ਭਾਰਤ ਦੇ ਵੱਖੋ-ਵੱਖਰੇ ਇਲਾਕਿਆਂ 'ਚ ਟਿੱਡੀ ਦਲ ਦਾ ਕਹਿਰ 

ਭਾਰਤ ਦੇ ਕਈ ਸੂਬਿਆਂ 'ਚ ਟਿੱਡੀ ਦਲ ਨੇ ਲੋਕਾਂ ਅਤੇ ਪ੍ਰਸ਼ਾਸਨ ਲਈ ਪ੍ਰੇਸ਼ਾਨੀ ਖੜੀ ਕੀਤੀ ਹੋਈ ਹੈ। ਅੱਜ ਪੰਜਾਬ ਸਮੇਤ ਰਾਜਸਥਾਨ ਅਤੇ ਮੱਧ ਪ੍ਰਦੇਸ਼ 'ਚ ਟਿੱਡੀ ਦਲ 'ਤੇ ਕਾਬੂ ਪਾਉਣ ਸੰਬੰਧੀ ਕਾਰਵਾਈਆਂ ਜਾਰੀ ਰਹੀਆਂ। ਟਿੱਡੀ ਦਲ ਦੇ ਹਮਲੇ ਭਾਰਤ ਦੇ ਵੱਖੋ-ਵੱਖਰੇ ਸੂਬਿਆਂ 'ਚ ਜਾਰੀ ਹਨ। ਰਾਜਸਥਾਨ 'ਚ ਜੈਪੁਰ, ਦੌਸਾ, ਬੀਕਾਨੇਰ, ਜੋਧਪੁਰ, ਬਾਰਮੇਰ, ਚਿਤੌੜਗੜ੍ਹ ਅਤੇ ਸ਼੍ਰੀ ਗੰਗਾਨਗਰ ਜਿਹੇ ਜ਼ਿਲ੍ਹਿਆਂ 'ਚ ਟਿੱਡੀ ਦਲ ਤੋਂ ਬਚਾਅ ਸੰਬੰਧੀ ਕਾਰਜ ਜਾਰੀ ਰਹੇ। ਮੰਤਰਾਲੇ ਵੱਲੋਂ ਜਾਣਕਾਰੀ ਜਾਰੀ ਕੀਤੀ ਗਈ ਕਿ ਮੱਧ ਪ੍ਰਦੇਸ਼ 'ਚ ਸਤਨਾ, ਬਾਲਾਘਾਟ, ਨਿਵਾਰੀ, ਰਾਏਸਨ ਅਤੇ ਸ਼ਿਵਪੁਰੀ ਦੇ ਜ਼ਿਲ੍ਹਿਆਂ 'ਚ ਟਿੱਡੀ ਦਲ ਦੇ ਹਮਲਿਆਂ ਦੌਰਾਨ ਫਸਲਾਂ ਦਾ ਨੁਕਸਾਨ ਹੋਣ ਤੋਂ ਬਚਾਅ ਰਿਹਾ।

ਪੰਜਾਬ 'ਚ ਟਿੱਡੀ ਦਲ ਕਾਰਨ ਐਲਰਟ

ਪੰਜਾਬ 'ਚ ਵੀ ਟਿੱਡੀ ਦਲ ਨੂੰ ਲੈ ਕੇ ਅਲਰਟ ਜਾਰੀ ਕੀਤਾ ਗਿਆ ਹੈ। ਖੇਤੀਬਾੜੀ ਮੰਤਰਾਲੇ ਦੇ ਅਧਿਕਾਰੀਆਂ ਨੇ ਸਾਰੇ ਜ਼ਿਲ੍ਹਿਆਂ ਦੇ ਡੀ.ਸੀ. ਅਲਰਟ ਕੀਤੇ ਹਨ। ਇਸ ਦੇ ਨਾਲ ਹੀ ਟਿੱਡੀਆਂ ਨੂੰ ਭਜਾਉਣ ਲਈ ਸਪਰੇਅ ਦਾ ਪ੍ਰਬੰਧ, ਜ਼ਿਲ੍ਹਾ ਹੈੱਡਕੁਆਰਟਰ 'ਚ ਕੀਤਾ ਗਿਆ ਹੈ।

377 ਥਾਵਾਂ 'ਤੇ ਪੂਰੇ ਹੋ ਚੁੱਕੇ ਬਚਾਅ ਕਾਰਜ

ਭਾਰਤ 'ਚ ਟਿੱਡੀਆਂ ਪਾਕਿਸਤਾਨ ਤੋਂ ਆਉਂਦੀਆਂ ਹਨ। ਪਾਕਿਸਤਾਨ 'ਚ ਇਹ ਇਰਾਨ ਰਾਹੀਂ ਆਉਂਦੀਆਂ ਹਨ।

ਵੀਰਵਾਰ ਤੱਕ ਭਾਰਤ 'ਚ 377 ਥਾਵਾਂ 'ਤੇ 53,977 ਹੈਕਟੇਅਰ 'ਚ ਟਿੱਡੀ ਦਲ ਤੋਂ ਬਚਾਅ ਸੰਬੰਧੀ ਕੰਮ ਕੀਤਾ ਗਿਆ ਦੱਸਿਆ ਜਾ ਰਿਹਾ ਹੈ। ਇਸ ਸੰਬੰਧੀ ਕੰਮ 11 ਅਪ੍ਰੈਲ ਤੋਂ ਹੀ ਸ਼ੁਰੂ ਹੋ ਗਏ ਸਨ।