9.06C Vancouver 9.06C VancouverAug 6, 2021 9:11 AM -
ਸ਼ੁੱਕਰਵਾਰ ਨੂੰ ਰਾਜ ਸਭਾ ਦੀ ਕਾਰਵਾਈ ਨੂੰ, ਵਿਰੋਧੀ ਐੱਮਪੀਜ਼ ਵੱਲੋਂ ਕੀਤੇ ਗਏ ਹੰਗਾਮੇ ਕਰਕੇ ਕੱਲ ਸਵੇਰੇ 11 ਵਜੇ ਤੱਕ ਲਈ ਮੁਲਤਵੀ ਕਰ ਦਿੱਤਾ ਗਿਆ।
ਅੱਜ ਪਹਿਲਾਂ, ਵਿਰੋਧੀ ਧਿਰ ਦੇ ਐੱਮਪੀਜ਼ ਨੇ ਰਾਜ ਸਭਾ ਵਿੱਚ ਪੈਗੈਸਸ ਪ੍ਰੌਜੈਕਟ ਦੀਆਂ ਮੀਡੀਆ ਰਿਪੋਰਟਾਂ 'ਤੇ ਹੰਗਾਮਾ ਕੀਤਾ ਅਤੇ 'ਪੈਗੈਸਸ ਦਾ ਖੁਲਾਸਾ' ਕਰਨ ਦੇ ਨਾਅਰੇ ਲਾਏ।
ਨਵੇਂ ਖੇਤੀ ਕਾਨੂੰਨਾਂ ਨੂੰ ਲੈਕੇ ਚੱਲ ਰਹੇ ਕਿਸਾਨੀ ਸੰਘਰਸ਼ ਦੇ ਮੁੱਦੇ 'ਤੇ ਕਾਂਗਰਸ ਦੇ ਐੱਮਪੀ ਦੀਪੇਂਦਰ ਸਿੰਘ ਹੁੱਡਾ ਨੇ ਅੱਜ ਸ਼ੁੱਕਰਵਾਰ ਨੂੰ, ਰਾਜ ਸਭਾ ਵਿੱਚ 'ਕਾਰਵਾਈ ਨੂੰ ਮੁਲਤਵੀ' ਕਰਨ ਦਾ ਨੋਟਿਸ ਦਿੱਤਾ।
ਨੋਟਿਸ ਵਿੱਚ ਹੁੱਡਾ ਨੇ ਆਖਿਆ,"ਸਿਤੰਬਰ,2020 ਨੂੰ ਭਾਰਤ ਸਰਕਾਰ ਵੱਲੋਂ ਪਾਸ ਕੀਤੇ ਗਏ ਖੇਤੀ ਕਾਨੂੰਨਾਂ ਦੇ ਮੁੱਦੇ 'ਤੇ ਵੱਖਰੀ ਤਰਾਂ ਦੇ ਹਾਲਾਤ ਹੋਣ ਕਰਕੇ ਐਵਾਨ ਨੂੰ ਇਸ 'ਤੇ ਚਰਚਾ ਕਰਨੀ ਚਾਹੀਦੀ ਹੈ।"
ਉਨ੍ਹਾਂ ਆਖਿਆ ਕਿ ਲਗਭਗ ਬੀਤੇ 8 ਮਹੀਨਿਆਂ ਤੋਂ ਲੱਖਾਂ ਹੀ ਕਿਸਾਨ, ਕੜਾਕੇ ਦੀ ਠੰਢ, ਤਪਦੀ ਗਰਮੀ ਅਤੇ ਹੁਣ ਮਾਨਸੂਨ 'ਚ ਖੁੱਲੇ ਅਸਮਾਨ ਹੇਠਾਂ, ਕੌਮੀ ਰਾਜਧਾਨੀ ਦੇ ਬਾਰਡਰਾਂ 'ਤੇ ਧਰਨਾ ਦੇ ਰਹੇ ਹਨ।
ਹੁੱਡਾ ਦੇ ਨੋਟਿਸ ਵਿੱਚ ਇਹ ਜ਼ਿਕਰ ਵੀ ਕੀਤਾ ਗਿਆ ਕਿ ਕਿਸਾਨ ਜਥੇਬੰਦੀਆਂ ਮੁਤਾਬਕ, ਧਰਨੇ ਦੌਰਾਨ 500 ਤੋਂ ਵੀ ਵੱਧ ਕਿਸਾਨਾਂ ਦੀ ਜਾਨ ਜਾ ਚੁੱਕੀ ਹੈ।
"ਜਮਹੂਰੀ ਮੁਲਕ ਹੋਣ ਦੇ ਨਾਤੇ, ਸਾਡੀ ਪਾਰਲੀਮੈਂਟ ਲੋਕਾਂ ਦੀ ਇੱਛਾ ਅਤੇ ਲੋਕਾਂ ਦੀ ਪ੍ਰਤੀਨਿਧੀ ਹੈ ਅਤੇ ਇਹ ਸਾਡਾ ਫਰਜ਼ ਹੈ ਕਿ ਜਮਹੂਰੀਅਤ ਦੇ ਇਸ ਮੰਦਰ ਵਿੱਚ ਉਨ੍ਹਾਂ ਦੇ ਮੁੱਦੇ ਚੁੱਕੀਏ। ਇਸ ਲਈ ਮੈਂ, ਤੁਹਾਨੂੰ ਗੁਜ਼ਾਰਿਸ਼ ਕਰਦਾ ਹਾਂ ਕਿ ਐਵਾਨ ਦੀ ਕਾਰਵਾਈ ਮੁਲਤਵੀ ਕੀਤੀ ਜਾਵੇ, ਤਾਂ ਜੋ ਰਾਜ ਸਭਾ 'ਚ ਇਸ ਮੁੱਦੇ 'ਤੇ ਚਰਚਾ ਕੀਤੀ ਜਾ ਸਕੇ,"ਨੋਟਿਸ ਵਿੱਚ ਅੱਗੇ ਲਿਖਿਆ ਸੀ।
ਵੀਰਵਾਰ ਨੂੰ ਵੀ ਐਵਾਨ ਦੀ ਕਾਰਵਾਈ ਕਈ ਵਾਰੀ ਰੋਕਣੀ ਪਾਈ।
ਬੁੱਧਵਾਰ ਨੂੰ , ਪੈਗੈਸਸ ਜਾਸੂਸੀ ਮੁੱਦੇ 'ਤੇ ਸਵੇਰ ਨੂੰ ਰਾਜ ਸਭਾ ਵਿੱਚ ਹੰਗਾਮਾ ਕਰਨ 'ਤੇ, ਛੇ ਟੀਐੱਮਸੀ ਐੱਮਪੀਜ਼ ਨੂੰ ਬਰਖ਼ਾਸਤ ਕਰ ਦਿੱਤਾ ਗਿਆ ਸੀ।
ਦੱਸਣਯੋਗ ਹੈ ਕਿ ਵਿਰੋਧੀ ਧਿਰ ਵੱਲੋਂ ਕਿਸਾਨੀ ਸੰਘਰਸ਼, ਪੈਗੈਸਸ ਜਾਸੂਸੀ, ਕੋਵਿਡ-19 ਅਤੇ ਮਹਿੰਗਾਈ ਦੇ ਮੁੱਦਿਆਂ 'ਤੇ ਲਗਾਤਾਰ ਹੰਗਾਮਾ ਕਰਨ ਕਰਕੇ, ਪਾਰਲੀਮੈਂਟ ਦੇ ਦੋਵਾਂ ਐਵਾਨਾਂ ਦੀ ਕਾਰਵਾਈ ਵਿੱਚ ਵੱਡੇ ਪੱਧਰ 'ਤੇ ਵਿਘਨ ਪਿਆ।
ਮਾਨਸੂਨ ਇਜਲਾਸ 19 ਜੁਲਾਈ ਨੂੰ ਸ਼ੁਰੂ ਹੋਇਆ ਸੀ ਅਤੇ ਇਹ 13 ਅਗਸਤ ਤੱਕ ਚੱਲੇਗਾ।
