ਲਿਬਰਲ ਪਾਰਟੀ ਨੇ ਵਿਦੇਸ਼ੀ ਦਖਲਅੰਦਾਜ਼ੀ ਦੇ ਦੋਸ਼ਾਂ ਵਿਚਕਾਰ ਚੰਦਰ ਆਰੀਆ ਨੂੰ ਬਾਹਰ ਕੱਢਣ ਦੀ ਦੱਸੀ ਵਜ੍ਹਾ

ਕੈਨੇਡਾ ਦੀ ਲਿਬਰਲ ਪਾਰਟੀ ਵਲੋਂ ਚੰਦਰ ਆਰੀਆ ਨੂੰ ਲੀਡਰਸ਼ਿਪ ਚੋਣ ਤੋਂ ਬਾਹਰ ਕਰਨ ਅਤੇ ਉਨ੍ਹਾਂ ਦੀ ਔਟਵਾ ਰਾਈਡਿੰਗ ਤੋਂ ਉਮੀਦਵਾਰੀ ਰੱਦ ਕਰਨ ਦਾ ਕਾਰਨ ਸਾਹਮਣੇ ਆਇਆ ਹੈ। ਰਿਪੋਰਟਸ ਮੁਤਾਬਕ, ਭਾਰਤ ਨਾਲ ਸਬੰਧਤ ਕਥਿਤ ਵਿਦੇਸ਼ੀ ਦਖਲਅੰਦਾਜ਼ੀ ਦੀਆਂ ਚਿੰਤਾਵਾਂ ਕਾਰਨ ਪਾਰਟੀ ਨੇ ਉਨ੍ਹਾਂ ਨੂੰ ਬਾਹਰ ਦਾ ਰਸਤਾ ਦਿਖਾਇਆ ਹੈ।

ਰਿਪੋਰਟ ਮੁਤਾਬਕ, ਆਰੀਆ ਪਿਛਲੇ ਅਗਸਤ ਵਿਚ ਭਾਰਤ ਦੀ ਯਾਤਰਾ 'ਤੇ ਗਏ ਸਨ ਅਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨਾਲ ਮੁਲਾਕਾਤ ਕੀਤੀ ਸੀ। ਗਲੋਬ ਐਂਡ ਮੇਲ ਦੀ ਰਿਪੋਰਟ ਮੁਤਾਬਕ, ਆਰੀਆ ਨੇ ਸਰਕਾਰ ਨੂੰ ਇਸ ਯਾਤਰਾ ਬਾਰੇ ਸੂਚਿਤ ਨਹੀਂ ਕੀਤਾ ਸੀ।

ਗੌਰਤਲਬ ਹੈ ਕਿ ਲਿਬਰਲਸ ਨੇ ਕਦੇ ਵੀ ਇਹ ਖੁਲਾਸਾ ਨਹੀਂ ਕੀਤਾ ਕਿ ਉਨ੍ਹਾਂ ਨੇ ਤਿੰਨ ਵਾਰ ਦੇ ਆਪਣੇ ਸੰਸਦ ਮੈਂਬਰ ਨੂੰ ਪਾਰਟੀ ਦੀ ਹਾਲੀਆ ਲੀਡਰਸ਼ਿਪ ਦੌੜ ਅਤੇ ਔਟਵਾ ਦੀ ਨੇਪੀਅਨ ਰਾਈਡਿੰਗ ਤੋਂ ਦੁਬਾਰਾ ਚੋਣ ਲੜਨ ਤੋਂ ਕਿਉਂ ਰੋਕਿਆ, ਉਨ੍ਹਾਂ ਦੀ ਇਸ ਰਾਈਡਿੰਗ ਤੋਂ ਮੌਜੂਦਾ ਸਮੇਂ ਪਾਰਟੀ ਲੀਡਰ ਮਾਰਕ ਕਾਰਨੀ ਚੋੜ ਲੜ ਰਹੇ ਹਨ।

ਰਿਪੋਰਟ ਮੁਤਾਬਕ, ਸੂਤਰ ਨੇ ਕਿਹਾ ਕਿ ਕੈਨੇਡੀਅਨ ਸੁਰੱਖਿਆ ਇੰਟੈਲੀਜੈਂਸ ਸਰਵਿਸ ਨੇ ਫੈਡਰਲ ਸਰਕਾਰ ਨੂੰ ਆਰੀਆ ਦੇ ਭਾਰਤ ਸਰਕਾਰ ਨਾਲ ਕਥਿਤ ਨਜ਼ਦੀਕੀ ਸਬੰਧਾਂ ਬਾਰੇ ਜਾਣਕਾਰੀ ਦਿੱਤੀ ਸੀ।