ਲੇਗੌਲਟ ਨੇ ਮਾਂਟਰੀਅਲ ਵਿੱਚ ਕੁਝ ਅਸਥਾਈ ਵਿਦੇਸ਼ੀ ਕਾਮਿਆਂ ’ਤੇ ਛੇ ਮਹੀਨਿਆਂ ਲਈ ਫ੍ਰੀਜ਼ ਦਾ ਕੀਤਾ ਐਲਾਨ

ਮਾਂਟਰੀਅਲ ਵਿਚ ਹੁਣ ਘੱਟ ਤਨਖ਼ਾਹ ਸਟਰੀਮ ਤਹਿਤ ਨਵੇਂ ਅਸਥਾਈ ਵਿਦੇਸ਼ੀ ਕਾਮਿਆਂ ਦੀ ਐਂਟਰੀ ਨਹੀਂ ਹੋਵੇਗੀ, ਕਿਊਬਿਕ ਦੇ ਪ੍ਰੀਮੀਅਰ ਫਰਾਂਕੋਇਸ ਲੇਗੌਲਟ ਨੇ ਅੱਜ ਇਸ ਸਬੰਧ ਵਿਚ ਕੁਝ ਅਸਥਾਈ ਵਿਦੇਸ਼ੀ ਕਰਮਚਾਰੀਆਂ ਦੀਆਂ ਅਰਜ਼ੀਆਂ ’ਤੇ 6 ਮਹੀਨੇ ਦੀ ਰੋਕ ਲਗਾਉਣ ਦੀ ਘੋਸ਼ਣਾ ਕਰ ਦਿੱਤੀ ਹੈ। ਉਨ੍ਹਾਂ ਕਿਹਾ ਕਿ ਇਹ ਰੋਕ ਨਵੀਆਂ ਅਰਜ਼ੀਆਂ ਅਤੇ ਨਵੀਨੀਕਰਨ ਦੋਵਾਂ ’ਤੇ ਲਾਗੂ ਹੋਵੇਗੀ। ਹਾਲਾਂਕਿ, ਨਰਸਾਂ, ਅਧਿਆਪਕ, ਉਸਾਰੀ ਕਾਮੇ, ਭੋਜਨ ਪਰਿਵਰਤਨ ਕਰਮਚਾਰੀ ਅਤੇ ਸਾਲ ਵਿਚ ਘੱਟੋ-ਘੱਟ $57,000 ਕਮਾਉਣ ਵਾਲੇ ਲੋਕਾਂ ਨੂੰ ਛੋਟ ਦਿੱਤੀ ਜਾਵੇਗੀ।

ਲੇਗੌਲਟ ਨੇ ਕਿਹਾ ਕਿ ਇਹ ਫੈਸਲਾ ਇਸ ਲਈ ਕੀਤਾ ਗਿਆ ਕਿਉਂਕਿ ਸੂਬੇ ਵਿਚ ਅਸਥਾਈ ਪ੍ਰਵਾਸੀ ਸਿਰਫ ਦੋ ਸਾਲਾਂ ਵਿਚ 300,000 ਤੋਂ ਦੁੱਗਣੇ ਹੋ ਕੇ 600,000 ਹੋ ਗਏ ਹਨ, ਜਿਸ ਕਾਰਨ ਹਾਊਸਿੰਗ ਦੇ ਨਾਲ-ਨਾਲ ਸਿਹਤ ਤੇ ਸਿੱਖਿਆ ਸੇਵਾਵਾਂ ’ਤੇ ਵੀ ਦਬਾਅ ਵੱਧ ਰਿਹਾ ਹੈ।

ਉਨ੍ਹਾਂ ਦੱਸਿਆ ਕਿ ਮਾਂਟਰੀਅਲ ਵਿਚ ਲਗਭਗ 12,000 ਅਸਥਾਈ ਵਿਦੇਸ਼ੀ ਕਾਮੇ ਹਨ ਅਤੇ ਸੂਬੇ ਦੇ ਦੋ-ਤਿਹਾਈ ਤੋਂ ਵੱਧ ਗੈਰ-ਸਥਾਈ ਨਿਵਾਸੀ ਫੈਡਰਲ ਸਰਕਾਰ ਦੇ ਅਧਿਕਾਰ ਖੇਤਰ ਵਿਚ ਆਉਂਦੇ ਹਨ ਜਿਨ੍ਹਾਂ ਦੀ ਗਿਣਤੀ ਨੂੰ 420,000 ਤੋਂ ਘਟਾ ਕੇ 210,000 ਕਰਨ ਦੀ ਅਪੀਲ ਕੀਤੀ ਗਈ ਹੈ।

ਲੇਗੌਲਟ ਨੇ ਇਹ ਵੀ ਕਿਹਾ ਕਿ ਆਉਣ ਵਾਲੇ ਮਹੀਨਿਆਂ ਵਿਚ ਸੂਬਾ ਇੱਕ ਬਿੱਲ ਵੀ ਪੇਸ਼ ਕਰਨ ਜਾ ਰਿਹਾ ਹੈ, ਜਿਸ ਤਹਿਤ ਸੂਬੇ ਨੂੰ ਕੁਝ ਸਕੂਲਾਂ ਵਿਚ ਇੰਟਰਨੈਸ਼ਨਲ ਸਟੂਡੈਂਟਸ ਦੀ ਗਿਣਤੀ ਨੂੰ ਸੀਮਤ ਕਰਨ ਦਾ ਅਧਿਕਾਰ ਮਿਲ ਜਾਵੇਗਾ।