ਮਿਸ਼ਨ ਆਰ.ਸੀ.ਐਮ.ਪੀ. ਨੇ ਗੈਰ-ਕਾਨੂੰਨੀ ਤੌਰ ‘ਤੇ ਸ਼ੂਟਿੰਗ ਕਰਨ ਵਾਲਿਆਂ ਵਿਰੁੱਧ ਕੀਤੀ ਕਾਰਵਾਈ, ਕਈ ਨੌਜਵਾਨਾਂ ਨੂੰ ਕੀਤਾ ਕਾਬੂ

ਮਿਸ਼ਨ ਆਰ.ਸੀ.ਐਮ.ਪੀ. ਨੇ ਲੌਸਟ ਕਰੀਕ ਫੋਰੈਸਟ ਸਰਵਿਸ ਰੋਡ ਵਿਚ ਗੈਰ-ਕਾਨੂੰਨੀ ਤੌਰ ‘ਤੇ ਸ਼ੂਟਿੰਗ ਕਰਨ ਵਾਲਿਆਂ ਵਿਰੁੱਧ ਕਾਰਵਾਈ ਕਰਦਿਆਂ ਪਿਛਲੇ ਹਫ਼ਤੇ ਕਈ ਨੌਜਵਾਨਾਂ ਨੂੰ ਕਾਬੂ ਕੀਤਾ ਹੈ ਅਤੇ ਉਨ੍ਹਾਂ ਕੋਲੋਂ ਹਥਿਆਰ ਜ਼ਬਤ ਕੀਤੇ ਹਨ। 13 ਜੂਨ ਦੀ ਸ਼ਾਮ ਅਤੇ ਉਸ ਤੋਂ ਅਗਲੇ ਦਿਨ ਵੱਖ-ਵੱਖ ਕਾਰਵਾਈਆਂ ਦੌਰਾਨ ਪੁਲਿਸ ਨੇ ਸਰੀ, ਡੈਲਟਾ, ਐਬਟਸਫੋਰਡ ਅਤੇ ਨੋਵਾ ਸਕੋਸ਼ੀਆ ਦੇ ਨੌਜਵਾਨਾਂ ਨੂੰ ਫੜਿਆ, ਜਿਨ੍ਹਾਂ ਵਿਚੋਂ ਕੁਝ ਨੌਜਵਾਨ ਉੱਥੇ ਇੱਕ rap ਵੀਡੀਓ ਫਿਲਮਾਉਣ ਆਏ ਸਨ ਜਦੋਂ ਕਿ ਇੱਕ ਗਰੁੱਪ ਕੋਲੋਂ ਗੈਰ-ਕਾਨੂੰਨੀ ਹਥਿਆਰਾਂ ਦੇ ਨਾਲ-ਨਾਲ ਗੱਡੀਆਂ ਵਿਚ ਖੁੱਲ੍ਹੀ ਸ਼ਰਾਬ ਵੀ ਬਰਾਮਦ ਹੋਈ।

ਪੁਲਿਸ ਨੇ ਇਨ੍ਹਾਂ ਸਾਰੇ ਮਾਮਲਿਆਂ ਵਿਚ ਕਾਰਵਾਈ ਕਰਦੇ ਹੋਏ ਰਾਈਫਲਾਂ, ਸ਼ਾਟਗਨ ਅਤੇ ਇੱਕ ਪਾਬੰਦੀਸ਼ੁਦਾ ਹਥਿਆਰ ਸਮੇਤ 15 ਗੰਨਜ਼ ਜ਼ਬਤ ਕੀਤੀਆਂ ਅਤੇ ਐਬਟਸਫੋਰਡ ਦੇ ਦੋ 21 ਸਾਲਾ ਨੌਜਵਾਨਾਂ ਨੂੰ ਨੌ ਸ਼ੂਟਿੰਗ ਏਰੀਏ ਵਿਚ ਫਾਇਰਿੰਗ ਕਰਨ ਲਈ $690 ਦਾ ਜੁਰਮਾਨਾ ਕੀਤਾ। ਡੈਲਟਾ ਦੇ ਇੱਕ 27 ਸਾਲਾ ਅਤੇ ਸਰੀ ਦੇ ਇੱਕ 26 ਸਾਲਾ ਨੌਜਵਾਨ ਕੋਲੋਂ 4 ਗੰਨ ਜ਼ਬਤ ਹੋਈਆਂ, ਜੋ ਮੌਕੇ 'ਤੇ ਫਾਇਰਿੰਗ ਕਰ ਰਹੇ ਸਨ। ਇਸ ਤੋਂ ਪੁਲਿਸ ਨੇ ਸਰੀ ਅਤੇ ਨੋਵਾ ਸਕੋਸ਼ੀਆ ਦੇ ਦੋ ਹੋਰ ਨੌਜਵਾਨਾਂ 'ਤੇ ਕਾਰਵਾਈ ਕੀਤੀ, ਜੋ ਸ਼ਾਟਗਨ ਨਾਲ ਉਥੇ ਮੌਜੂਦ ਸਨ।

ਮਿਸ਼ਨ ਪੁਲਿਸ ਨੇ ਕਿਹਾ ਕਿ ਫੋਰੈਸਟ ਸਰਵਿਸ ਰੋਡ ਇਲਾਕੇ ਵਿਚ ਸੜਕ ਦੇ 400 ਮੀਟਰ ਘੇਰੇ ਅੰਦਰ ਮਨੋਰੰਜਨ ਲਈ ਗੋਲੀ ਚਲਾਉਣਾ ਪੂਰੀ ਤਰ੍ਹਾਂ ਗੈਰ-ਕਾਨੂੰਨੀ ਹੈ ਅਤੇ ਅਜਿਹਾ ਕਰਨ ਵਾਲਿਆਂ ਨੂੰ ਅਪਰਾਧਿਕ ਮਾਮਲਿਆਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਪੁਲਿਸ ਮੁਤਾਬਕ, ਇਸ ਪੂਰੀ ਕਾਰਵਾਈ ਵਿਚ ਮੌਕੇ 'ਤੇ ਕੁੱਲ 21 ਨੌਜਵਾਨਾਂ ਵਿਚੋਂ 4 ਸਿੱਧੇ ਤੌਰ 'ਤੇ ਸ਼ੂਟਿੰਗ ਵਿਚ ਸ਼ਾਮਲ ਸਨ।