ਕਿਰਤ ਮੰਤਰੀ ਸੀਮਸ ਓ’ਰੀਗਨ ਨੇ ਕੈਬਨਿਟ ਤੋਂ ਦਿੱਤਾ ਅਸਤੀਫਾ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਸਰਕਾਰ ਵਿਚ ਕਿਰਤ ਮੰਤਰੀ ਸੀਮਸ ਓ’ਰੀਗਨ ਨੇ ਕੈਬਨਿਟ ਤੋਂ ਅਸਤੀਫਾ ਦੇ ਦਿੱਤਾ ਹੈ ਅਤੇ ਉਹ ਅਗਲੀਆਂ ਫੈਡਰਲ ਚੋਣਾਂ ਵੀ ਨਹੀਂ ਲੜਨਗੇ। 53 ਸਾਲਾ ਓ’ਰੀਗਨ ਨੇ ਅਸਤੀਫੇ ਪਿੱਛੇ ਪਰਿਵਾਰਕ ਕਾਰਨਾਂ ਦਾ ਹਵਾਲਾ ਦਿੱਤਾ ਹੈ।

ਹਾਲਾਂਕਿ, ਅਗਲੀਆਂ ਫੈਡਰਲ ਚੋਣਾਂ ਤੱਕ ਸੰਸਦ ਮੈਂਬਰ ਵਜੋਂ ਬਣੇ ਰਹਿਣਗੇ। ਓ’ਰੀਗਨ ਨਿਊਫਾਊਂਡਲੈਂਡ-ਲੈਬਰਾਡੋਰ ਤੋਂ ਸੰਸਦ ਮੈਂਬਰ ਹਨ। ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵਲੋਂ ਸ਼ੁੱਕਰਵਾਰ ਉਨ੍ਹਾਂ ਦੇ ਸਥਾਨ ’ਤੇ ਕਿਸੇ ਹੋਰ ਨੂੰ ਮੰਤਰੀ ਬਣਾਏ ਜਾਣ ਦੀ ਘੋਸ਼ਣਾ ਕੀਤੇ ਜਾਣ ਦੀ ਉਮੀਦ ਹੈ।

ਓ’ਰੀਗਨ ਪਹਿਲੀ ਵਾਰ 2015 ਵਿਚ ਐੱਮ.ਪੀ. ਚੁਣੇ ਗਏ ਸਨ ਅਤੇ 2017 ਤੋਂ ਉਹ ਕੈਬਨਿਟ ਦਾ ਹਿੱਸਾ ਰਹੇ ਹਨ। ਕਿਰਤ ਮੰਤਰੀ ਵਜੋਂ ਉਨ੍ਹਾਂ ਨੇ 2021 ਵਿਚ ਜ਼ਿੰਮੇਵਾਰੀ ਸੰਭਾਲੀ ਸੀ। ਸਿਆਸਤ ਵਿਚ ਕਦਮ ਰੱਖਣ ਤੋਂ ਪਹਿਲਾਂ ਓ’ਰੀਗਨ ਸੀ. ਟੀ. ਵੀ. ਨਿਊਜ਼ ਦੇ ਸਵੇਰ ਦੇ ਸ਼ੋਅ ਕੈਨੇਡਾ ਏ.ਐੱਮ. ਦੇ ਹੋਸਟ ਅਤੇ ਚੈਨਲ ਦੇ ਰਾਸ਼ਟਰੀ ਪੱਤਰਕਾਰ ਸਨ। ਉਹ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੇ ਲੰਮੇ ਸਮੇਂ ਦੇ ਦੋਸਤ ਵੀ ਹਨ। 2005 ਵਿਚ ਉਹ ਟਰੂਡੋ ਦੀ ਵਿਆਹ ਦੀ ਪਾਰਟੀ ਵਿਚ ਸ਼ਾਮਲ ਹੋਏ ਸਨ।

ਗੌਰਤਲਬ ਹੈ ਕਿ ਟੋਰਾਂਟੋ ਦੀ ਜ਼ਿਮਨੀ ਚੋਣਾਂ ਵਿਚ ਹਾਰ ਤੋਂ ਬਾਅਦ ਭਲਕੇ ਲਿਬਰਲਸ ਦੀ ਪਹਿਲੀ ਕੈਬਨਿਟ ਮੀਟਿੰਗ ਹੈ ਅਤੇ ਓ’ਰੀਗਨ ਦਾ ਅਸਤੀਫਾ ਅਜਿਹੇ ਸਮੇਂ ਆਇਆ ਹੈ ਜਦੋਂ ਲਿਬਰਲਸ ਦੀ ਲੋਕਪ੍ਰਿਅਤਾ ਘੱਟ ਰਹੀ ਹੈ ਅਤੇ ਨੈਸ਼ਨਲ ਪੋਲ ਵਿਚ ਕੰਜ਼ਰਵੇਟਿਵਸ ਬਾਜ਼ੀ ਮਾਰ ਰਹੇ ਹਨ।