ਲਿਬਰਲ ਪਾਰਟੀ ਦੀ ਲੀਡਰਸ਼ਿਪ ਲਈ ਮਾਰਕ ਕਾਰਨੀ ਨੇ ਜੁਟਾਇਆ ਸਭ ਤੋਂ ਵੱਧ ਫੰਡ

ਪੀ. ਐੱਮ. ਟਰੂਡੋ ਦੀ ਜਗ੍ਹਾ ਲੈਣ ਲਈ ਲਿਬਰਲ ਪਾਰਟੀ ਦੀ ਲੀਡਰਸ਼ਿਪ ਦੌੜ ਵਿਚ ਅੱਗੇ ਮੰਨੇ ਜਾ ਰਹੇ ਸਾਬਕਾ ਬੈਂਕਰ ਮਾਰਕ ਕਾਰਨੀ ਫੰਡ ਜੁਟਾਉਣ ਦੇ ਮਾਮਲੇ ਵਿਚ ਦੂਜੇ ਉਮੀਦਵਾਰਾਂ ’ਤੇ ਹਾਵੀ ਸਾਬਤ ਹੋਏ ਹਨ। ਇਲੈਕਸ਼ਨਜ਼ ਕੈਨੇਡਾ ਵਲੋਂ ਪਬਲਿਸ਼ ਕੀਤੇ ਗਏ ਅੰਕੜਿਆਂ ਤੋਂ ਪਤਾ ਚੱਲਦਾ ਹੈ ਕਿ ਕਾਰਨੀ ਨੇ ਆਪਣੀ ਲੀਡਰਸ਼ਿਪ ਰੇਸ ਲਈ $1.9 ਮਿਲੀਅਨ ਜੁਟਾਏ ਹਨ, ਜੋ ਕਿ ਉਨ੍ਹਾਂ ਦੇ ਨਜ਼ਦੀਕੀ ਮੁਕਾਬਲੇਬਾਜ਼ ਵਲੋਂ ਜੁਟਾਏ ਗਏ ਫੰਡ ਤੋਂ ਅੱਠ ਗੁਣਾ ਜ਼ਿਆਦਾ ਹੈ।

ਇਲੈਕਸ਼ਨਜ਼ ਡਿਪਾਰਟਮੈਂਟ ਦੇ ਅੰਕੜਿਆਂ ਮੁਤਾਬਕ, ਲਿਬਰਲ ਪਾਰਟੀ ਦੀ ਸਾਬਕਾ ਹਾਊਸ ਲੀਡਰ ਕਰੀਨਾ ਗੂਲਡ ਨੇ ਕਰੀਬ 600 ਦਾਨੀਆਂ ਤੋਂ ਲਗਭਗ $236,000 ਇਕੱਠੇ ਕੀਤੇ, ਜਦੋਂ ਕਿ ਮਾਂਟਰੀਅਲ ਦੇ ਕਾਰੋਬਾਰੀ ਫਰੈਂਕ ਬੇਲਿਸ ਨੇ 59 ਲੋਕਾਂ ਤੋਂ $227,000 ਜੁਟਾਏ। ਉਥੇ ਹੀ, ਸਾਬਕਾ ਵਿੱਤ ਮੰਤਰੀ ਕ੍ਰਿਸਟੀਆ ਫ੍ਰੀਲੈਂਡ ਜਿਨ੍ਹਾਂ ਨੂੰ ਲੀਡਰਸ਼ਿਪ ਰੇਸ ਵਿਚ ਕਾਰਨੀ ਦੀ ਮੁੱਖ ਵਿਰੋਧੀ ਮੰਨਿਆ ਜਾਂਦਾ ਹੈ, ਉਹ 300 ਦਾਨੀਆਂ ਤੋਂ ਲਗਭਗ $227,000 ਹੀ ਜੁਟਾ ਸਕੇ, ਜਦੋਂ ਕਿ ਰੂਬੀ ਢੱਲਾ- $115,000 ਦਾ ਫੰਡ ਜੁਟਾਉਣ ਨਾਲ ਅੰਤਿਮ ਸਥਾਨ ’ਤੇ ਰਹੀ।

ਇਹ ਡੇਟਾ ਲੀਡਰਸ਼ਿਪ ਮੁਕਾਬਲੇ ਦੇ ਪਹਿਲੇ ਦਿਨ ਤੋਂ ਲੈ ਕੇ 9 ਮਾਰਚ ਨੂੰ ਪਾਰਟੀ ਦੇ ਵੋਟਿੰਗ ਦਿਨ ਤੋਂ 4 ਹਫ਼ਤੇ ਪਹਿਲਾਂ ਤੱਕ ਸਮਰਥਕਾਂ ਤੋਂ ਇਕੱਠੇ ਕੀਤੇ ਗਏ ਫੰਡ ਨੂੰ ਕਵਰ ਕਰਦਾ ਹੈ।