ਬੀ.ਸੀ. ਵਿਚ ਜੰਗਲੀ ਜੀਵਾਂ ਦੀ ਰਿਹਾਇਸ਼ ਨੂੰ ਬਚਾਉਣ ਲਈ ਕੀਤਾ ਗਿਆ ਵੱਡਾ ਉਪਰਾਲਾ

ਬੀ.ਸੀ. ਵਿਚ ਜੰਗਲੀ ਜੀਵਾਂ ਦੀ ਰਿਹਾਇਸ਼ ਨੂੰ ਬਚਾਉਣ ਲਈ ਵੱਡਾ ਉਪਰਾਲਾ ਕੀਤਾ ਗਿਆ ਹੈ। ਕੈਨੇਡਾ ਦੀ ਨੇਚਰ ਕੰਜ਼ਰਵੈਂਸੀ ਕਹਿਣਾ ਹੈ ਕਿ ਉਸ ਨੇ ਜੰਗਲੀ ਜੀਵਾਂ ਦੇ ਮਹੱਤਵਪੂਰਨ ਨਿਵਾਸ ਸਥਾਨ ਦੀ ਰੱਖਿਆ ਲਈ ਬੀ.ਸੀ. ਦੇ ਦੱਖਣ-ਪੂਰਬੀ ਖੇਤਰ ਵਿੱਚ 271 ਹੈਕਟੇਅਰ ਮਹੱਤਵਪੂਰਨ ਘਾਹ ਦੇ ਮੈਦਾਨ ਖਰੀਦੇ ਹਨ। ਕੰਜ਼ਰਵੈਂਸੀ ਦਾ ਕਹਿਣਾ ਹੈ ਕਿ ਫੈਡਰਲ ਸਰਕਾਰ ਅਤੇ ਨਿੱਜੀ ਦਾਨੀਆਂ ਦੇ ਫੰਡਾਂ ਨਾਲ ਕਰੇਨਬ੍ਰੋਕ ਦੇ ਉੱਤਰ ਵਿੱਚ ਸਕੂਮਚੁਕ ਪ੍ਰੈਰੀ ਵਜੋਂ ਜਾਣੇ ਜਾਂਦੇ ਖੇਤਰ ਵਿੱਚ ਜ਼ਮੀਨਾਂ ਖਰੀਦੀਆਂ ਗਈਆ ਹਨ।

ਬੀ.ਸੀ. ਦੇ ਨੇਚਰ ਕੰਜ਼ਰਵੈਂਸੀ ਪ੍ਰੋਗਰਾਮ ਦੇ ਡਾਇਰੈਕਟਰ ਰਿਚਰਡ ਕਲਾਫਕੀ ਦਾ ਕਹਿਣਾ ਹੈ ਕਿ ਇਹ ਜ਼ਮੀਨਾਂ ਇਕ ਸਥਾਨਕ ਪਸ਼ੂ ਪਾਲਕ ਤੋਂ ਖਰੀਦੀਆਂ ਗਈਆਂ ਸਨ। ਕਲਾਫਕੀ ਦਾ ਕਹਿਣਾ ਹੈ ਕਿ ਇਹ ਖੇਤਰ ਲੰਮੀ ਚੁੰਝ ਵਾਲੇ ਪੰਛੀ ਕਰਲਿਊ ਦਾ ਘਰ ਰਿਹਾ ਹੈ ਅਤੇ ਇਥੇ ਐਲਕ, ਹਿਰਨ ਅਤੇ ਹੋਰ ਪ੍ਰਜਾਤੀਆਂ ਵੀ ਪਾਈਆਂ ਜਾਂਦੀਆਂ ਹਨ।

ਕਲਾਫਕੀ ਅਨੁਸਾਰ ਇਸ ਪ੍ਰਾਜੈਕਟ ਲਈ 3.4 ਮਿਲੀਅਨ ਡਾਲਰ ਦੀ ਫੰਡਿੰਗ ਦਾ ਲਗਭਗ ਦੋ ਤਿਹਾਈ ਹਿੱਸਾ ਨਿੱਜੀ ਦਾਨ ਤੋਂ ਆਇਆ ਹੈ ਅਤੇ ਇਸ ਦੇ ਨਾਲ ਹੀ ਫੈਡਰਲ ਸਰਕਾਰ ਨੇ ਆਪਣੇ ਕੁਦਰਤੀ ਵਿਰਾਸਤ ਸੰਭਾਲ ਫੰਡ ਰਾਹੀਂ 1.3 ਮਿਲੀਅਨ ਡਾਲਰ ਦਾ ਯੋਗਦਾਨ ਦਿੱਤਾ ਹੈ।