13C Vancouver 13C VancouverJul 29, 2022 4:41 PM - ANI
ਭਾਰਤੀ ਮਹਿਲਾ ਹਾਕੀ ਟੀਮ ਨੇ ਸ਼ੁੱਕਰਵਾਰ ਨੂੰ ਬਰਮਿੰਘਮ ਵਿਚ 2022 ਦੀਆਂ ਕਾਮਨਵੈਲਥ ਖੇਡਾਂ ਵਿਚ ਘਾਨਾ ਨੂੰ 5-0 ਨਾਲ ਹਰਾ ਕੇ ਆਪਣੀ ਧਮਾਕੇਦਾਰ ਸ਼ੁਰੂਆਤ ਕੀਤੀ ਹੈ। ਗੁਰਜੀਤ ਕੌਰ ਨੇ ਦੋ ਗੋਲ ਕੀਤੇ, ਜਦੋਂ ਕਿ ਨੇਹਾ, ਸੰਗੀਤਾ ਕੁਮਾਰੀ ਅਤੇ ਸਲੀਮਾ ਨੇ ਵੀ ਇਕ-ਇਕ ਗੋਲ ਕੀਤਾ।
ਭਾਰਤ ਨੇ ਮੈਚ ਦੀ ਸ਼ੁਰੂਆਤ ਫਰੰਟ ਫੁਟ 'ਤੇ ਕੀਤੀ। ਜੋਤੀ ਨੇ ਰਾਈਟ ਫਲੈਂਕਸ ਤੋਂ ਗੇਂਦ ਨੂੰ ਸਰਕਲ ਦੇ ਅੰਦਰ ਨਵਨੀਤ ਕੌਰ ਨੂੰ ਪਾਸ ਕੀਤਾ। ਹਾਲਾਂਕਿ, ਨਵਨੀਤ ਦੇ ਸ਼ਾਟ ਨੂੰ ਘਾਨਾ ਦਾ ਗੋਲਕੀਪਰ ਰੋਕਣ ਵਿਚ ਸਫਲ ਰਿਹਾ ਪਰ ਇਸ ਦੇ ਇੱਕ ਮਿੰਟ ਮਗਰੋਂ ਹੀ ਗੁਰਜੀਤ ਕੌਰ ਨੇ ਮੈਚ ਦੇ ਪਹਿਲੇ ਪੈਨਲਟੀ ਕਾਰਨਰ ਤੋਂ ਗੋਲ ਕਰ ਦਿੱਤਾ।
ਭਾਰਤ ਨੇ ਪਹਿਲਾ ਕੁਆਰਟਰ ਸਮਾਪਤ ਹੋਣ ਤੱਕ ਫਰੰਟ ਫੁਟ ਦੀ ਸਥਿਤੀ ਨੂੰ ਬਰਕਰਾਰ ਰੱਖਦੇ ਹੋਏ ਘਾਨਾ ਦੇ ਡਿਫੈਂਸ 'ਤੇ ਦਬਾਅ ਬਣਾ ਕੇ ਰੱਖਿਆ।
ਨੇਹਾ ਨੇ ਹਾਫ ਟਾਈਮ ਦੇ ਸਟਰੋਕ 'ਤੇ ਭਾਰਤ ਦੀ ਬੜ੍ਹਤ ਨੂੰ 2-0 ਤੱਕ ਵਧਾ ਦਿੱਤਾ। ਲੈਫਟ ਫਲੈਂਕਸ ਤੋਂ ਮੋਨਿਕਾ ਅਤੇ ਲਾਲਰੇਮਸਿਆਮੀ ਵੱਲੋਂ ਬਣਾਏ ਗਏ ਮੂਵ ਨੇ ਸੰਗੀਤਾ ਕੁਮਾਰੀ ਨੂੰ ਇੱਕ ਗੋਲ ਕਰਨ ਦਾ ਮੌਕਾ ਦਿੱਤਾ ਅਤੇ ਭਾਰਤ ਦੀ ਲੀਡ 3-0 ਹੋ ਗਈ।
ਇਸ ਦੇ ਕੁਝ ਮਿੰਟ ਮਗਰੋਂ ਗੁਰਜੀਤ ਕੌਰ ਨੇ ਪੈਨਲਟੀ ਸਟ੍ਰੋਕ ਤੋਂ ਗੋਲ ਕੀਤਾ, ਜਿਸ ਦੇ ਨਾਲ ਭਾਰਤ ਨੇ ਫਾਈਨਲ ਕੁਆਰਟਰ ਤੋਂ ਪਹਿਲਾਂ ਮੈਚ 'ਤੇ ਪੂਰੀ ਤਰ੍ਹਾਂ ਕੰਟਰੋਲ ਕਰਦੇ ਹੋਏ ਆਪਣੀ ਲੀਡ 4-0 ਬਣਾ ਲਈ। ਉੱਥੇ ਹੀ, ਮੈਚ ਦੇ ਅੰਤਿਮ ਕੁਝ ਮਿੰਟਾਂ ਵਿਚ ਨੇਹਾ ਨੇ ਸਲੀਮਾ ਨੂੰ ਸਰਕਲ ਅੰਦਰ ਦੇਖਦੇ ਹੋਏ ਗੇਂਦ ਪਾਸ ਕੀਤੀ ਅਤੇ ਸਲੀਮਾ ਨੇ ਗੋਲ ਮਾਰ ਕੇ ਭਾਰਤ ਦੀ ਲੀਡ 5-0 ਬਣਾ ਦਿੱਤੀ।
