ਕਾਨਪੁਰ ਐਨਕਾਊਂਟਰ : ਵਿਕਾਸ ਦੁਬੇ ਨਾਲ ਸੰਪਰਕ ਰੱਖਣ ਦੇ ਸ਼ੱਕ 'ਚ ਤਿੰਨ ਪੁਲਿਸ ਵਾਲੇ ਸਸਪੈਂਡ

ਕਾਨਪੁਰ ਰੇਂਜ ਦੇ ਆਈ.ਜੀ. ਮੋਹਿਤ ਅੱਗਰਵਾਲ ਨੇ ਖਬਰ ਅਜੈਂਸੀ ਏ.ਐਨ.ਆਈ. ਨੂੰ ਜਾਣਕਾਰੀ ਦਿੱਤੀ ਹੈ ਕਿ ਵਿਕਾਸ ਦੁਬੇ ਦੇ ਸੰਪਰਕ 'ਚ ਰਹੇ 3 ਪੁਲਿਸ ਵਾਲਿਆਂ ਨੂੰ ਸਸਪੈਂਡ ਕਰ ਦਿੱਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਅੱਜ 3 ਅਜਿਹੇ ਪੁਲਿਸ ਵਾਲਿਆਂ ਨੂੰ ਸਸਪੈਂਡ ਕੀਤਾ ਗਿਆ ਹੈ, ਜਿੰਨਾ ਦੀਆਂ ਵਿਕਾਸ ਨਾਲ ਸੰਬੰਧਤ ਕੁਝ ਗਤੀਵਿਧੀਆਂ 'ਤੇ ਸ਼ੱਕ ਸੀ। ਆਈ.ਜੀ. ਨੇ ਕਿਹਾ ਕਿ 40 ਪੁਲਿਸ ਥਾਣਿਆਂ ਦੀਆਂ 25 ਟੀਮਾਂ ਵਿਕਾਸ ਦੀ ਭਾਲ ਕਰ ਰਹੀਆਂ ਹਨ ਅਤੇ ਉਸ ਦੇ ਨਾਲ ਸੰਬੰਧਤ ਲੋਕਾਂ ਦੀ ਵੀ ਭਾਲ ਕੀਤੀ ਜਾ ਰਹੀ ਹੈ।

ਲਖੀਮਪੁਰ 'ਚ ਲੱਗੇ ਵਿਕਾਸ ਦੁਬੇ ਦੇ ਪੋਸਟਰ

ਪੁਲਿਸ ਅਧਿਕਾਰੀਆਂ ਨੇ ਉੱਤਰ ਪ੍ਰਦੇਸ਼ ਦੇ ਲਖੀਮਪੁਰ 'ਚ 'ਹਿਸਟਰੀ-ਸ਼ੀਟਰ' ਵਿਕਾਸ ਦੁਬੇ ਦੇ ਪੋਸਟਰ ਲਗਾ ਦਿੱਤੇ ਹਨ। ਚਰਚਾ 'ਚ ਬਣੇ ਹੋਏ ਕਾਨਪੁਰ ਐਨਕਾਊਂਟਰ 'ਚ ਵਿਕਾਸ ਦੁਬੇ ਹੀ ਮੁੱਖ ਦੋਸ਼ੀ ਦੱਸਿਆ ਜਾ ਰਿਹਾ ਹੈ। ਘਟਨਾ 3 ਜੁਲਾਈ ਨੂੰ ਬਿਕਾਰੂ ਨਾਮ ਦੇ ਪਿੰਡ 'ਚ ਵਾਪਰੀ ਸੀ। ਪੁਲਿਸ ਦੀਆਂ ਟੀਮਾਂ ਵਿਕਾਸ ਦੀ ਭਾਲ 'ਚ ਜੁਟੀਆਂ ਹਨ। ਲਖੀਮਪੁਰ ਜ਼ਿਲ੍ਹਾ ਭਾਰਤ ਅਤੇ ਨੇਪਾਲ ਦੇ ਬਾਰਡਰ 'ਤੇ ਸਥਿਤ ਹੈ ਅਤੇ ਸ਼ੱਕ ਜ਼ਾਹਿਰ ਕੀਤਾ ਜਾ ਰਿਹਾ ਹੈ ਕਿ ਵਿਕਾਸ ਨੇਪਾਲ ਪਹੁੰਚ ਗਿਆ ਹੋ ਸਕਦਾ ਹੈ।

ਵਿਕਾਸ ਦੇ ਘਰ ਤੋਂ ਮਿਲੇ ਵਿਸਫੋਟਕ, ਅਸਲਾ ਤੇ ਹਥਿਆਰ

ਅੱਜ ਕਾਨਪੁਰ ਐਨਕਾਊਂਟਰ ਮਾਮਲੇ ਦੀ ਪੜਤਾਲ ਕਰ ਰਹੇ ਕਾਨਪੁਰ ਰੂਰਲ ਦੇ ਐਸ.ਪੀ. ਬੀ.ਕੇ. ਸ਼੍ਰੀਵਾਸਤਵ ਨੇ ਦੱਸਿਆ ਕਿ ਵਿਕਾਸ ਦੇ ਘਰ ਤੋਂ ਵਿਸਫੋਟਕ, ਹਥਿਆਰ ਅਤੇ ਹੋਰ ਅਸਲਾ ਬਰਾਮਦ ਹੋਇਆ ਹੈ। ਉਨ੍ਹਾਂ ਕਿਹਾ ਕਿ ਕੁਝ ਹਥਿਆਰ ਅਜਿਹੇ ਹਨ ਜਿੰਨਾ ਦਾ ਲਾਈਸੈਂਸ ਉਨ੍ਹਾਂ ਲੋਕਾਂ ਦੇ ਨਾਮ 'ਤੇ ਹੈ, ਜੋ ਵਿਕਾਸ ਦੇ ਸੰਪਰਕ ਵਿੱਚ ਸਨ। ਹਾਲਾਂਕਿ ਇਨ੍ਹਾਂ ਦੀ ਵਰਤੋਂ ਕਥਿਤ ਤੌਰ 'ਤੇ ਵਿਕਾਸ ਵੱਲੋਂ ਕੀਤੀ ਜਾ ਰਹੀ ਸੀ। ਐਸ.ਪੀ. ਨੇ ਕਿਹਾ ਕਿ ਵਿਕਾਸ ਦੁਬੇ ਕਿਸੇ ਨਕਸਲਵਾਦੀ ਜਿਹੇ ਤਰੀਕਿਆਂ ਨਾਲ ਕੰਮ ਕਰਦਾ ਸੀ।

ਪਰਿਵਾਰ ਨੇ ਕਿਹਾ "ਸਾਡਾ ਵਿਕਾਸ ਨਾਲ ਕੋਈ ਰਿਸ਼ਤਾ ਨਹੀਂ"

ਵਿਕਾਸ ਦੁਬੇ ਦੇ ਪਰਿਵਾਰ ਦਾ ਕਹਿਣਾ ਹੈ ਕਿ ਐਨਕਾਊਂਟਰ 'ਚ 8 ਪੁਲਿਸ ਵਾਲਿਆਂ ਨੂੰ ਮਾਰ ਦੇਣ ਵਾਲੇ ਵਿਕਾਸ ਨਾਲ ਉਨ੍ਹਾਂ ਦਾ ਕੋਈ ਰਿਸ਼ਤਾ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਵਿਕਾਸ ਨੇ ਪੁਲਿਸ ਵਾਲਿਆਂ ਨਾਲ ਗਲਤ ਕੀਤਾ ਹੈ। ਉਸ ਦੀ ਭੈਣ ਨੇ ਕਿਹਾ ਕਿ ਉਹ ਬੀਤੇ 5 ਸਾਲ ਤੋਂ ਵਿਕਾਸ ਦੇ ਸੰਪ੍ਰਕ 'ਚ ਨਹੀਂ ਹਨ। ਉਨ੍ਹਾਂ ਕਿਹਾ ਕਿ ਵਿਕਾਸ ਦੁਬੇ ਨੇ ਪਰਿਵਾਰ ਨਾਲ ਵੀ ਠੱਗੀ ਮਾਰੀ ਹੈ। ਵਿਕਾਸ ਦੀ ਭੈਣ ਨੇ ਕਿਹਾ ਕਿ ਉਨ੍ਹਾਂ ਦਾ ਪਰਿਵਾਰ ਵੀ ਡਰਿਆ ਹੋਇਆ ਹੈ। ਪਰਿਵਾਰ ਨੇ ਪੁਲਿਸ ਦੀ ਤਾਰੀਫ ਕਰਦੇ ਹੋਏ ਕਿਹਾ ਕਿ ਕੋਰੋਨਾ ਵਾਇਰਸ ਦੇ ਸਮੇਂ ਦੌਰਾਨ ਪੁਲਿਸ ਆਪਣੀਆਂ ਜ਼ਿੰਮੇਵਾਰੀਆਂ ਨਿਭਾ ਰਹੀ ਹੈ ਅਤੇ ਵਿਕਾਸ ਨੇ ਪੁਲਿਸ ਨਾਲ ਗਲਤ ਕੀਤਾ ਹੈ। ਵਿਕਾਸ ਦੀ ਭਤੀਜੀ ਨੇ ਕਿਹਾ ਕਿ ਪੁਲਿਸ ਜਿਵੇਂ ਚਾਹੇ ਵਿਕਾਸ ਨਾਲ ਸਲੂਕ ਕਰੇ।