9.8C Vancouver 9.8C VancouverApr 28, 2020 10:39 PM -
ਨੋਵਾ ਸਕੌਸ਼ੀਆ ਆਰ.ਸੀ.ਐਮ.ਪੀ. ਦਾ ਕਹਿਣਾ ਹੈ ਕਿ ਮਾਸ ਸ਼ੂਟਿੰਗ ਲਈ ਜਿੰਮੇਵਾਰ ਸ਼ੂਟਰ ਨੇ ਪੁਲਿਸ ਦੀ ਸਹੀ ਵਰਦੀ ਪਹਿਨੀ ਹੋਈ ਸੀ।
ਇਸਤੋਂ ਅਲਾਵਾ ਦੱਸਿਆ ਗਿਆ ਕਿ ਹਮਲਾਵਰ ਕੋਲ ਪੁਲਿਸ ਦੇ 4 ਵਾਹਨ ਸਨ, ਜੋ ਉਸਨੇ ਨਿਲਾਮੀ ਦੌਰਾਨ ਹਾਸਿਲ ਕੀਤੇ ਹੋਏ ਸਨ।
ਇਨ੍ਹਾਂ ਵਿੱਚੋਂ ਹੀ ਇੱਕ ਵਾਹਨ ਦੀ ਵਰਤੋਂ ਹਮਲੇ ਦੇ ਦਿਨ ਕੀਤੀ ਗਈ ਸੀ।
ਹਮਲਾਵਰ ਕੋਲ ਕਈ ਪੁਲਿਸ ਦੀਆਂ ਵਰਦੀਆਂ ਹੋਣ ਦੀ ਵੀ ਪੁਸ਼ਟੀ ਕੀਤੀ ਗਈ ਹੈ।
ਨੋਵਾ ਸਕੌਸ਼ੀਆ ਆਰ.ਸੀ.ਐਮ.ਪੀ. ਸੁਪਰਡੈਂਟ ਡੈਰਨ ਕੈਂਪਬੈਲ ਨੇ ਕਿਹਾ ਕਿ ਹਾਲ ਦੀ ਜਾਂਚ ਦੌਰਾਨ ਮੰਨਿਆ ਜਾ ਰਿਹਾ ਹੈ ਕਿ ਸ਼ੂਟਰ ਪੋਰਟਾਪੀਕ ਦਾ ਇਲਾਕਾ, ਸ਼ੂਟਿੰਗ ਤੋਂ ਬਾਅਦ ਖੇਤਾਂ ਵਿੱਚੋਂ ਹੋਕੇ ਟੱਪਣ 'ਚ ਕਾਮਯਾਬ ਰਿਹਾ ਸੀ।
ਇਸਤੋਂ ਬਾਅਦ ਉਸਨੇ ਸ਼ਾਮ ਦਾ ਸਮਾਂ ਡੈਬਰਟ ਦੇ ਇੰਡਸਟਰੀਅਲ ਇਲਾਕੇ 'ਚ ਗੁਜਾਰਿਆ ਸੀ।
ਅੱਜ ਦੀ ਪ੍ਰੈਸ ਬ੍ਰੀਫਿੰਗ 'ਚ ਦੱਸਿਆ ਗਿਆ ਕਿ ਪੁਲਿਸ ਵੱਲੋਂ 435 ਗਵਾਹਾਂ ਨਾਲ ਇੰਟਰਵਿਊ ਕੀਤੇ ਜਾ ਰਹੇ ਹਨ।
ਯਾਦ ਰਹੇ ਬੀਤੇ ਹਫਤੇ ਦੀ ਘਟਨਾ 'ਚ 22 ਲੋਕਾਂ ਦੀ ਜਾਨ ਚਲੀ ਗਈ ਸੀ।
ਇਹ ਕੈਨੇਡਾ ਦੇ ਇਤਿਹਾਸ 'ਚ ਸਭ ਤੋਂ ਭਿਆਨਕ ਮਾਸ ਸ਼ੂਟਿੰਗ ਦੀ ਘਟਨਾ ਮੰਨੀ ਜਾ ਰਹੀ ਹੈ।
