15.6C Vancouver 15.6C VancouverJan 15, 2025 12:58 PM - The Canadian Press
ਕੈਨੇਡਾ ਵਿਚ ਜਲਦ ਸੰਭਾਵੀ ਚੋਣਾਂ ਤੋਂ ਪਹਿਲਾਂ ਲਿਬਰਲ ਪਾਰਟੀ ਜਿੱਥੇ ਪੀ. ਐੱਮ. ਜਸਟਿਨ ਟਰੂਡੋ ਦੀ ਜਗ੍ਹਾ ਨਵੇਂ ਲੀਡਰ ਦੀ ਚੋਣ ਨਾਲ ਜੂਝ ਰਹੀ ਹੈ, ਉਥੇ ਹੀ ਉਮੀਦਵਾਰਾਂ ਦੀ ਨਾਮਜ਼ਦਗੀ ਵਿਚ ਵੀ ਇਹ ਪੀਅਰੇ ਪੋਇਲੀਵਰ ਦੀ ਕੰਜ਼ਰਵੇਟਿਵ ਪਾਰਟੀ ਤੋਂ ਕਿਤੇ ਪਿੱਛੇ ਹੈ।
ਬੀਤੇ ਇੱਕ ਸਾਲ ਵਿਚ ਸੱਤਾਧਰੀ ਲਿਬਰਲ ਪਾਰਟੀ ਦੇ ਕਈ ਮਿਨਿਸਟਰ ਅਗਲੀਆਂ ਚੋਣਾਂ ਨਾ ਲੜਨ ਦੀ ਘੋਸ਼ਣਾ ਕਰ ਚੁੱਕੇ ਹਨ, ਅਜਿਹੇ ਮਾਹੌਲ ਵਿਚ ਲਿਬਰਲ ਪਾਰਟੀ ਦੇ ਅਗਲੇ ਲੀਡਰ ਨੂੰ ਅਹੁਦਾ ਸੰਭਾਲਦੇ ਹੀ ਇਸ ਗੱਲ ਨੂੰ ਵਧੇਰੇ ਯਕੀਨੀ ਬਣਾਉਣਾ ਪਵੇਗਾ ਕਿ ਪਾਰਟੀ ਜਲਦੀ ਚੋਣਾਂ ਲਈ ਤਿਆਰ ਹੈ। ਲਿਬਰਲ ਕੋਲ ਹੁਣ ਤੱਕ 343 ਫੈਡਰਲ ਰਾਈਡਿੰਗਜ਼ ਵਿਚੋਂ 129 ਉਮੀਦਵਾਰ ਹਨ, ਜਦੋਂ ਕਿ ਕੰਜ਼ਰਵੇਟਿਵ 221 ਉਮੀਦਵਾਰਾਂ ਦੀ ਲਿਸਟ ਨਾਲ ਸਭ ਤੋਂ ਮੋਹਰੀ ਚੱਲ ਰਹੀ ਹੈ, ਉਥੇ ਹੀ ਜਗਮੀਤ ਸਿੰਘ ਦੀ ਨਿਊ ਡੈਮੋਕਰੇਟਸ ਕੋਲ ਹੁਣ ਤੱਕ 93 ਉਮੀਦਵਾਰ ਹਨ।
ਰਾਜਨੀਤਿਕ ਮਾਹਰਾਂ ਦਾ ਕਹਿਣਾ ਹੈ ਕਿ ਲਿਬਰਲਸ ਲਈ ਨਵੇਂ ਲੀਡਰ ਦੀ ਚੋਣ ਕਰਨੀ ਮੁਸ਼ਕਲ ਨਹੀਂ ਹੋਵੇਗੀ ਪਰ ਉਸ ਲਈ ਵੱਡੀ ਚੁਣੌਤੀ ਇੱਕ ਅਜਿਹੇ ਫੇਸ ਦੀ ਹੋਵੇਗੀ ਜੋ ਜਨਤਾ ਦੇ ਦਿਲਾਂ 'ਤੇ ਛਾਪ ਛੱਡ ਸਕੇ, ਉਹ ਵੀ ਉਸ ਸਮੇਂ ਜਦੋਂ ਹੁਣ ਤੱਕ ਦੇ ਚੋਣ ਸਰਵਿਆਂ ਵਿਚ ਕੰਜ਼ਰਵੇਟਿਵ ਲਿਬਰਲਸ 'ਤੇ ਦੋਹਰੇ ਅੰਕਾਂ ਦੀ ਬੜ੍ਹਤ ਬਣਾਏ ਹੋਏ ਹਨ।
