ਪ੍ਰਧਾਨ ਮੰਤਰੀ ਮੋਦੀ ਦੇ ਜੀ-7 ਸੱਦੇ 'ਤੇ ਐਨ.ਡੀ.ਪੀ. ਵੀ ਮੰਗ ਰਹੀ ਸਪਸ਼ਟੀਕਰਨ

ਪ੍ਰਧਾਨ ਮੰਤਰੀ ਕਾਰਨੀ ਵਲੋਂ ਮੋਦੀ ਨੂੰ ਜੀ-7 ਲਈ ਦਿੱਤੇ ਸੱਦੇ ਦੇ ਵਿਰੋਧ ਵਿਚ ਐਨ.ਡੀ.ਪੀ. ਦੀ ਪਬਲਿਕ ਸੇਫਟੀ ਤੇ ਰਾਸ਼ਟਰੀ ਸੁਰੱਖਿਆ ਆਲੋਚਕ ਜੈਨੀ ਕਵਾਨ ਅਤੇ ਪਾਰਟੀ ਦੀ ਵਿਦੇਸ਼ੀ ਮਾਮਲਿਆਂ ਦੀ ਆਲੋਚਕ ਹੀਥਰ ਮੈਕਫਰਸਨ ਨੇ ਸਿੱਖ ਭਾਈਚਾਰੇ ਨਾਲ ਇਕਜੁੱਟਤਾ ਦਿਖਾਈ ਹੈ। ਕਵਾਨ ਨੇ ਕਿਹਾ ਕਿ ਇਹ ਫੈਸਲਾ ਕੈਨੇਡਾ ਦੇ ਸਿੱਖਾਂ ਲਈ ਬਹੁਤ ਪ੍ਰੇਸ਼ਾਨ ਕਰਨ ਵਾਲਾ ਅਤੇ ਦੁਖਦਾਈ ਹੈ।

ਐਨ.ਡੀ.ਪੀ. ਨੇ ਕਿਹਾ ਕਿ ਇਹ ਬਹੁਤ ਮਾੜੀ ਗੱਲ ਹੈ ਕਿ ਸਰਕਾਰ ਪ੍ਰਧਾਨ ਮੰਤਰੀ ਮੋਦੀ ਲਈ ਰੈਡ ਕਾਰਪੇਟ ਵਿਛਾ ਰਹੀ ਹੈ, ਜਿਨ੍ਹਾਂ ਦੀ ਸਰਕਾਰ ਸਿੱਧੇ ਤੌਰ 'ਤੇ ਭਾਈ ਹਰਦੀਪ ਸਿੰਘ ਨਿੱਝਰ ਦੀ ਹੱਤਿਆ ਵਿਚ ਸ਼ਾਮਲ ਰਹੀ ਹੈ।

ਕਵਾਨ ਅਤੇ ਮੈਕਫਰਸਨ ਨੇ ਕਿਹਾ ਕਿ ਕਾਰਨੀ ਸਰਕਾਰ ਇਹ ਦੱਸੇ ਕਿ ਇਸ ਸੱਦੇ ਰਾਹੀਂ ਨਿਆਂ ਅਤੇ ਮਨੁੱਖੀ ਅਧਿਕਾਰਾਂ ਕਿਵੇਂ ਬਰਕਰਾਰ ਰੱਖੇ ਜਾ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਇਹ ਕਦਮ ਸਾਡੇ ਦੇਸ਼ ਵਿਚ ਬਾਹਰੀ ਦਖ਼ਲ ਅਤੇ ਹਿੰਸਾ ਲਈ ਵਿਦੇਸ਼ੀ ਤਾਕਤਾਂ ਨੂੰ ਜਵਾਬਦੇਹ ਠਹਿਰਾਉਣ ਦੀਆਂ ਕੋਸ਼ਿਸ਼ਾਂ ਨੂੰ ਕਮਜ਼ੋਰ ਕਰਨ ਵਾਲਾ ਹੈ।