ਕੈਨੇਡਾ 'ਚ ਖਸਰੇ ਦੇ ਮਾਮਲੇ ਸਾਹਮਣੇ ਆਉਣਾ ਜਾਰੀ, ਨਿਊ ਬਰੰਜ਼ਵਿਕ 'ਚ ਇਕ ਮਾਮਲੇ ਦੀ ਹੋਈ ਪੁਸ਼ਟੀ

ਕੈਨੇਡਾ ਵਿਚ ਖਸਰੇ ਦੇ ਮਾਮਲੇ ਸਾਹਮਣੇ ਆਉਣਾ ਜਾਰੀ ਹੈ। ਨਿਊ ਬਰੰਜ਼ਵਿਕ ਦੇ ਪਬਲਿਕ ਹੈਲਥ ਡਿਪਾਰਟਮੈਂਟ ਨੇ ਹਾਲ ਹੀ ਵਿਚ ਮੋਨਕਟੋਨ ਖੇਤਰ ਵਿਚ ਇੱਕ ਮਾਮਲੇ ਦੀ ਪੁਸ਼ਟੀ ਕੀਤੀ ਹੈ। ਸੂਬੇ ਦੇ ਮੁੱਖ ਮੈਡੀਕਲ ਅਫ਼ਸਰ ਮੁਤਾਬਕ, ਸੰਕ੍ਰਮਿਤ ਵਿਅਕਤੀ ਨੇ ਅੰਤਰਰਾਸ਼ਟਰੀ ਯਾਤਰਾ ਕੀਤੀ ਸੀ ਅਤੇ ਵਾਪਸੀ 'ਤੇ ਉਸ ਦਾ ਟੈਸਟ ਪਾਜ਼ੇਟਿਵ ਪਾਇਆ ਗਿਆ। ਇਸ ਤੋਂ ਪਹਿਲਾਂ 7 ਜੁਲਾਈ ਨੂੰ ਟੋਰਾਂਟੋ ਵਿਚ ਪੀਅਰਸਨ ਏਅਰਪੋਰਟ ਅਤੇ ਦੋ ਉਡਾਣਾਂ 'ਤੇ ਖਸਰੇ ਦੇ ਸੰਭਾਵੀ ਸੰਪਰਕ ਬਾਰੇ ਲੋਕਾਂ ਨੂੰ ਸੁਚੇਤ ਕੀਤਾ ਗਿਆ ਸੀ।

ਦੇਸ਼ ਦੀ ਪਬਲਿਕ ਹੈਲਥ ਏਜੰਸੀ ਮੁਤਾਬਕ, 2026 ਵਿਚ ਕੈਨੇਡਾ ਨੇ ਕੁੱਲ 1,083 ਖਸਰੇ ਦੇ ਮਾਮਲੇ ਦਰਜ ਕੀਤੇ ਹਨ, ਜਿਨ੍ਹਾਂ ਵਿਚ 1,002 ਮਾਮਲਿਆਂ ਦੀ ਪੁਸ਼ਟੀ ਹੋਈ ਹੈ ਅਤੇ 81 ਸੰਭਾਵੀ ਮਾਮਲੇ ਸਨ। ਗੌਰਤਲਬ ਹੈ ਕਿ ਪਿਛਲੇ ਇੱਕ ਸਾਲ ਵਿਚ ਲਗਾਤਾਰ ਮਾਮਲੇ ਸਾਹਮਣੇ ਆਉਣ ਕਾਰਨ ਕੈਨੇਡਾ ਨੇ ਨਵੰਬਰ 2025 ਵਿਚ measles elimination status ਗੁਆ ਦਿੱਤਾ ਸੀ। ਹਾਲਾਂਕਿ, ਤਾਜ਼ਾ ਸਥਿਤੀ ਪਿਛਲੀ ਵਾਰ ਜਿੰਨੀ ਗੰਭੀਰ ਨਹੀਂ ਹੈ।