9.57C Vancouver 9.57C VancouverAug 6, 2025 7:22 PM - The Canadian Press
ਕੈਨੇਡਾ ਅਮਰੀਕਾ ਬਾਰਡਰ ਨੇੜੇ 44 ਵਿਦੇਸ਼ੀ ਨਾਗਰਿਕਾਂ ਦੀ ਤਸਕਰੀ ਮਾਮਲੇ ਵਿਚ ਗ੍ਰਿਫਤਾਰ ਕੀਤੇ ਗਏ ਤਿੰਨ ਤਸਕਰਾਂ ਨੂੰ ਜ਼ਮਾਨਤ ਨਹੀਂ ਮਿਲ ਸਕੀ, ਉਹ ਅਗਲੀ ਪੇਸ਼ੀ ਤੱਕ ਹਿਰਾਸਤ ਵਿਚ ਰਹਿਣਗੇ। ਕਿਊਬੈਕ ਵਿਚ ਅਮਰੀਕਾ ਦੀ ਸਰਹੱਦ ਨਾਲ ਲੱਗਦੇ ਟਾਊਨ ਸਟੈਨਸਟੇਡ ਵਿਚ ਸ਼ਨੀਵਾਰ ਅਤੇ ਐਤਵਾਰ ਦੀ ਦਰਿਮਆਨੀ ਰਾਤ ਕਰੀਬ 2.20 ਵਜੇ ਇੱਕ ਕਿਊਬ ਵੈਨ ਫੜ੍ਹੀ ਗਈ ਸੀ, ਜਿਸ ਵਿਚ 44 ਪ੍ਰਵਾਸੀ ਤੰਗ ਹਾਲਤ ਵਿਚ ਸਨ ਅਤੇ ਉਨ੍ਹਾਂ ਲਈ ਸਾਹ ਲੈਣ ਲਈ ਵੀ ਜਗ੍ਹਾ ਨਹੀਂ ਸੀ।
ਇਹਨਾਂ ਵਿਚ ਜ਼ਿਆਦਾਤਰ ਹੈਤੀਅਨ ਨਾਗਰਿਕ ਸਨ, ਜਿਨ੍ਹਾਂ ਵਿਚ ਇੱਕ ਗਰਭਵਤੀ ਔਰਤ ਅਤੇ 4 ਸਾਲ ਤੱਕ ਦੇ ਬੱਚੇ ਵੀ ਸ਼ਾਮਲ ਸਨ, ਜੋ ਡੀਹਾਈਡਰੇਸ਼ਨ ਦਾ ਸਾਹਮਣਾ ਕਰ ਰਹੇ ਸਨ।
ਇਸ ਮਾਮਲੇ ਵਿਚ 25 ਸਾਲਾ ਓਗੁਲਕਨ ਮਰਸਿਨ ਅਤੇ 31-31 ਸਾਲ ਦੇ ਦੋ ਹੋਰ ਸ਼ੱਕੀ ਡੋਗਨ ਅਲਾਕਸ ਅਤੇ ਫਿਰਤ ਯੂਕਸੇਕ ਦੀ ਅੱਜ ਸ਼ੇਰਬਰੂਕ ਕੋਰਟ ਵਿਚ ਪੇਸ਼ੀ ਹੋਈ। ਵਕੀਲ ਨੇ ਉਨ੍ਹਾਂ ਦੀ ਰਿਹਾਈ ਦਾ ਵਿਰੋਧ ਕੀਤਾ, ਜਿਸ ਮਗਰੋਂ ਅਗਲੀ ਪੇਸ਼ੀ ਦੀ ਤਾਰੀਖ਼ 28 ਅਗਸਤ ਤੈਅ ਕੀਤੀ ਗਈ ਹੈ।
