ਲੈਫਟੀਨੈਂਟ-ਜਨਰਲ ਜੈਨੀ ਕੈਰੀਗਨਨ ਨੇ ਨਵੇਂ ਰੱਖਿਆ ਮੁਖੀ ਵਜੋਂ ਸੰਭਾਲੀ ਕਮਾਨ

ਕੈਨੇਡੀਅਨ ਫੌਜ ਲਈ ਅੱਜ ਇਤਿਹਾਸਕ ਦਿਨ ਹੈ। ਲੈਫਟੀਨੈਂਟ-ਜਨਰਲ ਜੈਨੀ ਕੈਰੀਗਨਨ ਨੇ ਅਧਿਕਾਰਤ ਤੌਰ ’ਤੇ ਸੁਰੱਖਿਆ ਬਲ ਦੀ ਚੀਫ ਆਫ਼ ਡਿਫੈਂਸ ਸਟਾਫ ਦੇ ਰੂਪ ਵਿਚ ਕਮਾਨ ਸੰਭਾਲ ਲਈ ਹੈ, ਜਿਸ ਨਾਲ ਉਹ ਇਸ ਉੱਚ ਅਹੁਦੇ ’ਤੇ ਤਰੱਕੀ ਕਰਨ ਵਾਲੀ ਪਹਿਲੀ ਔਰਤ ਬਣ ਗਈ ਹਨ।

ਉਨ੍ਹਾਂ ਜਨਰਲ ਵੇਨ ਆਇਰ ਦੀ ਥਾਂ ਲਈ , ਜੋ 40 ਸਾਲਾਂ ਦੀ ਸਰਵਿਸ ਮਗਰੋਂ ਸੇਵਾਮੁਕਤ ਹੋਏ ਹਨ। ਓਟਵਾ ਵਿਖੇ ਕੈਨੇਡੀਅਨ ਵਾਰ ਮਿਊਜ਼ਿਅਮ ਵਿਚ ਆਯੋਜਿਤ ਇੱਕ ਸਮਾਰੋਹ ਦੌਰਾਨ ਕੈਰੀਗਨਨ ਨੂੰ ਸੁਰੱਖਿਆ ਬਲ ਦੀ ਪ੍ਰਮੁੱਖ ਵਜੋਂ ਕਮਾਨ ਸੌਂਪੀ ਗਈ।

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਇਸ ਨੂੰ ਇਤਿਹਾਸਕ ਦਿਨ ਦੱਸਿਆ ਅਤੇ ਕਿਹਾ ਕਿ ਕੈਰੀਗਨਨ ਨੇ ਹਮੇਸ਼ਾ ਕੈਨੇਡੀਅਨਾਂ ਦੀ ਸੇਫਟੀ ਨੂੰ ਤਰਜੀਹ ਦਿੱਤੀ ਹੈ ਅਤੇ ਉਹ ਉਨ੍ਹਾਂ ਦੇ ਹਰ ਸਲਾਹ-ਮਸ਼ਵਰੇ ਨੂੰ ਸਿਰ-ਮੱਥੇ ਲਗਾਉਣਗੇ।

ਗੌਰਤਲਬ ਹੈ ਕਿ 2008 ਵਿਚ ਲੜਾਈ ਫੋਰਸ ਨੂੰ ਪਹਿਲੀ ਕੈਨੇਡੀਅਨ ਔਰਤ ਵਜੋਂ ਲੀਡ ਕਰਨ ਵਾਲੀ ਕੈਰੀਗਨਨ ਪੇਸ਼ੇ ਤੋਂ ਲੜਾਕੂ ਇੰਜੀਨੀਅਰ ਹਨ। ਉਨ੍ਹਾਂ ਆਪਣੇ ਤਿੰਨ ਦਹਾਕਿਆਂ ਦੇ ਕਰੀਅਰ ਵਿਚ ਕਈ ਗੋਲਬਲ ਸਮਾਗਮ ਵਿਚ ਮੋਹਰੀ ਭੂਮਿਕਾ ਨਿਭਾਈ ਹੈ।

2020 ਵਿਚ ਉਨ੍ਹਾਂ ਇਰਾਕ ਵਿਚ ਨਾਟੋ ਸਿਖਲਾਈ ਮਿਸ਼ਨ ਦੀ ਕਮਾਨ ਸੰਭਾਲੀ ਸੀ। ਕੈਰੀਗਨਨ ਦੀ ਉੱਚ ਅਹੁਦੇ ’ਤੇ ਨਿਯੁਕਤੀ ਅਜਿਹੇ ਸਮੇਂ ਹੋਈ ਹੈ ਜਦੋਂ ਮਿਲਟਰੀ ਦੇ ਜ਼ਿਆਦਾਤਰ ਕਿੱਤਿਆਂ ਵਿਚ ਔਰਤਾਂ ਨੂੰ ਸੇਵਾ ਕਰਨ ਦੀ ਇਜਾਜ਼ਤ ਦਿੱਤੇ ਜਾਣ ਦੇ 35 ਸਾਲ ਪੂਰੇ ਹੋ ਰਹੇ ਹਨ।