਲਿਸ ਨੇ ਉਥੇ ਰੇਡ ਕੀਤੀ ਸੀ। ਕੂਪਰ ਨੇ ਕਿਹਾ ਕਿ ਸਰਚ ਦੌਰਾਨ ਪੁਲਿਸ ਅਧਿਕਾਰੀ ਨੇ 35 ਗ੍ਰਾਮ ਸ਼ੱਕੀ ਕੋਕੀਨ, ਦੋ 3ਡੀ-ਪ੍ਰਿੰਟਿਡ ਗੰਨ, ਕਈ ਸਟੈਂਡਰਡ ਹਥਿਆਰ, ਨਸ਼ੇ ਦੀਆਂ ਗੋਲੀਆਂ ਅਤੇ ਕਾਰਤੂਸ ਸਮੇਤ ਹੋਰ ਹਥਿਆਰ ਜ਼ਬਤ ਕੀਤੇ।

ਦੋਵਾਂ ਜਾਂਚ ਦੇ ਸਬੰਧ ਵਿਚ 4 ਲੋਕ ਹਿਰਾਸਤ ਵਿਚ ਲਏ ਗਏ ਸਨ ਪਰ ਘਰਾਂ ਦੀ ਤਲਾਸ਼ੀ ਪੂਰੀ ਹੋਣ ਤੋਂ ਬਾਅਦ ਤਿੰਨ ਨੂੰ ਬਿਨਾਂ ਕਿਸੇ ਕਾਰਵਾਈ ਦੇ ਰਿਹਾਅ ਕਰ ਦਿੱਤਾ ਗਿਆ, ਜਦੋਂ ਕਿ ਚੌਥੇ ਦੀ ਗ੍ਰਿਫਤਾਰੀ ਆਊਟਸਟੈਂਡਿੰਗ ਵਾਰੰਟ 'ਤੇ ਹੋਈ ਸੀ। ਇਹ ਸਾਰੇ ਸ਼ੱਕੀ ਪਹਿਲਾਂ ਵੀ ਕਿਸੇ ਮਾਮਲੇ ਵਿਚ ਪੁਲਿਸ ਦੇ ਅੜਿੱਕੇ ਚੜ੍ਹ ਚੁੱਕੇ ਸਨ।