ਮਮਤਾ ਬੈਨਰਜੀ ਨੇ ਪੱਛਮੀ ਬੰਗਾਲ ਦੇ ਗਵਰਨਰ 'ਤੇ ਕੱਸਿਆ ਨਿਸ਼ਾਨਾ

ਪੱਛਮੀ ਬੰਗਾਲ ਦੇ ਰਾਜਪਾਲ ਜਗਦੀਪ ਧਨਖੜ 'ਤੇ ਤਿੱਖਾ ਹਮਲਾ ਕਰਦਿਆਂ ਮੁੱਖ ਮੰਤਰੀ ਮਮਤਾ ਬੈਨਰਜੀ ਨੇ ਸੋਮਵਾਰ ਨੂੰ ਕਿਹਾ ਕਿ ਉਹ ਇੱਕ ਭ੍ਰਿਸ਼ਟ ਵਿਅਕਤੀ ਹਨ ਜਿਨ੍ਹਾਂ ਦਾ ਨਾਮ 1996 ਵਿੱਚ ਹਵਾਲਾ ਜੈਨ ਮਾਮਲੇ ਵਿੱਚ ਚਾਰਜਸ਼ੀਟ ਕੀਤਾ ਗਿਆ ਸੀ।

ਪੱਤਰਕਾਰਾਂ ਨੂੰ ਜਾਣਕਾਰੀ ਦਿੰਦੇ ਹੋਏ ਮੁੱਖ ਮੰਤਰੀ ਨੇ ਕਿਹਾ, "ਰਾਜਪਾਲ (ਜਗਦੀਪ ਧਨਖੜ) ਇੱਕ ਭ੍ਰਿਸ਼ਟ ਆਦਮੀ ਹੈ। ਉਸ ਦਾ ਨਾਮ 1996 ਵਿੱਚ ਹਵਾਲਾ ਜੈਨ ਮਾਮਲੇ ਦੀ ਚਾਰਜਸ਼ੀਟ ਵਿੱਚ ਸੀ। ਉਸ ਦੇ ਖਿਲਾਫ ਕੇਸ ਵਿਚਾਰ ਅਧੀਨ ਹਨ। ਮੈਂ ਪੱਛਮੀ ਬੰਗਾਲ ਦੇ ਰਾਜਪਾਲ ਨੂੰ ਹਟਾਉਣ ਲਈ ਤਿੰਨ ਪੱਤਰ ਲਿਖੇ ਹਨ।"

ਖਾਸ ਗੱਲ ਇਹ ਹੈ ਕਿ ਹਵਾਲਾ ਘੁਟਾਲੇ, ਜਿਸ ਨੂੰ ਜੈਨ ਡਾਇਰੀਜ਼ ਕੇਸ ਵੀ ਕਿਹਾ ਜਾਂਦਾ ਹੈ, ਨੱਬੇ ਵਿਆਂ ਦੇ ਅੱਧ ਵਿਚ ਸੁਰਖੀਆਂ ਵਿਚ ਰਿਹਾ। ਇਹ ਮਾਮਲਾ ਸਿਆਸਤਦਾਨਾਂ ਵੱਲੋਂ ਹਵਾਲਾ ਦਲਾਲਾਂ, ਜਾਨੀ ਜੈਨ ਭਰਾਵਾਂ ਰਾਹੀਂ ਕਥਿਤ ਤੌਰ 'ਤੇ ਪੈਸੇ ਹੜੱਪਣ ਨਾਲ ਸਬੰਧਤ ਸੀ। ਇਹ ਘੁਟਾਲਾ 18 ਮਿਲੀਅਨ ਅਮਰੀਕੀ ਡਾਲਰ ਦਾ ਸੀ ਜਿਸ ਵਿੱਚ ਦੇਸ਼ ਦੇ ਕੁਝ ਪ੍ਰਮੁੱਖ ਸਿਆਸਤਦਾਨਾਂ ਦੇ ਨਾਮ ਸ਼ਾਮਲ ਸਨ।

ਜੁਲਾਈ 2019 ਵਿੱਚ ਰਾਜ ਵਿੱਚ ਨਿਯੁਕਤੀ ਤੋਂ ਬਾਅਦ ਪੱਛਮੀ ਬੰਗਾਲ ਦੇ ਰਾਜਪਾਲ ਜਗਦੀਪ ਧਨਖੜ ਅਤੇ ਮੁੱਖ ਮੰਤਰੀ ਮਮਤਾ ਬੈਨਰਜੀ ਲਗਾਤਾਰ ਝਗੜੇ ਵਿੱਚ ਸ਼ਾਮਲ ਰਹੇ ਹਨ।

ਬੈਨਰਜੀ ਨੇ ਧਨਖੜ 'ਤੇ ਪ੍ਰੋਟੋਕੋਲਾਂ ਦੀ ਉਲੰਘਣਾ ਕਰਨ ਅਤੇ ਸ਼ਾਸਨ ਵਿੱਚ ਦਖਲ ਅੰਦਾਜ਼ੀ ਦਾ ਦੋਸ਼ ਲਾਇਆ। ਦੂਜੇ ਪਾਸੇ, ਧਨਖੜ ਨੇ ਮੁੱਖ ਮੰਤਰੀ 'ਤੇ ਦੋਸ਼ ਲਾਇਆ ਹੈ ਕਿ ਉਹ ਆਪਣੇ ਸੰਵਿਧਾਨਕ ਕਰਤੱਵਾਂ ਦੀ ਪਾਲਣਾ ਨਹੀਂ ਕਰ ਰਹੇ। 2021 ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਬਾਅਦ ਦੋਵਾਂ ਵਿਚਕਾਰ ਝਗੜਾ ਹੋਰ ਤੀਬਰ ਹੋ ਗਿਆ ਹੈ। ਬੈਨਰਜੀ ਨੇ ਕਈ ਮੌਕਿਆਂ 'ਤੇ ਦੋਸ਼ ਲਾਇਆ ਕਿ ਰਾਜਪਾਲ ਕੇਂਦਰ ਵਿੱਚ ਸੱਤਾਧਾਰੀ ਭਾਜਪਾ ਦੇ ਇਸ਼ਾਰੇ 'ਤੇ ਕੰਮ ਕਰ ਰਹੇ ਹਨ।