12.03C Vancouver 12.03C VancouverOct 15, 2020 3:41 PM -
ਹਾਊਸ ਆਫ ਕਾਮਨਜ਼ ਦੀ ਐਥਿਕਸ ਕਮੇਟੀ ਦੀ ਅੱਜ ਫਿਰ ਤੋਂ ਬੈਠਕ ਹੋਣ ਜਾ ਰਹੀ ਹੈ ਅਤੇ ਵਿਰੋਧੀ ਪਾਰਟੀਆਂ ਦੇ ਐੱਮ.ਪੀ. ‘ਵੀ’ ਸੰਸਥਾ ਮਾਮਲੇ ਦੀ ਜਾਂਚ ਨੂੰ ਦੁਬਾਰਾ ਤੋਂ ਸ਼ੁਰੂ ਕਰਨ ਲਈ ਉਤਸੁਕ ਹਨ।
ਟੋਰੀ ਐੱਮ.ਪੀ. ਮਾਈਕਲ ਬੈਰੇਟ ਮੁਤਾਬਕ ਉਹ ਅਤੇ ਉਨ੍ਹਾਂ ਦੇ ਸਾਥੀਆਂ ਨੂੰ ਇਸ ਮੀਟਿੰਗ ਦੇ ਕਈ ਦਿਨਾਂ ਤੱਕ ਚੱਲਣ ਦੀ ਉਮੀਦ ਹੈ ਕਿਉਂਕਿ ਲਿਬਰਲ ਕਮੇਟੀ ਮੈਂਬਰ ‘ਵੀ’ ਸੰਸਥਾ ਮਾਮਲੇ ਦੇ ਦਸਤਾਵੇਜ਼ਾਂ ਨੂੰ ਸੌਂਪਣ ਵਿੱਚ ਟਾਲ-ਮਟੋਲ ਕਰਦੇ ਆਏ ਹਨ ਅਤੇ ਉਨ੍ਹਾਂ ਕਿਹਾ ਕਿ ਜੇ ਉਨ੍ਹਾਂ ਨੂੰ ਹਾਸਲ ਕਰਨ ਲਈ ਕੁਝ ਸਮਾਂ ਲੱਗੇਗਾ ਤਾਂ ਉਹ ਤਿਆਰ ਹਨ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀ ਮਾਂ ਅਤੇ ਭਰਾ ਲਈ ‘ਵੀ’ ਸੰਸਥਾ ਦੇ ਸਮਾਗਮਾਂ ਦੇ ਬੰਦੋਬਸਤ ਕਰਦੀ ਏਜੰਸੀ ‘ਸਪੀਕਰਜ਼ ਸਪਾਟਲਾਈਟ’ ਤੋਂ ਪਿਛਲੇ ਹਫਤੇ ਬੈਰੇਟ ਵਲੋਂ ਪ੍ਰਸਤਾਵਤ ਕੀਤੇ ਗਏ ਮਤੇ ਵਿੱਚ ਬੀਤੇ 12 ਸਾਲਾਂ ਦੀਆਂ ਰਸੀਦਾਂ ਦੀ ਮੰਗ ਕੀਤੀ ਗਈ ਸੀ।
ਇਨ੍ਹਾਂ ਸਮਾਗਮਾਂ ਵਿੱਚ ਸ਼ਮੂਲੀਅਤ ਕਰਨ ਲਈ ਟਰੂਡੋ ਪਰਿਵਾਰ ਨੂੰ ਪੈਸੇ ਦਿੱਤੇ ਗਏ ਸਨ।
‘ਵੀ’ ਸੰਸਥਾ ਨੂੰ ਸਰਕਾਰ ਦੇ $43.5 ਮਿਲੀਅਨ ਦੇ ਫੈਡਰਲ ਸਟੂਡੈਂਟ ਸਰਵਿਸ ਗ੍ਰਾਂਟ ਪ੍ਰੋਗਰਾਮ ਦੀ ਵਾਗਡੋਰ ਸੰਭਾਲਣ ਦੀ ਜ਼ਿੰਮੇਵਾਰੀ ਦਿੱਤੀ ਗਈ ਸੀ ਅਤੇ ਸੰਸਥਾ ਮੁਤਾਬਕ ਉਨ੍ਹਾਂ ਨੇ ਮਾਰਗ੍ਰੇਟ ਅਤੇ ਐਲਗਜ਼ੈਨਡਰ ਟਰੂਡੋ ਨੂੰ ਬੀਤੇ ਸਾਲਾਂ ਦੌਰਾਨ $350,000 ਦਿੱਤੇ ਸਨ।
ਜ਼ਿਕਰਯੋਗ ਹੈ ਕਿ ਬੀਤੇ ਸ਼ੁੱਕਰਵਾਰ ਲਿਬਰਲ ਕਮੇਟੀ ਮੈਂਬਰਾਂ ਵੱਲੋਂ ਬੈਰੇਟ ਦੇ ਮਤੇ ਨੂੰ ਟਾਲਣ ਦੀ ਕੋਸ਼ਿਸ਼ ਕੀਤੀ ਗਈ ਸੀ ਅਤੇ ਆਖਿਰਕਾਰ ਚਾਰ ਘੰਟੇ ਬਾਅਦ ਬੈਠਕ ਰੱਦ ਕਰ ਦਿੱਤੀ ਗਈ ਸੀ।
