ਮਾਰਕ ਕਾਰਨੀ ਲਿਬਰਲ ਪਾਰਟੀ ਦਾ ਲੀਡਰ ਬਣਨ ਦੀ ਦੌੜ ਵਿਚ ਸ਼ਾਮਲ ਹੋਣ ਦੀ ਤਿਆਰੀ ਵਿਚ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀ ਜਗ੍ਹਾ ਲੈਣ ਲਈ ਬੈਂਕ ਆਫ਼ ਕੈਨੇਡਾ ਅਤੇ ਬੈਂਕ ਆਫ਼ ਇੰਗਲੈਂਡ ਦੇ ਸਾਬਕਾ ਗਵਰਨਰ ਮਾਰਕ ਕਾਰਨੀ ਲਿਬਰਲ ਪਾਰਟੀ ਦਾ ਲੀਡਰ ਬਣਨ ਦੀ ਦੌੜ ਵਿਚ ਸ਼ਾਮਲ ਹੋਣ ਦੀ ਤਿਆਰੀ ਵਿਚ ਹਨ।

ਸੂਤਰਾਂ ਮੁਤਾਬਕ ਉਹ ਆਪਣੇ ਜੱਦੀ ਸ਼ਹਿਰ ਐਡਮਿੰਟਨ ਤੋਂ ਵੀਰਵਾਰ ਨੂੰ ਮੁਹਿੰਮ ਨੂੰ ਸ਼ੁਰੂ ਕਰਨਗੇ। ਪੀਐੱਮ ਜਸਟਿਨ ਟਰੂਡੋ ਵਲੋਂ ਅਸਤੀਫਾ ਦੇਣ ਦੇ ਐਲਾਨ ਤੋਂ ਬਾਅਦ ਕਾਰਨੀ ਉਨ੍ਹਾਂ 7 ਸੰਭਾਵਿਤ ਲਿਬਰਲ ਉਮੀਦਵਾਰਾਂ ਵਿਚੋਂ ਇਕ ਹਨ, ਜਿਨ੍ਹਾਂ ਨੇ ਪਾਰਟੀ ਦੀ ਵੈੱਬਸਾਈਟ ’ਤੇ ਦਸਤਖਤ ਇਕੱਠੇ ਕਰਨ ਲਈ ਫਾਰਮ ਪੋਸਟ ਕੀਤੇ ਹਨ।

59 ਸਾਲਾ ਕਾਰਨੀ ਦੇ ਪਿਤਾ ਬੌਬ ਕਾਰਨੀ 1980 ਵਿਚ ਲਿਬਰਲ ਲਈ ਐਡਮਿੰਟਨ-ਦੱਖਣ ਦੀ ਰਾਈਡਿੰਗ ਤੋਂ ਚੋਣ ਲੜੇ ਸਨ। ਇਸ ਵਿਚਕਾਰ ਕਾਰਨੀ ਨੇ ਇੱਕ ਇੰਟਰਵਿਊ ਵਿਚ ਕਿਹਾ ਕਿ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੇ ਅਸਤੀਫ਼ਾ ਦੇਣ ਦੇ ਫੈਸਲੇ ਨਾਲ ਅਗਲੀਆਂ ਫੈਡਰਲ ਚੋਣਾਂ ਵਿਚ ਪਾਰਟੀ ਦੇ ਸੱਤਾ ਵਿਚ ਮੁੜ ਵਾਪਸੀ ਦੀ ਸੰਭਾਵਨਾ ਵਧੀ ਹੈ।

ਗੌਰਤਲਬ ਹੈ ਕਿ ਕਾਰਨੀ ਐਡਮਿੰਟਨ ਦੇ ਜਮਪਲ ਹਨ। ਪੀਐੱਮ ਟਰੂਡੋ ਨੇ ਉਨ੍ਹਾਂ ਨੂੰ ਪਿਛਲੇ ਸਾਲ ਲਿਬਰਲ ਪਾਰਟੀ ਦੀ ਇਕਨਾਮਿਕ ਟਾਸਕ ਫੋਰਸ ਦੇ ਮੁਖੀ ਨਿਯੁਕਤ ਕੀਤਾ ਸੀ ਅਤੇ ਉਨ੍ਹਾਂ ਨੂੰ ਸਿੱਧੇ ਸਰਕਾਰ ਵਿਚ ਸ਼ਾਮਲ ਕਰਨ ਦੀ ਕੋਸ਼ਿਸ਼ ਵੀ ਚੱਲਦੀ ਰਹੀ ਹੈ।