ਟਰੂਡੋ ਜਲਦ ਹੀ ਛੱਡਣਗੇ ਕੈਨੇਡਾ ਦੇ ਪੀ. ਐੱਮ. ਵਜੋਂ ਅਹੁਦਾ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਆਖਰ ਕੈਨੇਡਾ ਦੇ ਪੀ. ਐੱਮ. ਵਜੋਂ ਜਲਦ ਹੀ ਅਹੁਦਾ ਛੱਡਣਗੇ, ਟਰੂਡੋ ਨੇ ਕਿਹਾ ਕਿ ਉਹ ਲਿਬਰਲ ਪਾਰਟੀ ਦੇ ਲੀਡਰ ਵਜੋਂ ਅਹੁਦਾ ਉਸੇ ਉਮੀਦ ਅਤੇ ਵਿਸ਼ਵਾਸ ਨਾਲ ਛੱਡ ਰਹੇ ਹਨ ਜਿਵੇਂ ਉਨ੍ਹਾਂ ਨੇ ਸ਼ੁਰੂਆਤ ਕੀਤੀ ਸੀ।

ਲਿਬਰਲ ਨੂੰ ਦਿੱਤੇ ਵਿਦਾਇਗੀ ਭਾਸ਼ਣ ਵਿਚ ਉਨ੍ਹਾਂ ਕਾਫੀ ਜੋਸ਼ ਭਰਿਆ, ਟਰੂਡੋ ਨੇ ਕਿਹਾ ਕਿ ਇਹ ਆਜ਼ਾਦੀ, ਲੋਕਤੰਤਰ ਅਤੇ ਕੈਨੇਡਾ ਅਚਾਨਕ ਸਾਨੂੰ ਹਾਸਲ ਨਹੀਂ ਹੋਏ, ਇਸ ਲਈ ਸਾਹਸ, ਬਲੀਦਾਨ, ਉਮੀਦ ਅਤੇ ਸਖ਼ਤ ਮਿਹਨਤ ਲੱਗੀ ਹੈ।

ਗੌਰਤਲਬ ਹੈ ਕਿ ਟਰੂਡੋ ਪਹਿਲੀ ਵਾਰ 2008 ਵਿਚ ਮਾਂਟਰੀਅਲ਼ ਦੀ ਪੈਪੀਨੋ ਰਾਈਡਿੰਗ ਤੋਂ ਚੋਣ ਜਿੱਤੇ ਸਨ ਅਤੇ ਅਪ੍ਰੈਲ 2013 ਵਿਚ ਲਿਬਰਲ ਪਾਰਟੀ ਦੇ ਲੀਡਰ ਚੁਣੇ ਗਏ ਸਨ। ਉਨ੍ਹਾਂ ਦੀ ਲੀਡਰਸ਼ਿਪ ਵਿਚ 19 ਅਕਤੂਬਰ, 2015 ਨੂੰ ਲਿਬਰਲ ਪਾਰਟੀ ਪੂਰਨ ਬਹੁਮਤ ਨਾਲ ਸੱਤਾ ਵਿਚ ਆਈ ਸੀ। ਸਿਆਸਤ ਵਿਚ ਆਉਣ ਤੋਂ ਪਹਿਲਾਂ ਟਰੂਡੋ ਟੀਚਿੰਗ ਲਾਈਨ ਵਿਚ ਸਨ, ਵੈਨਕੂਵਰ ਵਿਚ ਉਹ ਫਰੈਂਚ, ਹਿਸਾਬ ਅਤੇ ਹੋਰ ਵਿਸ਼ੇ ਪੜ੍ਹਾਉਂਦੇ ਸਨ।

ਲਿਬਰਲ ਪਾਰਟੀ ਅੰਦਰ ਦਬਾਅ ਵਧਣ ਤੋਂ ਬਾਅਦ ਉਨ੍ਹਾਂ ਇਸ ਸਾਲ 6 ਜਨਵਰੀ ਨੂੰ ਐਲਾਨ ਕੀਤਾ ਸੀ ਕਿ ਉਹ ਪਾਰਟੀ ਦਾ ਨਵਾਂ ਲੀਡਰ ਚੁਣੇ ਜਾਣ ਮਗਰੋਂ ਸਿਆਸਤ ਛੱਡ ਦੇਣਗੇ, ਇਸ ਦੇ ਨਾਲ ਹੀ ਲਿਬਰਲ ਪਾਰਟੀ ਵਲੋਂ ਲੀਡਰਸ਼ਿਪ ਦੌੜ ਸ਼ੁਰੂ ਕਰ ਦਿੱਤੀ ਗਈ ਸੀ।