17.38C Vancouver 17.38C VancouverJun 23, 2020 2:24 AM -
ਭਾਰਤੀ ਫੌਜ ਦੇ 14 ਕੌਰਪਸ ਕਮਾਂਡਰ ਲੈਫਟੀਨੈਂਟ ਜਨਰਲ ਹਰਿੰਦਰ ਸਿੰਘ ਅਤੇ ਉਨ੍ਹਾਂ ਦੇ ਚੀਨੀ ਹਮਰੁਤਬਾ ਦੀ ਬੈਠਕ ਕਰੀਬ 11 ਘੰਟੇ ਤੱਕ ਜਾਰੀ ਰਹਿਣ ਦੀਆਂ ਖਬਰਾਂ ਹਨ।
ਖਬਰ ਅਜੈਂਸੀ ਏ.ਐਨ.ਆਈ. ਵੱਲੋਂ ਆਈਆਂ ਖਬਰਾਂ ਅਨੁਸਾਰ ਬੈਠਕ ਖਤਮ ਹੋ ਚੁੱਕੀ ਹੈ।
ਇਹ ਬੈਠਕ ਭਾਰਤੀ ਸਮੇਂ ਅਨੁਸਾਰ ਸੋਮਵਾਰ ਸਵੇਰੇ ਕਰੀਬ 11.30 ਵਜੇ ਸ਼ੁਰੂ ਹੋਈ ਸੀ।
ਇਹ ਬੈਠਕ ਚੀਨ ਦੀ ਐਲ.ਏ.ਸੀ. (ਲਾਈਨ ਆਫ ਐਕਚੂਅਲ ਕੰਟਰੋਲ) 'ਚ ਪੈਂਦੇ ਮੌਲਡੋ 'ਚ ਹੋਈ ਦੱਸੀ ਗਈ ਹੈ।
ਜਾਣਕਾਰੀ ਅਨੁਸਾਰ ਇਹ ਬੈਠਕ ਭਾਰਤ ਅਤੇ ਚੀਨ ਵਿਚਾਲੇ ਬਣੀ ਤਣਾਅ ਦੀ ਸਥਿਤੀ ਨੂੰ ਕਾਬੂ ਹੇਠ ਲਿਆਉਣ ਲਈ ਕੀਤੀ ਗਈ ਹੈ।
ਦੋਨੋਂ ਕਮਾਂਡਰਾਂ ਵਿਚਾਲੇ ਹੋਈ ਇਹ ਦੂਜੀ ਬੈਠਕ ਹੈ।
ਇਸ ਤੋਂ ਪਹਿਲਾਂ ਇਨ੍ਹਾਂ ਦੀ 6 ਜੂਨ ਨੂੰ ਵੀ ਬੈਠਕ ਹੋ ਚੁੱਕੀ ਹੈ।
ਭਾਰਤ ਨੇ ਉਸ ਬੈਠਕ ਦੌਰਾਨ ਚੀਨ ਤੋਂ ਮੰਗ ਕੀਤੀ ਸੀ ਕਿ ਆਪਣੀਆਂ 4 ਮਈ ਤੋਂ ਪਹਿਲਾਂ ਦੀਆਂ ਐਲ.ਏ.ਸੀ. ਦੀਆਂ ਥਾਵਾਂ 'ਤੇ ਵਾਪਸੀ ਕੀਤੀ ਜਾਵੇ।
ਇਸ ਦਾ ਚੀਨ ਵੱਲੋਂ ਕੋਈ ਸਕਾਰਾਤਮਕ ਜਵਾਬ ਨਹੀਂ ਆਇਆ ਸੀ।
ਭਾਰਤ ਵੱਲੋਂ ਇਸ ਬੈਠਕ 'ਚ ਐਲ.ਏ.ਸੀ. 'ਤੇ ਹੋਣ ਵਾਲੀਆਂ ਤਕਰਾਰਾਂ ਲਈ ਨਵੇਂ ਨਿਯਮਾਂ ਬਾਰੇ ਵੀ ਗੱਲਬਾਤ ਕੀਤੇ ਜਾਣ ਦੀਆਂ ਖਬਰਾਂ ਸਨ।
ਬੈਠਕ ਤੋਂ ਪਹਿਲਾਂ ਕਿਹਾ ਜਾ ਰਿਹਾ ਸੀ ਕਿ ਭਾਰਤ ਵੱਲੋਂ ਚੀਨ ਨੂੰ 6 ਜੂਨ ਦੀ ਗੱਲਬਾਤ 'ਤੇ ਅਮਲ ਕਰਨ ਲਈ ਵੀ ਕਿਹਾ ਜਾਣਾ ਸੀ।
ਯਾਦ ਰਹੇ ਬੀਤੇ ਹਫ਼ਤੇ ਭਾਰਤ ਅਤੇ ਚੀਨ ਵਿਚਾਲੇ ਲੱਦਾਖ ਦੀ ਗਲਵਾਨ ਘਾਟੀ 'ਚ ਹੋਈ ਝੜਪ 'ਚ ਭਾਰਤ ਦੇ 20 ਜਵਾਨ ਸ਼ਹੀਦ ਹੋ ਗਏ ਸਨ।
