ਟ੍ਰਿਪਲ ਓਲੰਪਿਕ ਗੋਲਡ ਮੈਡਲਿਸਟ ਬਲਬੀਰ ਸਿੰਘ ਸੀਨੀਅਰ ਦੀ ਸਿਹਤ ਨਾਜ਼ੁਕ

ਸਿਰਫ ਭਾਰਤ ਹੀ ਨਹੀਂ ਬਲਕਿ ਵਿਸ਼ਵ 'ਚ ਹਾਕੀ ਦੀ ਖੇਡ ਦੇ ਸਭ ਤੋਂ ਵੱਡੇ ਨਾਮਾਂ 'ਚ ਸ਼ੁਮਾਰ, ਹਾਕੀ ਲੀਜੈਂਡ, ਪਦਮ ਸ਼੍ਰੀ ਬਲਬੀਰ ਸਿੰਘ ਸੀਨੀਅਰ ਦੀ ਸਿਹਤ ਨਾਜ਼ੁਕ ਹੈ।

ਇਸ ਸੰਬੰਧੀ ਬਲਬੀਰ ਸਿੰਘ ਸੀਨੀਅਰ ਦੇ ਕਰੀਬੀ ਰਿਸ਼ਤੇਦਾਰ ਨੇ ਇੱਕ ਸੋਸ਼ਲ ਮੀਡਿਆ ਪੋਸਟ ਰਾਹੀਂ ਉਨ੍ਹਾਂ ਦੇ ਚਾਹੁਣ ਵਾਲਿਆਂ ਅਤੇ ਖੇਡ ਪ੍ਰੇਮੀਆਂ ਨੂੰ ਸੂਚਿਤ ਕੀਤਾ ਹੈ।

ਬਲਬੀਰ ਸਿੰਘ ਸੀਨੀਅਰ ਦੇ ਅਧਿਕਾਰਤ ਇੰਸਟਾਗ੍ਰਾਮ ਖਾਤੇ 'ਤੇ ਸਾਂਝੀ ਕੀਤੀ ਗਈ ਪੋਸਟ ਵਿੱਚ ਦੱਸਿਆ ਗਿਆ ਹੈ ਕਿ ਮੰਗਲਵਾਰ ਸਵੇਰੇ ਕਰੀਬ 9 ਵਜੇ ਉਨ੍ਹਾਂ ਨੂੰ ਦਿਲ ਦਾ ਦੌਰਾ ਪੈ ਗਿਆ ਸੀ।

ਸਮੇਂ ਸਿਰ ਮਿਲੇ ਮੇਡਿਕਲ ਉਪਚਾਰ ਆਸਰੇ ਉਨ੍ਹਾਂ ਨੂੰ ਬਚਾਇਆ ਜਾ ਸਕਿਆ। ਫ਼ਿਲਹਾਲ ਬਲਬੀਰ ਸਿੰਘ ਸੀਨੀਅਰ ਨੂੰ ਮੋਹਾਲੀ ਦੇ ਫੋਰਟਿਸ ਹਸਪਤਾਲ 'ਚ ਆਈ.ਸੀ.ਯੂ. 'ਚ ਰੱਖਿਆ ਗਿਆ ਹੈ।

ਜਾਣਕਾਰੀ ਦਿੱਤੀ ਗਈ ਕਿ ਬਲਬੀਰ ਸਿੰਘ ਸੀਨੀਅਰ ਨੂੰ ਸੁੱਕਰਵਾਰ, 8 ਮਈ ਨੂੰ ਗੰਭੀਰ ਮਲਟੀ ਆਰਗਨ ਸਥਿਤੀ (multi organ affected state) 'ਚ ਹਸਪਤਾਲ ਪਹੁੰਚਾਇਆ ਗਿਆ ਸੀ।

ਉਹ ਉਸ ਵੇਲੇ ਤੋਂ ਹਸਪਤਾਲ 'ਚ ਹੀ ਸਨ।

ਉਨ੍ਹਾਂ ਦੀ ਹਾਲਤ 'ਚ ਕੁਝ ਸੁਧਾਰ ਹੋਇਆ ਸੀ, ਪਰ ਮੰਗਲਵਾਰ ਸਵੇਰੇ ਉਨ੍ਹਾਂ ਦੀ ਸਿਹਤ ਦਿਲ ਦਾ ਦੌਰਾ ਪੈਣ ਕਾਰਨ ਵਿਗੜ ਗਈ।

ਡਾਕਟਰਾਂ ਦਾ ਕਹਿਣਾ ਹੈ ਕਿ ਬਲਬੀਰ ਸਿੰਘ ਸੀਨੀਅਰ ਲਈ ਅਗਲੇ 24 ਤੋਂ 48 ਘੰਟੇ ਕਾਫੀ ਗੰਭੀਰ ਰਹਿਣ ਵਾਲੇ ਹਨ ਅਤੇ ਉਨ੍ਹਾਂ ਦੀ ਸਿਹਤ ਫ਼ਿਲਹਾਲ ਨਾਜ਼ੁਕ ਬਣੀ ਹੋਈ ਹੈ।

ਡਾਕਟਰਾਂ ਦਾ ਕਹਿਣਾ ਹੈ ਕਿ ਹੁਣ 48 ਘੰਟੇ ਬਾਅਦ ਹੀ ਉਨ੍ਹਾਂ ਦੀ ਸਿਹਤ ਬਾਰੇ ਕੁਝ ਦੱਸਿਆ ਜਾ ਸਕੇਗਾ।

ਬਲਬੀਰ ਸਿੰਘ ਸੀਨੀਅਰ ਨੂੰ ਫ਼ਿਲਹਾਲ ਵੈਂਟੀਲੇਟਰ 'ਤੇ ਰੱਖਿਆ ਗਿਆ ਹੈ।

ਉਪਲੱਬਧੀਆਂ ਭਰਿਆ ਜੀਵਨ

ਬਲਬੀਰ ਸਿੰਘ ਸੀਨੀਅਰ ਨੇ ਭਾਰਤੀ ਹਾਕੀ ਦੀ ਅਣਥੱਕ ਸੇਵਾ ਕੀਤੀ ਹੈ।

ਬਲਬੀਰ ਸਿੰਘ ਸੀਨੀਅਰ ਨੇ ਹਾਕੀ ਸਟਿਕ ਨਾਲ ਸਾਲ 1948, 1952 ਤੇ 1956 ਦੇ ਓਲੰਪਿਕਸ ਵਿੱਚ ਅਜਿਹੇ ਕਮਾਲ ਕੀਤੇ ਕਿ ਉਨ੍ਹਾਂ ਦਾ ਨਾਮ ਖੇਡ ਮੈਦਾਨ ਤੇ ਹਮੇਸ਼ਾ ਲਈ ਅਮਰ ਹੋ ਗਿਆ ਅਤੇ ਭਾਰਤ ਦੀ ਝੋਲੀ ਵਿੱਚ ਲਗਾਤਾਰ ਤਿੰਨ ਓਲੰਪਿਕ ਸੋਨ ਤਗ਼ਮੇ ਪੈ ਗਏ।

ਸਾਲ 1948 ਵਿੱਚ ਓਲੰਪਿਕਸ ਨੇ ਖੇਡ ਮੈਦਾਨ ਤੇ ਭਾਰਤ ਦੇ ਇਸ ਅਣਮੁੱਲੇ ਹੀਰੇ ਦੀ ਪਹਿਲੀ ਝਲਕ ਵੇਖੀ।

ਸਾਲ 1952 ਵਿੱਚ ਹੈਲਸਿੰਕੀ 'ਚ ਹੋਏ ਓਲੰਪਿਕ ਖੇਡਾਂ 'ਚ ਬਲਬੀਰ ਸਿੰਘ ਸੀਨੀਅਰ ਓਪਨਿੰਗ ਸੈਰੇਮਨੀ ਦੌਰਾਨ ਭਾਰਤੀ ਓਲੰਪਿਕ ਦਲ ਦੇ ਫਲੈਗ ਬੀਅਰਰ (flag bearer) ਸਨ।

1952 ਓਲੰਪਿਕਸ ਦੇ ਹਾਕੀ ਦੇ ਫਾਇਨਲ ਮੈਚ ਵਿੱਚ ਬਲਬੀਰ ਸਿੰਘ ਸੀਨੀਅਰ ਨੇ ਨੀਦਰਲੈਂਡ ਖਿਲਾਫ਼ ਖੇਡਦੇ ਹੋਏ 5 ਗੋਲ ਕੀਤੇ ਸਨ।

ਇਹ ਕਿਸੇ ਵੀ ਓਲੰਪਿਕ ਫਾਇਨਲ ਵਿੱਚ ਕਿਸੇ ਇਕੱਲੇ ਖਿਡਾਰੀ ਵੱਲੋਂ ਕੀਤੇ ਗਏ ਸਭ ਤੋਂ ਵੱਧ ਗੋਲ ਹਨ ਅਤੇ ਇਹ ਵਿਸ਼ਵ ਰਿਕਾਰਡ ਅੱਜ ਵੀ ਬਲਬੀਰ ਸਿੰਘ ਸੀਨੀਅਰ ਦੇ ਨਾਮ ਦਰਜ ਹੈ।

ਭਾਰਤ ਦੇ ਹੈਲਸਿੰਕੀ ਓਲੰਪਿਕਸ ਵਿੱਚ ਕੀਤੇ ਕੁੱਲ 13 ਗੋਲਾਂ ਵਿੱਚੋਂ 9 ਇਕੱਲੇ ਬਲਬੀਰ ਸਿੰਘ ਸੀਨੀਅਰ ਨੇ ਹੀ ਕੀਤੇ ਸਨ।

ਸਾਲ 1956 ਦੇ ਮੇਲਬਰਨ ਓਲੰਪਿਕਸ ਵਿੱਚ ਬਲਬੀਰ ਸਿੰਘ ਸੀਨੀਅਰ ਨੇ ਭਾਰਤੀ ਹਾਕੀ ਟੀਮ ਦੀ ਕਪਤਾਨੀ ਕੀਤੀ।

ਭਾਰਤੀ ਖੇਡ ਇਤਿਹਾਸ 'ਚ ਬਲਬੀਰ ਸਿੰਘ ਸੀਨੀਅਰ ਅਜਿਹੇ ਪਹਿਲੇ ਖਿਡਾਰੀ ਸਨ ਜਿੰਨਾ ਨੂੰ ਪਦਮ ਸ਼੍ਰੀ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਗਿਆ।

ਭਾਰਤ ਦੀ ਝੋਲੀ ਵਿੱਚ ਤਿੰਨ ਸੋਨ ਤਗ਼ਮੇ ਪਾਉਣ ਵਾਲੇ ਬਲਬੀਰ ਸਿੰਘ ਸੀਨੀਅਰ ਦੇ ਨਾਮ ਦੀ ਸਿਫ਼ਾਰਿਸ਼ ਪੰਜਾਬ ਸਰਕਾਰ ਨੇ ਭਾਰਤ ਰਤਨ ਐਵਾਰਡ ਲਈ ਵੀ ਕੀਤੀ ਹੈ।