15.35C Vancouver 15.35C VancouverNov 29, 2024 12:56 PM - The Canadian Press
ਪੀ.ਐਮ.ਜਸਟਿਨ ਟਰੂਡੋ ਵਲੋਂ ਪ੍ਰਸਤਾਵਿਤ ਜੀ. ਐੱਸ. ਟੀ. ਛੋਟ ਲਾਗੂ ਹੋਣ ਦਾ ਰਾਹ ਪੱਧਰਾ ਹੋ ਗਿਆ ਹੈ। ਐਨ.ਡੀ.ਪੀ. ਦੀ ਸਪੋਰਟ ਨਾਲ ਇਹ ਬਿੱਲ ਵੀਰਵਾਰ ਦੇਰ ਰਾਤ ਹਾਊਸ ਆਫ ਕਾਮਨ ਵਿਚ ਪਾਸ ਹੋਇਆ, ਉਥੇ ਹੀ ਦੂਜੇ ਪਾਸੇ ਮੁੱਖ ਵਿਰੋਧੀ ਧਿਰ ਕੰਜ਼ਰਵੇਟਿਵ ਅਤੇ ਬਲਾਕ ਕਿਊਬੇਕੋਇਸ ਦੋਹਾਂ ਨੇ ਦੋ ਮਹੀਨਿਆਂ ਦੀ ਟੈਕਸ ਛੋਟ ਨੂੰ ਨੋਟੰਕੀ ਕਰਾਰ ਦਿੰਦੇ ਬਿੱਲ ਦੇ ਵਿਰੋਧ ਵਿਚ ਵੋਟ ਕੀਤੀ।
ਇਸ 'ਤੇ ਪੀ. ਐੱਮ. ਜਸਟਿਨ ਟਰੂਡੋ ਅਤੇ ਐਨ.ਡੀ.ਪੀ. ਲੀਡਰ ਜਗਮੀਤ ਸਿੰਘ ਨੇ ਪੀਅਰ ਪੌਲੀਐਵ 'ਤੇ ਹਮਲਾ ਬੋਲਦਿਆਂ ਉਨ੍ਹਾਂ ਅਤੇ ਉਨ੍ਹਾਂ ਦੀ ਕੰਜ਼ਰਵੇਟਿਵ ਪਾਰਟੀ ਨੂੰ ਮੱਧ ਵਰਗ ਕੈਨੇਡੀਅਨ ਦੇ ਵਿਰੋਧੀ ਦੱਸਿਆ। ਜਗਮੀਤ ਸਿੰਘ ਨੇ ਕਿਹਾ ਕਿ ਕੰਜ਼ਰਵੇਟਿਵ ਨੇ ਇਸ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ ਪਰ ਅਸੀਂ ਉਨ੍ਹਾਂ ਨੂੰ ਹਰਾ ਦਿੱਤਾ।
ਦੱਸਣਯੋਗ ਹੈ ਕਿ 14 ਦਸੰਬਰ ਤੋਂ ਲਾਗੂ ਹੋ ਰਹੀ ਜੀ.ਐਸ.ਟੀ. ਛੋਟ ਵਿਚ 15 ਫਰਵਰੀ 2025 ਤੱਕ ਦਰਜਨਾਂ ਚੀਜ਼ਾਂ 'ਤੇ ਟੈਕਸ ਛੋਟ ਮਿਲੇਗੀ। ਇਸ ਨਾਲ ਸਰਕਾਰੀ ਖਜ਼ਾਨੇ 'ਤੇ $1.6-ਬਿਲੀਅਨ ਦਾ ਬੋਝ ਪੈਣ ਦੀ ਉਮੀਦ ਜਤਾਈ ਗਈ ਹੈ। ਕੈਨੇਡੀਅਨ ਨੂੰ ਜਿਨ੍ਹਾਂ ਚੀਜ਼ਾਂ 'ਤੇ ਟੈਕਸ ਛੋਟ ਮਿਲੇਗੀ ਉਨ੍ਹਾਂ ਵਿਚ ਕ੍ਰਿਸਮਸ ਦੇ ਰੁੱਖ ਬੱਚਿਆਂ ਦੇ ਡਾਇਪਰ, ਕੱਪੜੇ ਤੇ ਖਿਡੌੜੇ, ਜੰਕ ਫੂਡ, ਬੀਅਰ, ਵਾਈਨ ਅਤੇ ਰੈਸਟੋਰੈਂਟ ਵਿਚ ਮਿਲਣ ਵਾਲਾ ਖਾਣਾ ਸ਼ਾਮਲ ਹਨ।
